Thĩna ũrĩa mũnene ũkaarehera andũ ihinda rĩgaakorũo na mĩtangĩko mĩingĩ ĩtarĩ yoneka rĩngĩ. Bibilia yarathĩte atĩ thĩna ũcio ũngĩgoka “matukũ-inĩ ma kũrigĩrĩria,” kana ‘ihinda-inĩ rĩa mũthia.’ (2 Timotheo 3:1; Danieli 12:4) Ũgaakorũo ũrĩ “thĩna ũtarĩ woneka kuuma kĩambĩrĩria kĩa ũũmbi ũrĩa Ngai oombire nginyagia hĩndĩ ĩyo, na ndũkoneka rĩngĩ.”—Mariko 13:19; Danieli 12:1; Mathayo 24:21, 22.

Maũndũ marĩa mageekĩka hĩndĩ ya thĩna ũrĩa mũnene

•   Kũniinwo kwa ndini cia maheeni. Ndini cia maheeni ikaaniinwo o rĩmwe. (Kũguũrĩrio 17:1, 5; 18:9, 10, 21) Ngai akaahingia ũndũ ũcio akĩhũthĩra thirikari cia gĩũteti, iria irũgamĩrĩirũo nĩ kĩama kĩa Ũrũmwe wa Mabũrũri.—Kũguũrĩrio 17:3, 15-18. a

•   Gũtharĩkĩrũo kwa ndini ya ma. Ngwatanĩro ya mabũrũri, ĩrĩa ĩtĩtwo “Gogu wa bũrũri wa Magogu” thĩinĩ wa kĩoneki kĩa Ezekieli, nĩ ĩkaageria kũniina arĩa marũmagĩrĩra ndini ya ma. O na kũrĩ ũguo, Ngai nĩ akaagitĩra athathaiya ake matikaniinwo.—Ezekieli 38:1, 2, 9-12, 18-23.

•   Andũ gũtuĩrũo. Jesu nĩ agaatuĩra andũ othe, na “nĩ akaamũrania andũ, o ta ũrĩa mũrĩithi amũranagia ngʼondu na mbũri.” (Mathayo 25:31-33) O mũndũ agaatuĩrũo kũringana na ũrĩa aarũmbũyirie ‘ariũ a Ithe’ na Jesu, arĩa magaathana nake kũrĩa igũrũ.—Mathayo 25:34-46.

•   Gũcokanĩrĩrio kwa arĩa magaathana marĩ athamaki kũrĩa igũrũ. Akristiano ehokeku arĩa mathuurĩtwo a gũgaathana hamwe na Kristo, nĩ makaarĩkia ũtũũro wao wa gũkũ thĩ na mariũkio mathiĩ igũrũ.—Mathayo 24:31; 1 Akorintho 15:50-53; 1 Athesalonike 4:15-17.

•   Hari-Magedoni. Nĩ “mbaara ya mũthenya ũrĩa mũnene wa Ngai Mwene-Hinya-Wothe,” na noyo ĩtagwo “mũthenya wa Jehova.” (Kũguũrĩrio 16:14, 16; Isaia 13:9; 2 Petero 3:12) Andũ arĩa magaatuĩrũo nĩ Kristo atĩ nĩ magĩrĩire kũniinwo, nĩ makaaniinwo. (Zefania 1:18; 2 Athesalonike 1:6-10) Ũndũ ũcio ũkaahutia nginya kũniinwo gwa thirikari ciothe cia gĩũteti iria thĩinĩ wa Bibilia irũgamĩrĩirũo nĩ nyamũ ya gĩthaka ĩrĩ na ciongo mũgwanja.—Kũguũrĩrio 19:19-21.

Maũndũ marĩa mageekĩka thutha wa thĩna ũrĩa mũnene

•   Shaitani na ndaimono ciake kũhingĩrũo. Mũraika ũrĩa mũnene nĩ agaaikia Shaitani na ndaimono ciake thĩinĩ wa “irima rĩrĩa rĩtarĩ gĩturi,” ũndũ ũrĩa ũrũgamĩrĩire kwagithio hinya biũ. (Kũguũrĩrio 20:1-3) Rĩrĩa Shaitani agaaikio thĩinĩ wa irima rĩu rĩtarĩ gĩturi, agaakorũo ahaana ta ohetwo njera, kwoguo ndakaahota gũtongoria maũndũ.—Kũguũrĩrio 20:7.

•   Wathani wa Mĩaka Ngiri kwambĩrĩria. Ũthamaki wa Ngai nĩ ũkaambĩrĩria wathani waguo wa mĩaka 1,000, ũrĩa ũkaarehera andũ irathimo nyingĩ. (Kũguũrĩrio 5:9, 10; 20:4, 6) “Andũ kĩrĩndĩ kĩnene” nĩ makaahonoka ‘kuuma thĩna-inĩ ũrĩa mũnene,’ na meyonere Wathani wa Mĩaka Ngiri ũkĩambĩrĩria gũkũ thĩ.—Kũguũrĩrio 7:9, 14; Thaburi 37:9-11.