“Rĩu-rĩ, kũringana na hinya wake ũrĩa ũrutaga wĩra thĩinĩ witũ, o we ũngĩhota gwĩka o na agakĩrĩrĩria mũno makĩria maũndũ marĩa tũmũhoyaga kana tũngĩĩcirĩria, arogĩa na riri.”—Aefeso 3:20, 21, New World Translation in Kikuyu.

 “Na rĩrĩ, we ũrĩa ũhotaga gwĩka maũndũ na agakĩrĩrĩria mũno mũno marĩa mothe tũhoyaga o na marĩa twĩciragia, nĩ ũndũ wa ũhoti wake ũrĩa ũrutaga wĩra thĩinĩ wĩtũ-rĩ, o we ũcio arogoocagwo.”—Aefeso 3:20, 21, The Bible in Gikũyũ.

 Mũtũmwo Paulo oonanagia ũũma ũrĩa aarĩ naguo atĩ Ngai no ahote gũcokia mahoya ma athathaiya ake, na kũhingia maũndũ marĩa marerĩgĩrĩra na njĩra o na matangĩciria no ĩhoteke. Macokio make o na no makorũo makĩrĩte ũrĩa o marerĩgĩrĩra.

 “Rĩu-rĩ, kũringana na hinya wake ũrĩa ũrutaga wĩra thĩinĩ witũ, o we ũngĩhota gwĩka.” Mũhari wa 21 ũronania atĩ ũcio wĩtĩtwo “we” mũhari-inĩ wa 20 nĩ Jehova Ngai. a Paulo aandĩkire ũũ mũhari-inĩ ũcio wa 21: “Arogĩa na riri kũgerera kĩũngano na kũgerera Kristo Jesu.” Ningĩ Ngai no ahote gũtũhe hinya ũrĩa tũrabatara nĩguo twĩke wendi wake.—Afilipi 4:13.

 Mũhari-inĩ wa 20, mũtũmwo Paulo nĩ agwetete ũndũ wa mwanya wĩgiĩ ũhoti wa Jehova wa gũteithia athathaiya ake. Ibuku rĩmwe rĩgĩtaarĩria kiugo kĩrĩa gĩtaũrĩtwo “o we ũngĩhota,” riugĩte ũũ: “Mũhari ũcio ndũronania tu atĩ Ngai no ahote gwĩka ũndũ kana atĩ kwĩna ũhotekeku awĩke, no ũronania atĩ arĩ na hinya wa kũwĩka.” Mũrata no ende gũtũteithia, no rĩmwe akaga ũhoti wa gwĩka ũndũ ũrĩa angĩenda. No Jehova gũtirĩ hĩndĩ angĩremwo gwĩka ũndũ ũrĩa ũrabatarania nĩguo arũmbũiye athathaiya ake na acokie mahoya mao. We nowe ũrĩ hinya na wathani ũtarĩ mĩhaka.—Isaia 40:26.

 Ngai no ahote “gwĩka o na agakĩrĩrĩria mũno makĩria maũndũ marĩa tũmũhoyaga kana tũngĩĩcirĩria.” Jehova to kũrũmbũiya arũmbũyagia athathaiya ake mũno kana “agakĩrĩrĩria mũno makĩria.” No amateithie na njĩra ikĩrĩte ũrĩa o mangĩciria atĩ nĩcio ciagĩrĩire.

 Nĩ harĩ ũndũ ũngĩ tũreruta kuumana na ciugo “makĩria [ma] maũndũ marĩa tũmũhoyaga kana tũngĩĩcirĩria.” Kũgerera ciugo icio, Paulo eendaga Akristiano mataũkĩrũo atĩ Ngai no ahote kũmateithia na njĩra ikĩrĩte ũrĩa o mangĩĩrĩgĩrĩra. Bibilia ya The Holy Bible in Gĩkũyũ Language ĩtaũrĩte gĩcunjĩ kĩa mbere kĩa mũhari wa 20 ũũ: “Kũrĩ ũcio ũhotaga gwĩka maũndũ maingĩ gũkĩra marĩa tũngĩciiria kana tũngĩmũũria.” Rĩmwe Akristiano no mone ta mathĩna mao marĩ manene mũno kana ta marĩ maritũ mũno ũndũ matangĩniinwo. O na no marigwo kĩrĩa mekũhoya. No Jehova ndangĩremwo nĩ gũtaũkĩrũo nĩ ũndũ ũrĩa maragerera, na ũhoti wake wa kũmateithia ndũrĩ mĩhaka. Ihinda-inĩ rĩrĩa angĩona rĩagĩrĩire, no aniine thĩna o wothe, na eke ũguo na njĩra matangĩcirĩria kana mone ta ĩngĩhoteka. (Ayubu 42:2; Jeremia 32:17) No ihinda rĩu rĩtakinyĩte, no amahe hinya wa gũkirĩrĩria, na meke ũguo marĩ na gĩkeno.—Jakubu 1:2, 3.

 Ibuku rĩa Aefeso nĩ marũa mũtũmwo Paulo aandĩkĩire Akristiano arĩa maaikaraga taũni-inĩ ya Efeso gĩcigo-inĩ kĩa Asia Nini, kĩrĩa kĩrĩ bũrũri-inĩ ũrĩa wĩtagwo Turkey ũmũthĩ. Marũa-inĩ macio, aandĩkire maũndũ marĩa aahoire igũrũ rĩamo nĩ ũndũ wao. (Aefeso 3:14-21) Aahoire atĩ Aefeso, o hamwe na Akristiano othe, mataũkĩrũo wega makĩria nĩ wendo wa Kristo na njĩra ya kwĩrutanĩria kwĩgerekania na ũrĩa Jesu eeciragia na ageka maũndũ na njĩra ya wendo. Paulo aarĩkĩrĩirie mahoya make na njĩra ya kũgooca Ngai na kũgweta ciugo iria irĩ thĩinĩ wa Aefeso 3:20, 21.

 Wĩrorere video ĩno nguhĩ wone ũhoro mũkuhĩ wĩgiĩ ibuku rĩa Aefeso.