“Tũtigakue ngoro harĩ gwĩkaga wega, nĩ gũkorũo nĩ tũkaagetha hĩndĩ ĩrĩa yagĩrĩire twaga kũnoga.”—Agalatia 6:9, New World Translation in Kikuyu.

 “Tũtikananogio nĩ gwĩkaga wega: nĩ ũndũ twaaga kũũrũo nĩ hinya, nĩtũkagetha hĩndĩ ĩrĩa yerekereire yakinya.”—Agalatia 6:9, The Bible in Gikũyũ.

 Mũtũmwo Paulo eeraga Akristiano mathiĩ na mbere gwĩka maũndũ marĩa Ngai onaga marĩ mega. Gwĩka ũguo no gũtũme makorũo na ma atĩ Ngai nĩ arĩmarathimaga.

 “Tũtigakue ngoro.” Ciugo ici ningĩ no itaũrũo “tũtikananogio.” Kiugo gĩa Kĩngiriki kĩrĩa gĩtaũrĩtwo ciugo icio ningĩ no gĩkorũo gĩkiuga mũndũ kũigua atarĩ na wendi. Gũkorũo atĩ mũtũmwo Paulo nĩ eeĩkĩrire ho akĩandĩka ciugo icio kũronania atĩ o nake rĩmwe nĩ aaiguaga akuĩte ngoro.—Aroma 7:21-24.

 “Wega” ũrĩa ũrarĩrĩrio mũhari-inĩ ũyũ nĩ maũndũ mothe marĩa Mũkristiano agĩrĩirũo gwĩka ũtungata-inĩ wake harĩ Ngai. Ũguo nĩ kuuga nginya maũndũ marĩa mũndũ ekaga nĩgetha ateithie Akristiano arĩa angĩ na andũ angĩ.—Agalatia 6:10.

 “Nĩ tũkaagetha hĩndĩ ĩrĩa yagĩrĩire twaga kũnoga.” Paulo aaririkanagia andũ atĩ ihinda rĩigana ũna nĩ rĩngĩahĩtũkire matonete maumĩrĩro ma gwĩka wega, o ta ũrĩa mĩmera ya mũrĩmi yoyaga ihinda gũkũra. Aagwetire ũhoro wĩgiĩ kũgetha akĩenda kuonania ũũma wa ciugo ici irĩ thĩinĩ wa Agalatia 6:7: “Kĩrĩa gĩothe mũndũ arahanda, kĩu nokĩo akaagetha.” Kwoguo Mũkristiano angĩka maũndũ marĩa Ngai onaga marĩ mega, nĩ akaagetha kĩrathimo kĩnene, nginya muoyo wa tene na tene.—Aroma 2:6, 7; Agalatia 6:8.

 Mũtũmwo Paulo aandĩkire marũa maya kũrĩ Akristiano arĩa maaikaraga Galatia kĩndũ mwaka wa 50-52 Mahinda Maitũ. Aamandĩkire nĩgetha agitĩre Akristiano kuumana na andũ maaugaga atĩ o nĩ Akristiano, no nĩ maathũkagia ũhoro wa ma wĩgiĩ Jesu. (Agalatia 1:6, 7) Arutani acio a maheeni maaugaga atĩ Akristiano nĩ maabatiĩ gwathĩkĩra Watho ũrĩa Ngai aaheete rũrĩrĩ rwa Isiraeli kũgerera harĩ Musa. (Agalatia 2:15, 16) Paulo aataarĩirie atĩ Watho nĩ wahingĩtie muoroto waguo na kwoguo athathaiya a Ngai matierĩgagĩrĩrũo maũrũmĩrĩre.—Aroma 10:4; Agalatia 3:23-25.

 Rĩrĩa Paulo eerire Akristiano mathiĩ na mbere “gwĩkaga wega,” ndaaragia ũhoro wĩgiĩ gwathĩkĩra Watho wa Musa. No aameeraga ‘mahingagie watho wa Kristo,’ na ũguo nĩ kuuga nginya maũndũ mothe marĩa Jesu aarutanire megiĩ gwĩkĩra andũ arĩa angĩ maũndũ mega.—Agalatia 6:2; Mathayo 7:12; Johana 13:34.

 Wĩrorere video ĩno nguhĩ wone ũhoro ũrĩa ũrĩ thĩinĩ wa ibuku rĩa Agalatia.