MĨHARI YA BIBILIA ĨTAARĨIRIO

Aroma 10:13—‘Gũkaĩra Rĩĩtwa rĩa Mwathani’

THAAKA

“Mũndũ o wothe ũkayagĩra rĩĩtwa rĩa Jehova nĩ akaahonokio.”—Aroma 10:13, New World Translation in Kikuyu.

“Mũndũ o wothe ũgakaĩra rĩĩtwa rĩa Mwathani nĩakahonoka.”—Aroma 10:13, The Bible in Gikũyũ.

Ũrĩa Aroma 10:13 yugĩte

Ngai ndarĩ mũthutũkanio na nĩ aheaga andũ othe mweke wa gũkaahonoka nĩgetha makaagĩa na muoyo wa tene na tene, gũtekũmakania bũrũri ũrĩa maumĩte, rũrĩrĩ rwao, kana ũhoti wao wa kĩĩmbeca. No nĩguo tũkaagĩa na mweke ũcio, no mũhaka tũkaĩre rĩĩtwa rĩa Jehova, na nĩrĩo rĩĩtwa rĩa Ngai Mwene-Hinya-Wothe. a—Thaburi 83:18.

Thĩinĩ wa Bibilia, ciugo ‘gũkaĩra rĩĩtwa rĩa Jehovaʼ nĩ makĩria ma kũmenya rĩĩtwa rĩa Ngai na kũrĩhũthĩra ũthathaiya-inĩ. (Thaburi 116:12-14) Kũhutĩtie kwĩhoka Ngai nginya rĩrĩa tũrabatara ũteithio.—Thaburi 20:7; 99:6.

Rĩĩtwa rĩa Ngai rĩarĩ rĩa bata harĩ Jesu Kristo. Ciugo ciake cia mbere thĩinĩ wa ihoya rĩa kĩonereria ciarĩ “Ithe witũ ũrĩ igũrũ, rĩĩtwa rĩaku nĩ rĩtherio,” kana rĩamũrũo. (Mathayo 6:9) Ningĩ Jesu nĩ oonanirie atĩ no mũhaka tũmenye, twathĩkĩre, na twende Jehova angĩkorũo nĩ tũrenda gũkaagĩa muoyo wa tene na tene.—Johana 17:3, 6, 26.

Nĩkĩ no tuuge Jehova nĩwe “Mwathani” ũrĩa ũgwetetwo rĩandĩko-inĩ rĩa Aroma 10:13 thĩinĩ wa The Bible in Gikũyũ? Nĩ tondũ ciugo cia mũhari ũcio irutĩtwo thĩinĩ wa Joeli 2:32, harĩa hahũthĩrĩte rĩĩtwa rĩa Ngai no ti “Mwathani,” maandĩko-inĩ ma tene ma Kĩhibirania. b

Ũhoro ũrĩa ũthiũrũrũkĩirie Aroma 10:13

Thĩinĩ wa Aroma mũrango wa 10, Bibilia yonanagia atĩ nĩguo twĩtĩkĩrĩke nĩ Ngai, no mũhaka tuonanie wĩtĩkio harĩ Jesu Kristo. (Aroma 10:9) Ũndũ ũcio nĩ ũranyitwo mbaru nĩ maandĩko matiganĩte marĩ thĩinĩ wa Kĩrĩkanĩro Kĩrĩa Gĩkũrũ. Mũndũ onanagia wĩtĩkio wake na njĩra ya ‘kumbũra mbere ya andũ,ʼ ũguo nĩ kuuga kũhunjia ũhoro ũrĩa mwega wa ũhonokio kũrĩ arĩa matarĩ etĩkia. Na njĩra ĩyo, andũ arĩa angĩ makagĩa na mweke wa gũkũria wĩtĩkio ũrĩa ũgaatũma magĩe na muoyo.—Aroma 10:10, 14, 15, 17.

Thoma Aroma mũrango wa 10 hamwe na tũũhoro twa magũrũ-inĩ na maandĩko ma kũringithania

a Rĩĩtwa rĩa Ngai nĩ rĩonekaga maita ta 7,000 maandĩko-inĩ marĩa maandĩkirũo tene. Rũthiomi-inĩ rwa Kĩhibirania, rĩĩtwa rĩa Ngai rĩandĩkagwo na ndemwa inya iria ciĩtagwo Tetragrammaton. Kaingĩ rĩĩtwa rĩu rĩtaũragwo “Jehova” na rũthiomi rwa Gĩkũyũ, no nĩ kũrĩ athomi amwe mathuuraga kũhũthĩra rĩĩtwa “Yahweh.”

b No kũhoteke andĩki a maandĩko ma Kĩngiriki maahũthagĩra rĩĩtwa rĩa Ngai makĩgweta mĩhari ya Kĩrĩkanĩro kĩrĩa Gĩkũrũ ĩrĩa ĩrĩ na rĩĩtwa rĩu. Ibuku rĩtagwo The Anchor Bible Dictionary riugaga ũũ: “Nĩ kũrĩ ũira wa atĩ rĩĩtwa rĩa Ngai, Yahweh, rĩarĩ kũndũ kũmwe kana guothe kũrĩa maandĩko ma Kĩrĩkanĩro Kĩrĩa Gĩkũrũ magwetetwo thĩinĩ wa Kĩrĩkanĩro Kĩrĩa Kĩerũ hĩndĩ ĩrĩa Kĩrĩkanĩro Kĩrĩa Kĩerũ kĩaandĩkirũo rĩa mbere.” (Mbuku ya 6, kar. 392) Ũngĩenda kuona ũhoro makĩria, rora “Rĩĩtwa rĩa Ngai Maandĩko-inĩ ma Gĩkristiano ma Kĩngiriki” thĩinĩ wa Ũhoro Muongerere wa A5 Bibilia-inĩ ya New World Translation in Kikuyu.