“Tondũ gũtirĩ uuge ũngĩrema Ngai.”—Luka 1:37, New World Translation in Kikuyu.

 “Nĩgũkorwo gũtirĩ ũndũ ũngĩrema Ngai.”—Luka 1:37, Holy Bible in Gĩkũyũ.

 Ngai Mwene-Hinya-Wothe no eke maũndũ mangĩoneka ta matangĩhoteka harĩ mũndũ. Gũtirĩ ũndũ ũngĩmũgirĩrĩria gwĩka ũrĩa augĩte kana ũrĩa eranĩire.

 Kiugo gĩa Kĩngiriki kĩrĩa gĩtaũrĩtwo “uuge” no gĩkorũo gĩkĩaria ũhoro wa “kiugo,” na rĩandĩko-inĩ rĩrĩ kĩraria ũhoro wa kiugo kĩa Ngai. Ningĩ no gĩkorũo gĩkĩaria ũhoro wa maumĩrĩro ma ũndũ ũrĩa Jehova a Ngai augĩte. Tondũ kiugo kĩa Ngai nĩ kĩhingaga hingo ciothe, rĩandĩko rĩa Luka 1:37 ningĩ no rĩtaũrũo: “Nĩ gũkorũo ciĩranĩro cia Ngai itingĩaga kũhinga” kana “Nĩgũkorwo gũtirĩ ũndũ ũngĩrema Ngai.” Njĩra icio cierĩ cia gũtaũra ciugo cia Kĩngiriki ikoragwo ikiuga ũndũ ũyũ ũmwe: Uuge wa Ngai kana kĩĩranĩro gĩake itingĩaga kũhinga, tondũ gũtirĩ ũndũ ũtangĩhoteka harĩ we.—Isaia 55:10, 11.

 Ciugo ta icio ciĩgiĩ ciĩranĩro cia Ngai nĩ cionekaga kũndũ kũingĩ thĩinĩ wa Bibilia. Kwa ngerekano, kũgerera mũraika, Jehova nĩ eeranĩire atĩ Sara mũtumia wa Iburahimu, ũrĩa ũtaarĩ na mwana, nĩ angĩagĩire nda ũkũrũ-inĩ wake. Ngai aacokire akiuga ũũ: “Kaĩ kũrĩ ũndũ ũngĩrema Jehova?” (Kĩambĩrĩria 18:13, 14) Thutha wa gwĩcũrania igũrũ rĩgiĩ ũũmbi wa Ngai, Ayubu aaugire: “Gũtirĩ ũndũ ũbangĩte gwĩka ũngĩkũrema.” (Ayubu 42:2) Na rĩrĩa arutwo a Jesu maagĩire na nganja igũrũ rĩgiĩ ũhoti wao wa kũhingia ithimi cia Ngai nĩguo makaahonokio, Jesu aamaririkanirie atĩ “harĩ Ngai maũndũ mothe no mahoteke.”—Mathayo 19:25, 26. b

 Mũraika wetagwo Gaburieli aaugire ciugo cia Luka 1:37 akĩaria na mũirĩtu Mũyahudi warĩ gathirange wetagwo Mariamu. Gaburieli aakoretwo amwĩra atĩ nĩ angĩgaciara “Mũrũ wa Ũrĩa ũrĩ Igũrũ Mũno” na aagĩrĩirũo ‘gũkaamwĩta Jesu.’ Angĩgaatuĩka Mũthamaki wa Ũthamaki wa Ngai, ũrĩa ũgaathana tene na tene.—Luka 1:26-33; Kũguũrĩrio 11:15.

 Mariamu nĩ ooririe ũrĩa ũndũ ta ũcio ũngĩahotekire tondũ ndaarĩ mũhiku na ‘ndaakomete na mũndũrũme.’ (Luka 1:34, 35) Gaburieli aamũcokeirie atĩ Ngai nĩ angĩahũthĩrire roho wake mũtheru, na nĩguo hinya wake wa gwĩka maũndũ. Hĩndĩ ĩyo, Jesu aarĩ kĩũmbe kĩa roho kũrĩa igũrũ. Kwoguo Jehova aahũthĩrire roho wake mũtheru gũthaamia muoyo wa Mũrũ wake kuuma igũrũ nginya thĩinĩ wa nda ya Mariamu. (Johana 1:14; Afilipi 2:5-7) Nĩ ũndũ ũcio Mariamu akĩgĩa nda na njĩra ya kĩama. Nĩgetha akorũo na wĩtĩkio mũrũmu harĩ hinya wa Ngai, mũraika aamwĩrire atĩ Elizabethi, ũrĩa warĩ wa mbarĩ ciao, nĩ oohete nda ya mwana wa kahĩĩ “ũkũrũ-inĩ wake.” Elizabethi na mũthuri wake Zekaria matiarĩ na mwana tondũ Elizabethi aarĩ thata. (Luka 1:36) Mwana wao nĩwe watuĩkire Johana Mũbatithania, na Jehova nĩ aarathĩte nginya ũhoro wĩgiĩ ũtungata wake.—Luka 1:10-16; 3:1-6.

 Mũraika Gaburieli aacokire akĩgweta ciugo cia Luka 1:37, hihi agĩciria ũhoro wa Mariamu na Elizabethi. Ciugo icio nĩ iteithagia nginya athathaiya a Jehova ũmũthĩ gũkorũo na ma atĩ nĩ egũthiĩ na mbere kũhingia ciĩranĩro ciake. Ũguo nĩ kuuga nginya kĩĩranĩro gĩa kweheria thirikari cia andũ, na ithenya rĩacio arehe thirikari njega ya Mũrũ wake Jesu Kristo, o we Mũthamaki wa Ũthamaki wa Ngai.—Danieli 2:44; 7:13, 14.

 Wĩrorere video ĩno nguhĩ wone ũhoro ũrĩa ũrĩ thĩinĩ wa ibuku rĩa Luka.