“Mwĩnyihiei na mũmenye atĩ niĩ nĩ niĩ Ngai. Nĩ ngaatũũgĩrio gatagatĩ-inĩ ka ndũrĩrĩ; nĩ ngaatũũgĩrio thĩinĩ wa thĩ.”—Thaburi 46:10, New World Translation in Kikuyu.

 “Hoorerai, na mũmenye atĩ niĩ nĩ niĩ Ngai; nĩngatũũgĩrio ndũrĩrĩ-inĩ, na ndũũgĩrio thĩ yothe.”—Thaburi 46:10, Holy Bible in Gĩkũyũ.

 Ngai akoragwo akĩra andũ othe mamũthathaiye na metĩkĩre atĩ nĩwe ũrĩ na kĩhooto gĩa gwathana thĩinĩ wa thĩ. Gũtirĩ mũndũ ũngĩkararia atĩ nĩ arĩ hinya na wathani, na mũndũ wothe ũngĩenda gũtũũra tene na tene no mũhaka etĩkanie na ũndũ ũcio.—Kũguũrĩrio 4:11.

 “Mwĩnyihiei na mũmenye atĩ niĩ nĩ niĩ Ngai.” Bibilia imwe ihũthĩrĩte kiugo “hoorerai” kĩambĩrĩria-inĩ kĩa mũhari ũcio. Ũndũ ũcio ũtũmĩte andũ amwe manyite mũhari ũcio ũrĩa gũtarĩ atĩ ũkoragwo ũkĩra andũ makorũo na gĩtĩo kana makire marĩ kanitha-inĩ. No ũrĩa kũrĩ nĩ atĩ, ciugo cia Kĩhibirania iria itaũrĩtwo “mwĩnyihiei na mũmenye atĩ niĩ nĩ niĩ Ngai,” nĩ ciugo cia Jehova a Ngai we mwene, na akoragwo akĩra andũ a ndũrĩrĩ ciothe matige kũregana nake na metĩkĩre atĩ nowe wagĩrĩire gũthathaiyo.

 O na thĩinĩ wa Thaburi 2 nĩ augĩte ũndũ ta ũcio. Thĩinĩ wa mũrango ũcio, Ngai augĩte atĩ nĩ arĩoya ikinya nĩ ũndũ wa andũ arĩa mareganaga nake. No andũ arĩa matĩĩte wathani wa Ngai nĩ mamwĩhokaga amahe ũtongoria, hinya, na ũũgĩ. Nĩ ũndũ wa ‘kũũrĩra harĩ we,ʼ nĩ maiguaga marĩ na gĩkeno na ũgitĩri, makĩria rĩrĩa maracemania na moritũ.—Thaburi 2:9-12.

 “Nĩ ngaatũũgĩrio gatagatĩ-inĩ ka ndũrĩrĩ; nĩ ngaatũũgĩrio thĩinĩ wa thĩ.” Mahinda ma tene, Jehova Ngai nĩ aatũũgĩririo rĩrĩa aahũthĩrire hinya wake mũingĩ kũgitĩra andũ ake. (Thama 15:1-3) Mahinda mokĩte, nĩ agaatũũgĩrio na njĩra nene makĩria rĩrĩa andũ othe thĩinĩ wa thĩ magaathĩkagĩra wathani wake na makamũthathaiya.—Thaburi 86:9, 10; Isaia 2:11.

 Ibuku rĩmwe rĩtaaragĩria Thaburi 46 atĩ nĩ “rwĩmbo rwa gũkũngũĩra hinya wa Ngai, ũrĩa ũrĩ ũhoti mũnene wa kũgitĩra andũ ake.” Rĩrĩa andũ a Ngai maainaga Thaburi 46, moonanagia ũrĩa meehokete ũhoti wa Jehova wa kũmagitĩra na kũmateithia. (Thaburi 46:1, 2) Ciugo cia thaburi ĩyo ciamaririkanagia atĩ Jehova aakoragwo hamwe nao hĩndĩ ciothe.—Thaburi 46:7, 11.

 Nĩguo mehoke o na makĩria hinya wa Jehova Ngai wa kũmagitĩra, thaburi ĩyo yamekĩraga ngoro mecũranie mawĩra make ma magegania. (Thaburi 46:8) Yamekĩraga ngoro mecũranie makĩria ũhoro wĩgiĩ ũhoti wake wa kũniina mbaara. (Thaburi 46:9) No kwĩrũo atĩ Jehova nĩ aaniinire mbaara mahinda-inĩ ma Bibilia na njĩra ya kũgitĩra andũ ake kuuma harĩ ndũrĩrĩ iria ciarĩ thũ ciao. Ningĩ Bibilia nĩ ĩranĩire atĩ ica ikuhĩ Ngai nĩ ekũniina mbaara na gĩkĩro kĩnene makĩria, aciniine thĩinĩ wa thĩ yothe.—Isaia 2:4.

 Hihi Jehova no ateithagia athathaiya ake ũmũthĩ? Ĩĩ. O na mũtũmwo Paulo nĩ eerire Akristiano mamwĩhokage amahe ũteithio. (Ahibirania 13:6) Ciugo iria irĩ thĩinĩ wa Thaburi 46 nĩ itũteithagia kwĩhoka o na makĩria hinya wa Ngai wa gũtũgitĩra. Nĩ itũteithagia kũmuona arĩ “rĩũrĩro ritũ na hinya witũ.”—Thaburi 46:1.

 Wĩrorere video ĩno nguhĩ wone ũhoro mũkuhĩ wĩgiĩ ibuku rĩa Thaburi.