“Wĩhokage Jehova na ngoro yaku yothe, na ndũkehokage ũtaũku waku mwene. Wĩciragie ũhoro wake njĩra-inĩ ciaku ciothe, nake nĩ arĩkũrũngagĩra njĩra ciaku.”—Thimo 3:5, 6, New World Translation in Kikuyu.

 “Ĩhokage Jehova na ngoro yaku yothe, ũtigage gwĩtiirania na mbuguĩro yaku mwene; mwĩtĩkagĩre o we mĩthiĩre-inĩ yaku yothe, nacio njĩra ciaku nĩarĩkũrũngagĩra.”—Thimo 3:5, 6, The Bible in Gikũyũ.

 Nĩ twagĩrĩirũo kwĩhoka Jehova a Ngai atũtongorie handũ ha kũrũmĩrĩra ũũgĩ witũ ithuĩ ene tũgĩtua matua ma bata ũtũũro-inĩ.

 “Wĩhokage Jehova na ngoro yaku yothe.” Tuonanagia atĩ nĩ twĩhokete Ngai rĩrĩa tweka maũndũ ũrĩa we endaga. No mũhaka twĩhoke Ngai biũ, na ngoro itũ yothe. Kaingĩ Bibilia ĩhũthagĩra kiugo ngoro gũtaarĩria ũrĩa mũndũ atariĩ na thĩinĩ, na ũndũ ũcio ũhutĩtie ũrĩa mũndũ araigua, kĩrĩa gĩtũmaga eke maũndũ, mwĩcirĩrie wake, na muonere wake wa maũndũ. Kwoguo tũtiĩhokaga Ngai na ngoro itũ yothe no ũndũ tu wa ũrĩa tũiguaga thĩinĩ witũ. Nĩ itua mũndũ atuaga nĩ ũndũ wa gũkorũo na ma atĩ Mũũmbi witũ nĩ oĩ ũndũ ũrĩa ũngĩtwagĩrĩra biũ.—Aroma 12:1.

 “Ndũkehokage ũtaũku waku mwene.” Twagĩrĩirũo kwĩhoka Ngai tondũ mwĩcirĩrie witũ ti mũkinyanĩru na kwoguo tũtingĩwĩhoka. Tũngĩĩhoka ithuĩ ene kana tũtongorio nĩ ũrĩa tũraigua ngoro-inĩ, no tũtue matua mangĩoneka ta marĩ mega kĩambĩrĩria-inĩ no mũthia-inĩ makorũo na maumĩrĩro moru. (Thimo 14:12; Jeremia 17:9) Ũũgĩ wa Ngai nĩ wa igũrũ mũno gũkĩra witũ. (Isaia 55:8, 9) Tũngĩtĩkĩra gũtongorio nĩ ũũgĩ wake, ũtũũro witũ nĩ ũrĩgaacagĩra.—Thaburi 1:1-3; Thimo 2:6-9; 16:20.

 “Wĩciragie ũhoro wake njĩra-inĩ ciaku ciothe.” Nĩ twagĩrĩirũo gũthuthuria mawoni ma Ngai nĩ marĩkũ rĩrĩa tũrenda gũtua itua o rĩothe rĩa bata ũtũũro-inĩ. Twĩkaga ũguo na njĩra ya kũmũhoya atũtongorie na kũrũmĩrĩra ũrĩa augĩte thĩinĩ wa Kiugo gĩake, Bibilia.—Thaburi 25:4; 2 Timotheo 3:16, 17.

 “Nĩ arĩkũrũngagĩra njĩra ciaku.” Ngai atũrũngagĩra njĩra citũ rĩrĩa atũteithia gũtũũra kũringana na ithimi ciake cia ũthingu. (Thimo 11:5) Ũndũ ũcio nĩ ũtũteithagia gwĩthema mathĩna matarĩ ma o mũhaka na tũgakorũo na ũtũũro wĩna gĩkeno.—Thaburi 19:7, 8; Isaia 48:17, 18.

 Ibuku rĩa Thimo nĩ rĩkoragwo na motaaro mangĩteithia mũndũ gũkorũo na ũtũũro wĩna gĩkeno na mũgaacĩru maitho-inĩ ma Ngai. Mĩrango ya mbere kenda yandĩkĩtwo ta arĩ mũthuri ũrataara mũriũ wake endete. Mũrango wa gatatũ wonanagia ũguni ũrĩa uumanaga na kũrũmĩrĩra ũtaaro wa ũũgĩ ũrĩa mũũmbi witũ atũheaga.—Thimo 3:13-26.