Thamaki ĩtagwo remora ĩkoragwo na ũhoti wa kwĩnyitĩrĩra ĩrũmĩtie harĩ ciũmbe ingĩ cia iria-inĩ ĩgacoka ĩkerekereria na njĩra hũthũ ĩtegũtihia kĩũmbe kĩu ĩkwĩnyitĩrĩire. Athuthuria nĩ magegetio nĩ ũhoti ũcio wayo.

 Ta wĩcirie: Thamaki ĩyo ĩtagwo remora ĩĩnyitagĩrĩra harĩ ciũmbe cia iria-inĩ ta nyamũngumĩ, nguru cia iria-inĩ na ingĩ gũtekũmakania kana ngothi ya ciũmbe icio nĩ nyũmũ kana nĩ nyoroku. Ĩrĩaga irio iria ciatigio nĩ kĩũmbe kĩu ĩĩnyitĩrĩire kana tũnyamũ tũnini tũrĩa tũrĩ ngothi-inĩ ya kĩũmbe kĩu, na o hĩndĩ ĩyo ĩgakuuo nĩkĩo na gĩkamĩgitĩra kuumana na thũ. Athuthuria nĩ maratuĩria kĩĩga kĩu gĩa kwĩnyitĩrĩra kĩa remora, nĩguo mamenye ũrĩa gĩteithagia thamaki ĩyo kwĩnyitĩrĩra ngothi-inĩ itiganĩte ĩrũmĩtie.

 Thamaki cia remora ciĩnyitĩrĩire nyamũngumĩ

 Kĩĩga kĩu gĩa kwĩnyitĩrĩra kĩa remora kĩhaana itumbĩ, na gĩkoragwo mwena wa thutha wa mũtwe wayo. Gĩkoragwo kĩrĩ gĩtungu na kĩororo mĩthia-inĩ nĩguo gĩteithie thamaki ĩyo kwĩigĩra rĩera rĩrĩa yagucia. Mwena wa thĩinĩ wa kĩĩga kĩu hakoragwo na tũhĩndĩ tũnini twĩbangĩte mĩhari. Rĩrĩa tũhĩndĩ tũu twarũgama, tũhutanagia na ngothi ya kĩũmbe kĩrĩa ĩrenda kwĩnyitĩrĩra. Kũhutania kũu na kũgucia rĩera ĩkeigĩra, nĩkuo gũteithagia remora kwĩnyitĩrĩra ĩrũmĩtie o na kĩũmbe kĩu kĩngĩkorũo gĩgĩthiĩ na thibindi ĩigana atĩa kana gĩcenjie mwena ũrĩa gĩgũthiaga o rĩmwe.

 Nĩ ũndũ wa athomi a sayansi kuona ũrĩa kĩĩga kĩu gĩa kwĩnyitĩrĩra kĩa remora kĩrĩ kĩa mwanya, nĩ mathondekete kĩndũ kĩhaana ta kĩo. Kĩndũ kĩu mathondekete kĩhaana ta itumbĩ no kĩĩnyitĩrĩre indo-inĩ itiganĩte. Athuthuria mageria gũkĩruta harĩa kĩĩnyitĩrĩire, gĩathiire na mbere kwĩnyitĩrĩra o na mahũthĩra hinya ũkĩrĩte ũritũ wa kĩndũ kĩu na maita igana rĩmwe.

 Tekinolonjĩ yumanĩte na gũthuthuria ũrĩa kĩĩga gĩa kwĩnyitĩrĩra kĩa remora kĩhaana no ĩhũthĩrũo na njĩra itiganĩte. Njĩra icio nĩ ta gwĩkĩra marũũri nyamũ-inĩ cia iria-inĩ rĩrĩa irathuthurio, gũthuthuria kũndũ kũrĩa kũriku mũno iria-inĩ, na gwĩkĩra matawa na indo ingĩ rungu rwa meri kana mwena wa thĩ wa ndaraca ũrĩa ũrĩ maĩ-inĩ.

 Ũgwĩciria atĩa? Hihi kĩĩga gĩa kwĩnyitĩrĩra kĩa remora nĩ kwĩyumĩria kĩeyumĩririe-ĩ, kana nĩ kũũmbwo kĩombirũo?