Ahowe, kadi li omhinge nokutunhilwa. Otwa tala ko okutunhilwa ku li ehoololo lopaumwene lOmukriste keshe. Eendombwedi daJehova dihapu oda hoolola okutunhilwa.

 Ohatu kongo ouhaku u li xwepo nohatu pandula ovanongononi eshi hava ningi eenghendabala opo va ninipike okutandavela kwomikifi. Natango ohatu pandula oilonga youdiinini yovayandji vouhaku, unene tuu pomafimbo aa madjuu.

 Eendombwedi daJehova ohadi longele kumwe novanambelewa vokuyandja ouhaku. Pashihopaenenwa, eshi omukifi wekomba wa hovela, Eendombwedi daJehova oda twikila okunyanyangida ouyelele momalaka omafele ko-website yetu, tadi ladipike oilyo yado opo i liufe komalombwelo e na sha neameno. Osho osha kwatela mo okulikala kokule, okushikula omalombwelo e na sha nokukala poivilo, okulikalela, okulikosha komake, okudjala oumask, nosho yo okutula moilonga omalombwelo oo a tulwa po kovawiliki ve na sha nouhaku. — Ovaroma 13:1, 2.

 Oule womido, oishangomwa yEendombwedi daJehova oya kala nokudivilika omafinamhango taa shikula:

•   Etokolo li na sha nouhaku ehoololo lomunhu mwene. — Ovagalati 6:5.

   “[Oshifo] eshi itashi ku ladipikile omiti, ouxungimwenyo, ile ouhaku wonhumba. Elalakano lasho okuyandja ashike omauyelele nokweefa ovaleshi va ninge omatokolo kuvo vene.” — Awake!, 8 Februali 1987.

   “Epulo olo kutya tunhilweni, oshinima shopaumwene.” — Awake!, 22 Auguste 1965.

•   Ohatu kongo ouhaku molwaashi otwa fimaneka omwenyo. — Oilonga 17:28.

   “Eendombwedi ohadi i keendokotola odo da pyokoka opo di ka konge ekwafo. Oda lenga omwenyo noda hala okuninga keshe shimwe tadi dulu, osho shi li metwokumwe nOmishangwa, opo di u kaleke po.” — Oshungonangelo yOshiingilisha, 1 Juli 1975.

   “Eendombwedi daJehova ohadi tambula ko nehafo omiti nosho yo omauhaku. Ova hala okukwatela po oukolele wavo nokukala nomwenyo efimbo lile. Ngaashi ashike omundokotola Lukas, oo a li ko mefelemudo lotete, nopaife Eendombwedi daJehova dimwe eendokotola. . . . Kape na omalimbililo, Eendombwedi daJehova ohadi pandula oilonga youdiinini yaavo hava yandje omauhaku. Natango ohava pandula ngeenge ovayandji vouhaku ve va kwafela va kale po xwepo.” — Oshungonangelo yOshiingilisha, 1 Februali 2011.