Ahowe, Eendombwedi daJehova kadi fi oshimhanga. Ndele ponhele yaasho, fye otu li Ovakriste ovo hava ningi ngaashi tava dulu opo va shikule oshihopaenenwa shaJesus Kristus nokukala metwokumwe nomahongo aye.

 Outumbulilo oshimhanga otau ti oinima ya yoolokafana kovanhu va yoolokafana. Ndele tala koinima ivali oyo ovanhu hava popi i na sha noimhanga nonokutya omolwashike oinima oyo itai ulike kufye.

•   Vamwe ohava diladila kutya oshimhanga elongelokalunga lipe ile lihe shiivike. Eendombwedi daJehova inadi tota po elongelokalunga lipe. Mepingafano naasho, ohatu longele Kalunga monghedi ya faafana naayo yOvakriste vopefimbo lovayapostoli, ovo oshihopaenenwa nomahongo avo e li mOmbibeli. (2 Timoteus 3:16, 17) Otwa itavela kutya Omishangwa Diyapuki odo di na okukala tadi dana onghandangala melongelokalunga ponhele ashike yokulandula osho sha tambulwa ko kovanhu.

•   Vamwe ohava diladila kutya oshimhanga elongelokalunga la nyika oshiponga olo li na omuwiliki wopanhu. Eendombwedi daJehova kadi na omuwiliki wopanhu. Ponhele yaasho, ohatu dulika komufikamhango oo Jesus a tulila po ovashikuli vaye eshi a ti: “Omupukululi weni umwe aeke, oye Kristus.”—Mateus 23:10.

 Ponhele yokukala oshimhanga sha nyika oshiponga, Eendombwedi daJehova odi li elongelokalunga olo hali etele ouwa oilyo yalo nosho yo vamwe momudingonoko. Pashihopaenenwa, oukalele wetu ohau kwafele ovanhu vahapu va efe po okukala va pikwa koinima ya nyika oshiponga, ngaashi oingangamifi nokunwa sha pitilila. Kakele kaasho, ohatu kwafele yo ovanhu omamiliyona mounyuni aushe ve lihonge okulesha nokushanga. Ohatu kufa yo ombinga mokuyandja oikwafa ngeenge pa ningwa oiponga yopaushitwe. Ohatu longo noudiinini mokukwafela ovanhu vakwetu, ngaashi ashike Jesus a lombwela ovashikuli vaye va ninge.—Mateus 5:13-16.