Eendombwedi daJehova ohadi shikula omayele oo ta hangwa mOmbiibeli e nasha nokuha landula omalundilo nomasheko. Pashihopaenenwa, Ombiibeli oya popya mOmayeletumbulo tai ti: “Ou ta kumaida omusheki, ote lietele ohoni.” (Omayeletumbulo 9:7, 8; 26:4) Ponhele yokukala hatu tu eemhata molwaashi twa lundilwa, ohatu yandje elitulemo kokukala twa wapalela Kalunga. — Epsalme 119:69.

 Ombiibeli oya ti ope na “efimbo lokumwena nefimbo lokupopya.” (Omuudifi 3:7) Ohatu yandje yo elitulemo kokukundafana novanhu ovo va hala okushiiva oshili, ashike ohatu henuka eemhata. Kungaho ohatu shikula omahongo noshihopaenenwa shaJesus nosho yo Ovakriste votete.

•   Jesus ka li a nyamukula eshi a li ta lundilwa koshipala sha Pilatus. (Mateus 27:11-14; 1 Petrus 2:21-23) Natango Jesus ka li a nyamukula eshi a lundulilwa kutya ye omufukulume nongholwe. Ponhele yaasho, eenghatu daJesus oda li de va fifa ohoni, naasho oshi li metwokumwe nefinamhango eli tali ti: “Ouyuki otau yukifa oinima aishe.” (Mateus 11:19) Omafimbo amwe okwa li ha nyamukula ovalundili vaye pomhito opo sha pumbiwa nopehe na oumbada. — Mateus 15:1-3; Markus 3:22-30.

   Jesus okwa honga ovashikuli vaye vaha teke omukumo ngeenge tava lundilwa. Okwa ti: “Ovanelao onye, ovanhu ngeenge tave mu sheke ndele tave mu taataa ndele tave mu popile mowii aushe nokufufya molwange.” (Mateus 5:11, 12) Natango okwa weda ko a ti ngeenge ovashikuli vaye tava lundilwa, otashi ka kala omhito iwa yokuyandja oundombwedi; nota ka wanifa po eudaneko laye e shi a ti: “Ame ohandi mu pe okanya nomaunongo taa nyenge ovakondjifi veni aveshe oku mu nyamukula ile oku mu twifa eemhata.” — Lukas 21:12-​15.

•   Omuyapostoli Paulus okwa lombwela Ovakriste va henuke okutwa eemhata nokupatafana novanhu ovo ve li omhinge ‘omolwoinima yongaho noitai kwafa sha.’ — Titus 3:9; Ovaroma 16:17, 18.

•   Omuyapostoli Petrus okwa ladipika Ovakriste va popile eitavelo lavo apa tashi shiiva. (1 Petrus 3:15) Okwa twa yo omufindo kutya onghedi ya denga mbada yoku shi ningi okupitila meendjedi detu ndele haneendjovo ashike. Okwa shanga a ti: “Onye mokulonga ouwa mu mweneke ovanhu omalai vehe neendunge.” — 1 Petrus 2:12-15.