Tu li Eendombwedi daJehova, ohatu longo noudiinini, opo tu tunge omaukwaneumbo etu vene nosho yo avamwe. Otwa fimaneka Kalunga e li Omutoti woukwaneumbo. (Genesis 2:21-24; Ovaefeso 3:14, 15) Ohe tu hongo omafinamhango okupitila mOmbiibeli, oo haa kwafele ovanhu mounyuni aushe va kale tava hafele ohombo nova kale nomaukwaneumbo a pama.

 Ohatu kendabala okutula moilonga omayele Ombiibeli, naasho ohashi tu kwafele tu kala ovashamane, ovakulukadi novadali ve li xwepo. (Omayeletumbulo 31:10-31; Ovaefeso 5:22–6:4; 1 Timoteus 5:8) Ounongo oo tau hangwa mOmbiibeli ohau kwafele nokuli nomaukwaneumbo oo oilyo yao i li momalongelokalunga a yoolokafana. (1 Petrus 3:1, 2) Natu ka taleni komatyekosha avamwe ovo vehe fi Eendombwedi, ndele ookaume kavo kopahombo ova ninga Eendombwedi daJehova.

•   Clauir, wokoBrazil, okwa ti: “Eedula detu hamano dotete, otwa li tu hole okutanguna notwa li hatu kala twe likenyenena. Ndele konima eshi Ivete a ninga Ondombwedi yaJehova, okwa li he lididimike nomunahole. Omalunduluko oo a ninga okwa kwafela ohombo yetu iha teke.”

•   Agness, wokoZambia, okwa ti: “Eshi omushamane wange, Chansa, a hovela okukonakona Ombiibeli nEendombwedi daJehova, onda li ndi li omhinge naye, molwaashi onda li handi diladila kutya ohadi tukula omaukwaneumbo. Ndele lwanima, onda ka mona kutya Ombiibeli oya kwafela ohombo yetu i kale i li xwepo.”

 Moilonga yetu yokuudifa, ohatu ulikile ovanhu omayele oo taa hangwa mOmbiibeli, oo tae va kwafele nghee ve na

•   okuhoolola pandunge ookaume kopahombo

•   okuungaunga nomashongo omohombo odula yotete

•   okuungaunga nooshuwala, ooinamweno nooxemweno

•   okukwata nawa oimaliwa

•   okuhenuka okutanguna

•   okukala hava diminafana po

•   okutekula ounona

 Omafimbo amwe, otashi dulika shi kale ngaho. Pashihopaenenwa, olaporta imwe i na sha nomakonakono, oo a ningilwe mo 1998 kehangano ledina Sofres, oya ti kutya meehombo 20, omo kaume umwe kopahombo e li Ondombwedi, imwe aike ya li i na omaupyakadi a kwata moiti.

 Jesus okwa li a xunganeka kutya ovo tava shikula omahongo aye oshi na oupu va patanekwe koilyo yomaukwaneumbo avo. (Mateus 10:32-36) Omunandjokonona Will Durant okwa ti kutya eshi Roma sha li epangelo enaenghono, “Ovakriste ova li va lundilwa kutya ohava teya po omaukwaneumbo.” a Nokunena, Eendombwedi daJehova osho handi lundilwa ngaho. Ndele mbela osho osha hala kutya Eendombwedi ohadi tukula omaukwaneumbo?

 Eshi Omhangu yOufemba wOmunhu yaEuropa ya konakona omalundilo oo kutya Eendombwedi daJehova ohadi teya po omaukwaneumbo, oya mona kutya oilyo youkwaneumbo, oyo ihe fi Eendombwedi, oyo hai etifa okuhaudafana mokwaanya “okutambula ko nokufimaneka emanguluko lado loshiyeleke lopalongelokalunga lokuninga oinima oyo i li metwokumwe nelongelokalunga lado.” Omhangu oya weda ko tai ti: “Onghalo oyo ohai holoka konyala meehombo adishe omo ovalihomboli ve li momalongelokalunga a yoolokafana, ndele hameehombo ashike omo kaume umwe kopahombo e li Ondombwedi yaJehova.” b Nonande Eendombwedi daJehova odi ungaungiwe nado nai omolwelongelokalunga lado, ohadi dulika komayele Ombiibeli oo taa ti: “Inamu alulila omunhu owii. . . . Ningeni ngaashi tamu dulu opo mu kale nombili novanhu aveshe.” — Ovaroma 12:17, 18.

 Eendombwedi ohadi dulika kelombwelo lOmbiibeli ‘lokuhombola ashike mOmwene,’ sha hala okutya okuhombola omunhu weitavelo lado. (1 Ovakorinto 7:39) Osho oshiteelelwa shopaMbiibeli noshi na ouwa. Pashihopaenenwa, oshishangomwa shedina Journal of Marriage and Family, shomo 2010, osha li shi na oshitukulwa osho sha ti kutya “ovalihomboli ovo ve li melongelokalunga limwe, ve na eitavelo limwe nohava kufa ombinga momalipyakidilo opalongelokalunga a faafana,” ohava kala ve na ekwatafano liwa. c

 Ashike Eendombwedi ihadi ladipika ovanhu veitavelo lado va efe po ookaume kavo kopahombo, ovo vehe fi Eendombwedi. Ombiibeli oya ti: “Ngeenge ope na omumwatate e na omukulukadi ehe fi omwiitaveli, ndele omukulukadi okwa dimina a kale naye, ine mu efa po. Ngeenge ope na omukulukadi e na omushamane ehe fi omwiitaveli, ndele omushamane okwa dimina okukala naye, ine mu efa po.” (1 Ovakorinto 7:12, 13) Eendombwedi daJehova ohadi dulika koshipango osho.