Eudeko la puka: Eendombwedi inadi itavela mouhaku wopaunamiti.

 Oshili: Ohatu kongo ouhaku wopaunamiti oo muwa, wetu vene nosho yo womaukwaneumbo etu. Ngeenge hatu yahama, ohatu i keendokotola odo di na owino wokuhakula nowokutanda nopehe na okulongifa ohonde. Ohatu pandula yo exumokomesho olo tali ningwa moinima yopaunamiti. Ouhaku oo inau kwatela mo okutulwa ohonde oo wa li wa nuninwa ovanaudu vEendombwedi paife ohau kwafele nokuli naavo vehe fi Eendombwedi. Moilongo ihapu, omunaudu keshe ota dulu okutokola okuhatulwa ohonde opo a henuke oilanduliko oyo hai etifwa kokutulwa ohonde, ngaashi omikifi odo hadi tandavele okupitila mohonde, okukondja kwovakwaita volutu nosho yo omapuko oo haa dulu okuningwa po.

 Eudeko la puka: Eendombwedi daJehova oda itavela kutya eitavelo olo tali velula omunaudu.

 Oshili: Ihatu hongo ovanhu kutya eitavelo olo tali va velula.

 Eudeko la puka: Ouhaku oo inau kwatela mo etulwohonde ou na unene ondilo.

 Oshili: Ouhaku oo inau kwatela mo etulwohonde ou na ombilixa. a

 Oipupulu: Eendombwedi dihapu, mwa kwatelwa ounona, ohadi fi omudo keshe omolwokwaanya okutulwa ohonde.

 Oshili: Epopyo olo kali li li nandenande paushili. Ovatandi luhapu ohava dulu okutanda omatando a kitakana nopehe na etolwohonde, ngaashi etando lomutima, etando olo la kwatela mo omakipa nosho yo okutulwa oshilyo shimwe sholutu lemakipa. b Luhapu Ovanaudu, mwa kwatelwa ounona, ovo ihava tulwa ohonde navo ohava veluka nawa ile shi dulika nokuli ovo va tulwa ohonde. c Kakele kaasho, kape na oo ta dulu okupopya noushili kutya omunaudu ota fi ngeenge okwa anye okutulwa ohonde ile kutya shimha a tulwa ohonde ota kala nomwenyo.

 Osho oshinima shi na sha nelongelokalunga ndele kashi na sha nounamiti. Etestamenti Likulu nosho yo Lipe okwe tu londwela tu lidilike ohonde. (Genesis 9:4; Leviticus 17:10; Deuteronomion 12:23; Oilonga 15:28, 29) Shimwe vali, Kalunga ohonde okwe i tala ko kutya oi lile po omwenyo. (Leviticus 17:14) Onghee hano, ihatu henuka ashike okutulwa ohonde omolwokudulika kuKalunga ndele omolwaashi otwe mu fimaneka yo e li Omuyandjimwenyo.

 Pomhito imwe, ovayakuli vopounamiti ova li va tala ko omikalo odo tadi dulu okulongifa opo ku henukwe etulwohonde, odo hadi ifanwa yo ouhaku inau kwatela mo etulwohonde, di li oshinima sha nyika oshiponga, tadi etifa nokuli efyo, ashike va li va lundulula omataleko avo omido opo da di ko. Pashihopaenenwa, mo 2004, oshitukulwa shimwe osho sha li sha nyanyangidwa moshifo shehongo lopaunamiti osha ti kutya, “omikalo dimwe odo hadi longifwa nelalakano lokukwafela ovanaudu vEendombwedi daJehova odo unene tadi ka longifa meedula dokomesho.” d Mo 2010, oshitukulwa shimwe osho shi li moshifo shedina Heart, Lung and Circulation osha ti kutya “Eendombwedi daJehova hado adike di na okukala tadi ‘tandwa nopehe na okutulwa ohonde’ ndele nashi kale oshinima hashi ningwa alushe ngeenge pe na oo ta tandwa.”

 Eendokotola omayovi paife ohadi longifa omilandu dopaunamiti dokukwafela omunaudu aha kanife ohonde ngeenge tadi tande omatando a kitakana nopehe na okutula omunaudu ohonde. Omilandu da tya ngaho ohadi longifwa nokuli nomoilongo oyo opo tai putuka nodi holike kovanaudu vahapu ovo vehe fi Eendombwedi daJehova.