Clodean, oo e li Ondombwedi yaJehova moSouth Africa, okwa li a tulwa meembete, opo a ka tandwe etando la kwata moiti. Okwa kala e na oupyakadi u na sha noukolele waye neendokotola onda kala hadi kendabala eenghedi dihapu opo ndi mu kwafele. Ofimbo ina tandwa nokonima yetando, okwa kala e udite ehe na eenghono, ouyehame noku kwetwe koshisho. Nokonima yoivike omulongo lwaapo eshi a alukila keumbo, okwa kala ta anye okutya po xwepo. Ka li ha dulu okutalelwa po omolwo-COVID-19.

 Clodean ka li a tula omutwe kepepe, ndele okwa li a pula Kalunga e mu pe eenghono, opo a dule okuhekeleka ovanhu vakwao. Diva ashike eshi a tya po xwepo, okwa li a kwatafana nomushiinda shaye womukainhu, oo a li nale ha konakona Ombiibeli nEendombwedi. Clodean okwa li a kundafana naye omushangwa wetwomukumo okudja mEendjovo daKalunga, naasho oshe linyengifa omukainhu oo a kale vali a hala okukonakona. Clodean okwa li yo e mu lombwela omauwa oo ta ka mona, ngeenge okwa kala ha kala pokwoongala kwopaKriste. Opo nee okwa li a kwafela omukonakoni waye a kale ta konekta kokwoongala kweongalo lomoshitukulwa. Omukainhu oo okwa kala ha kala pokwoongala noha kufa ombinga moitukulwa yomapulo nomanyamukulo.

 Clodean okwa ka popya vali nomumwainakadona womukonakoni waye, oo a li a halelela okukonakona Ombiibeli. Okwa lombwela Clodean kombinga yavamwe ovo tashi dulika navo ve na ohokwe mOmbiibeli. Oshidjemo? Clodean okwa hovela okukonakona Ombiibeli novakainhu vali vane. Clodean oku na oimoniwa ihapu itunhula.

 Molwaashi Clodean oha lalakanene ouwa wavakwao, okwa kala ha konakona Ombiibeli novakainhu omulongo vali va wedwa po, nokungaho okwa ka kala e na ovakonakonimbiibeli 16 pefimbo e li lomukifi wekomba. Vamwe ohava konekta pandjikilile kokwoongala. Eshi Clodean e lipyakidila noinima yopamhepo ohashi mu kwafela aha kale te lipula nonghalo yaye. Okuudite kutya molwaashi Jehova, ‘oKalunga kehekeleko alishe,’ okwe mu hekeleka eshi a li momayeleko. Clodean okwa dula yo okuhekeleka vakwao. — 2 Ovakorinto 1:3, 4.

 Ovakonakoni vaClodean ove uditile ngahelipi osho tave lihongo? Umwe vomuvo okwa ti: “Onda mona ouwa meenghedi dihapu. Ndele eshi sha fimana osheshi nde lihonga kombinga yedina laKalunga. Osho osha kwafela nge ndi ehene popepi naJehova.” Omukainhu oo a popiwa naye kuClodean oshikando shotete ota ninginifwa mafiku. Oimoniwa oyo oya etela neenghono Clodean ehafo. Oshihafifa yo eshi a veluka.