Onda dalelwa modoolopa yaCalgary moAlberta, moCanada. Eshi nda li okahanana, ovadali vange ova teya ohombo, opo nee ame nameme otwa tembukila meumbo latatekulu nameekulu. Tatekulu nameekulu ova li ve tu hole fye nameme, nonda li handi kala nda hafa neenghono, eshi nda li okaana. Natango, ohandi dimbuluka omafimbo mawa okounona.

 Eshi nda li ndi na omido heyali, onghalamwenyo yange oya ka lundulukila kowii, konima eshi meme natate va ka hombolulula notwa li twa tembukila koSt. Louis, Missouri, moUnited States. Onda ka didilika kutya tate okwa li omukwanyanya. Pashihopaenenwa, efiku lotete, eshi nda dja kofikola oko nda ka tameka, okwa li a uda kutya onda li nda shindwa nokanda li nda lwa naao a shinda nge. Okwa li a handuka neenghono nokwa li a denga nge nda yahama! Osho osha li sha ningifa nge ndi kale handi lwifa ounona vakwetu, nonda li nda ya molwoodi oshikando shange shotete, eshi nda li ndi na eedula heyali.

 Elihumbato lii latate ola li la handukifa neenghono meme, naluhapu ova li hava kala tava tanguna. Eshi nda li ndi na eedula 11, onda li nda hovela okulongifa oingangamifi nokunwa oikunwa yoalkoholi. Onda li nda ninga omuhandunhu naluhapu onda li handi lwifa ovanhu momapandavanda. Eshi nda mana ofikola elihumbato lange ola li la pimbila neenghono.

 Onda li nda waimina etangakwaita lomomeva laUnited States, eshi nda wanifa eedula 18. Onda li nda pewa edeulo olo la li la hanyeka neenghono ehandu lange, nonda li nda deulilwa okudipaa ovanhu vakwetu. Konima yeedula nhano, onda li nda fiya po oukwaita, opo ndi ke lihongele okukonakona omadiladilo ovanhu, molwaashi onda li nda hala okuninga omupolifi wokukonakona oikoya oyo ya kitakana (FBI). Onde ke lihonga kounivesiti moUnited States, nolwanima onda ka tembukila koCanada oko nda ka twikila nehongo lange.

 Eshi nda li kounivesiti, onda li handi kala nda lulilwa neenghono kovanhu. Ovanhu ova li tava monika va fa ve lihole vo vene, keshe shimwe osha li tashi monika sha fa shihe na oshilonga nokanda li ndi wete ngeenge omaupyakadi ovanhu otaa dulu okukandulwa po. Onda li nda teka omukumo.

 Molwaashi kanda li nde litulila po omalalakano monghalamwenyo, onda li nda hovela okunwa oikunwa yoalkoholi sha pitilila, okulongifa oingangamifi, okulikongela oimaliwa nosho yo okuya momilele. Onda li ashike nda lambalala ouvilo nosho yo ovakainhu. Edeulo olo nda mona moukwaita ola ningifa nge ndi kale handi i luhapu momalwoodi. Onda li handi likufile oveta momake ange mwene nokukatukila onghatu ovo ndi wete tava ungaunga navakwao shihe li pauyuki. Oushili oyoo kutya onda li nda ninga omupika wominyonena.

 Efiku limwe, ame nakaume kange otwa li hatu longifa oingangamifi nokulongekida epangwe, olo twa li hatu ka landifa, opo nee okwa pula nge, ngeenge onda itavela muKalunga. Onde mu nyamukula nda ti, “Ngeenge Kalunga oye ha etifa okumona oixuna mounyuni ou, inandi hala oku mu shiiva!” Efiku la shikula ko, olo la li efiku lotete koilonga yange ipe, umwe oo twa li hatu longo pamwe naye, oo a li Ondombwedi yaJehova, okwa pula nge ta ti, “Mbela Kalunga oye he tu etele okumona oixuna?” Epulo olo ola li pefimbo nonda li nda hala okushiiva shihapu shi na sha naasho. Oule weemwedi hamano da ka shikula ko, otwa kala hatu kundafana nokwa nyamukula omapulo mahapu oo nda li ndi na, ta longifa Ombiibeli.

 Okakadona kange oko nda li handi di pamwe nako, kaka li ke hole okupwilikina kwaasho handi lihongo. Osoondaxa imwe okwa li nde ka lombwela kutya onda shiva Eendombwedi di uye di konakone Ombiibeli nafye. Ngomongula, eshi nda ka dimbuka koilonga onda hanga ka ya noka tuta po eumbo alishe. Onda li nda ya pondje nonda lila neenghono. Onda li yo nda ilikana kuKalunga, opo a kwafele nge. Osho osha li oshikando shotete nda longifa edina laKalunga, Jehova, meilikano lange. — Epsalme 83:18, NWT.

 Konima yomafiku avali, onda li nda hovela okukonakona Ombiibeli novalihomboli, ovo ve li Eendombwedi. Konima eshi va ya onda hovela okulesha embo Ove oto Dulu Okukala nOmwenyo Fiyo Alushe mOparadisa kombada yEdu, nonda li nde li mana ko oufiku oo. a Osho nde lihonga kombinga yaJehova Kalunga nosho yo omona waye Jesus Kristus, osha kuma omutima wange. Onde lihonga kutya Jehova omunalukeno noha udu nai, ngeenge hatu mono oixuna. (Jesaja 63:9) Onda li nda kumwa neenghono konghedi omo Jehova a ulikila nge ohole, eshi a yamba po Omona waye ponhele yange. (1 Johannes 4:10) Onda li nda tomhwa kutya Jehova okwa kala nokulididimikila nge, molwaashi “ina hala nande oumwe a hanaunwe po, ndele okwa hala ovanhu aveshe ve lidilulule.” (2 Petrus 3:9) Onda li ndi udite kutya Jehova okwa hala ndi ninge kaume kaye. — Johannes 6:44.

 Onda li nda hovela okwoongala oshivike keshe. Onda li ndi na eexwiki dile, ndi na outenda momatwi nonda li ndi na eholokepo litilifi, ashike nande ongaho Eendombwedi oda li hadi ungaunga naame pahole. Ova li lela have lihumbata ngaashi Ovakriste vashili. Onda li handi kala ndi udite nda fa ndi li natatekulu nameekulu, tu li monhele i yadi ombili.

 Osho nda li handi lihongo mOmbiibeli osha li sha hovela okulundulula onghalamwenyo yange. Onda li nda kululwa, nda efa po elihumbato inali koshoka nosho yo okulongifa oingangamifi nonda efa po okunwa sha pitilila. (1 Ovakorinto 6:9, 10; 11:14) Onda li nda hala okuhafifa Jehova. Ngeenge nde lihonga kombinga yoshinima shonhumba osho ina hokwa, kanda li handi ningi omalipopilo. Osha li hashi kumu nge komutima. Onda li handi lipopile handi ti: ‘Onda pumbwa okweefa po okulihumbata monghedi ei.’ Onda li handi katuka diva, opo ndi lundulule omadiladilo neenghatu dange. Mokweendela ko kwefimbo, onda ka mona kutya oshi na ouwa okushikula ewiliko laJehova. Mo 29 Juli 1989, onda li nda ninginifwa ndi li Ondombwedi yaJehova, konima yeemwedi hamano, eshi nda hovela okukonakona.

 Ombiibeli oya kwafela nge ndi lundulule omaukwatya ange. Nale, ngeenge nda shindwa komunhu onda li handi ungaunga naye nonyanya. Ashike paife ohandi kendabala okukala “nombili novanhu aveshe.” (Ovaroma 12:18) Inandi dula okuninga omalunduluko oo keenghono dange mwene, ndele ohandi pandula Jehova, omolwEendjovo daye nosho yo omhepo iyapuki oyo ya kwafela nge ndi kale omunhu e li xwepo. — Ovagalati 5:22, 23; Ovaheberi 4:12.

 Paife ohandi kendabala okuhafifa Jehova Kalunga noku mu pa osho sha denga mbada, ponhele yokukala omupika woingangamifi, welongifo leenghono nosho yo wokukala nelihumbato inali koshoka. Osho osha kwatela mo okukwafela vamwe ve mu shiive. Konima yomido dinini, eshi nda ningifwa onda li nda tembukila koshitukulwa oko kwa li ku na omhumbwe inene yovaudifi. Oule womido, onda kala handi hafele okuhonga vamwe nokumona nghee Ombiibeli tai lundulula onghalamwenyo yavo. Onda tunhukwa, molwaashi meme naye okwa ninga Ondombwedi yaJehova noshinima shimwe osho she mu kwafela osheshi a mona nghee nda ninga omalunduluko monghalamwenyo yange.

 Mo 1999, onda li nda mana edeulo lange kOfikola yOvaudifi vOuhamba mo El Salvador. Kofikola oko onda li nda mona edeulo, opo ndi dule okukwatela komesho oilonga yokuudifa, okuhonga nokupashukila eongalo. Momudo oo tuu oo, onda ka hombola omukulukadi wange omuholike, Eugenia. Paife ohatu longo pamwe moilonga yefimbo li yadi moGuatemala.

 Paife, ponhele yokukala alushe nda lulilwa, ohandi kala nda hafa neenghono. Okutula moilonga omahongo Ombiibeli okwa kwafela nge ndi efe po elihumbato inali koshoka nosho yo elongifo leenghono nosha kwafela nge ndi kale omunahole nomunambili.