Onda dalelwa moSan Juan Chancalaito, okadoolopa kanini moshikandjo shaChiapas, Mexico. Oukwaneumbo wetu owa dja momuhoko wOvachol, oludi lOvamaya. Ovadali vange ove na ounona 12; aame omutitano. Eshi nda li okaana, ame novamwaina vange otwa li hatu konakona Ombiibeli nEendombwedi daJehova. Shinyikifa oluhodi, kanda li nda tula moilonga omayele Ombiibeli ofimbo nda li omunyasha.

Eshi nda li ndi nomido 13, onda hovela okulongifa oingangamifi nokuvaka. Onda dja mo meumbo nonda kala handi di meenhele di lili noku lili. Eshi nda li ndi nomido 16, onda hovela okulonga moshikunino shoingangamifi. Konima yodula eshi nda kala handi longo omo, oufiku umwe otwa li twa ponokelwa kovalumenhu vongudu imwe yokulonga ominyonena va homata ofimbo twa li hatu tumu oingangamifi nombautu. Onda li nda dula okuxupa eshi nda nhukila momulonga nokuyowa ndele handi ka mbadukila kokule. Konima yaasho, onda ya onhapo ko-United States.

Ofimbo nda li oko, onda twikila okweeta moshilongo oingangamifi nonde ke lihanga monghalo idjuu. Pepupi lomido 19, onda li nda kwatwa po nokutulwa modolongo, handi tamanekelwa oshibofa shokunyeka nonghendabala yedipao. Ofimbo nda li modolongo, onda waimina ongudu yokulonga ominyonena nokutwikila okulonga ominyonena dihapu. Oshidjemo, onda li nda twalwa kodolongo ya kula koLewisburg, shaPennsylvania.

Modolongo yaLewisburg, elihumbato lange ola ka naipala ashike. Molwaashi onda li ndi na nale ee-tattoo dongudu, onda li nda waimina diva ongudu omo nda li nale. Onda li handi tukula luhapu ouxwapindi, nonda li handi i momalwoodi lwoikando. Oshikando shimwe ongudu yetu oya li tai lu nongudu imwe. Opa li tapa ti pwaka fiku olo; otwa li hatu lidenge hatu longifa oiti yokudanifa oudano wo-baseball nosho yo oitenda yokuninga omadeulo. Ovapolifi ova li ve tu pombela ohaasa opo ve tu hangukunune. Konima yaasho, onda li nda tulwa mokanduda ke likalekelwa omo hamu tulwa ovanadolongo ovo va nyika oshiponga. Onda li ndi na ehandu lii nonda li handi longifa elaka la honga. Osha li shipu kwaame okudenga vamwe. Paulelalela, onda li handi shi hafele. Kanda li ndi na apa ndi udite nandenande.

Konyala, onda li handi kala mokanduda oko efiku alishe, onghee onda hovela okulesha Ombiibeli opo efimbo li endelele. Lwanima, omupolifi umwe okwa pa nge okambo Ove oto Dulu Okukala nOmwenyo Fiyo Alushe mOparadisa kombada yEdu. a Eshi nda li handi ka lesha, onda dimbuluka oinima ihapu oyo nde lihonga eshi nda li okaana ofimbo nda li handi konakona nEendombwedi. Onghee onda hovela okudiladila kunghee onghalamwenyo yange ya naipala omolwelongifo leenghono. Onda hovela yo okudiladila kombinga youkwaneumbo wetu. Molwaashi ovamwamemekadona vavali ova ninga Eendombwedi daJehova, onde lipopila nda ti, ‘Vo otava ka kala nomwenyo fiyo alushe.’ Opo nee onde lipula nda ti, ‘Omolwashike ame itandi dulu oku ka mona omwenyo waalushe?’ Opo opo nda dja nda tokola okuninga omalunduluko.

Ndele nande ongaho, onda li ndi shii kutya onda pumbwa ekwafo opo ndi ninge omalunduluko. Tete, onda ilikana kuJehova Kalunga noku mu pula a kwafele nge. Opo nee onda shangela koshitaimbelewa shEendombwedi daJehova moUnited States handi pula ekonakonombiibeli. Oshitaimbelewa osha li sha unganeka eongalo limwe olo li li popepi opo li kwatafane naame. Pefimbo opo kanda li nda pitikwa okutalelwa po kwaavo vehe fi ovapambele, onghee Ondombwedi imwe oya hovela okutumina nge eenhumwafo tadi tu omukumo nosho yo oishangomwa yopaMbiibeli, naasho osha ningifa nge ndi kale nda halelela okuninga omalunduluko.

Onda katuka onghatu inene eshi nda tokola okufiya po ongudu omo nda kala oule womido dihapu. Omukulunhu wongudu naye okwa li mokanduda ke likalekelwa, onghee onda ya kuye pefimbo lefudepo ndele handi mu lombwele kutya onda hala okuninga Ondombwedi yaJehova. Shikumwifi, okwa ti: “Ngeenge owa tokola, shi ninga. Itandi dulu okuya pokati koye naKalunga. Ndele ngeenge oto di mo ashike ngahenya, ou shii oilanduliko.”

Momukokomoko womido mbali, ovapolifi ova ka didilika kutya onda ninga omalunduluko. Oshidjemo, ova ka kala hava ungaunga nawa naame. Pashihopaenenwa, kanda li vali handi tulwa moiketanga ngeenge handi ke likosha. Umwe womovapolifi okwe uya kwaame ndele ta ladipike ndi twikile okuninga omalunduluko. Modula yange yaxuuninwa mokanduda oko ke likalekelwa, onda li nda kufwa mo ndele handi lundululilwa keenduda daavo inava nyika oshiponga. Mo 2004, konima eshi nda kala modolongo oule womido omulongo, onda li nda mangululwa ndele handi shunifwa koMexico nobesa yovanadolongo.

Diva eshi nda fika moMexico, onda ka konga Olupale lOuhamba. Oshikando shotete nda ya kokwoongala, onda li nda djala oikutu yange yomodolongo molwaashi oyo ashike nda li ndi na yokuya nayo pokati kovanhu. Eendombwedi oda li da tambula nge ko nohamu nonande onda li nda djala monghedi oyo. Eshi va kenukila nge, onda mona kutya ondi li mokati kOvakriste vashili. (Johannes 13:35) Pokwoongala oko, ovakulunhuongalo ova li va unganeka opo ndi konakone Ombiibeli. Konima yomudo umwe, onda ka ninginifwa ndi li Ondombwedi yaJehova mo 3 Septemba 2005.

MuJanuali 2007, onda hovela okukokola ondjila, nonda li handi longo eevili 70 omwedi keshe, handi hongo vamwe Ombiibeli. Mo 2011, onda li kOfikola yOmbiibeli yOkudeula Ovamwatate Inava Hombola (oyo paife hai ifanwa Ofikola yOvaudifi vOuhamba). Ofikola oyo oya kwafela nge ndi wanife po oinakuwanifwa yange meongalo.

Mo 2013, onda hombola omukulukadi wange omuholike, Pilar. Oha ningi omashendjo kutya oshidjuu okwiitavela osho handi mu lombwele shi na sha nonakudiwa yange. Inandi shuna tuu vali koinima oyo nda fiya po. Mokutala koshihopaenenwa shange, ame nomukulukadi wange otwa tomhwa kutya Ombiibeli oyo ashike i na eenghono dokulundulula eenghalamwenyo dovanhu. — Ovaroma 12:2.

Ondi udite kutya eendjovo daJesus odo di li muLukas 19:10 oda yukifwa kwaame. Jesus okwa ti: ‘Onde uya okukonga nokuxupifa ovo va kana.’ Paife nghi li vali mekano. Ihandi longele vali ovanhu ominyonena. Omolwekwafo lOmbiibeli, onghalamwenyo yange oi na eityo, ohandi ungaunga navamwe nombili, nokomesho yaaishe, ondi na ekwatafano liwa nOmushiti wange, Jehova.