Onda dalelwa moMontreal, oshilando shinene moCanada, moshitukulwa shaQuebec. Ame novamwameme vatatu otwa tekulwa kovadali ovanahole momukunda wedina Rosemont. Otwa li hatu hafele okukala pamwe neenghono.

Eshi nda li okamatyona, onda li ndi hole okulesha Ombiibeli. Ohandi dimbuluka handi lesha mEtestamenti Lipe kombinga yonghalamwenyo yaJesus ofimbo nda li ndi na omido 12, nonda li nde shi hafela lela. Ohole nolukeno laye oya li ye linyengifa nge ndi mu hopaenene. Shinyikifa oluhodi, eshi nda enda handi kulu, ehalo olo ola ka enda tali kana mo mwaame molwaashi onda li hovela okukala nookaume vai.

Tate okwa li ha shiki eengalo, onghee okwa li a pa nge oishikomwa yaye nokuladipika nge ndi kale nda lenga eifano lokushika eengalo monghalamwenyo yange. Onda li handi hafele omusika neenghono, nomokweendela ko kwefimbo onde ke lihonga okudenga oshiketala. Lwanima, onda ka tota po ongudu yokushika eengalo hadi weelele notwa li hatu imbi poiningwanima yomomudingonoko wetu. Mokweendela ko kwefimbo, otwa li twa ifanwa kovashiivinawa veemusika. Otwa ninga eudafanotwokumwe nokaambani yavo. Eengalo dange oda ka shiivika nawa momudingonoko noda li hadi danwa luhapu koradio moQuebec.

Onda li ndi wete ndi na oinima aishe oyo nda li nda pumbwa. Onda li omunyasha, nda shiivika apeshe nonda li handi mono oimaliwa ihapu mokudana eengalo. Omutenya ohandi uhala handi ningi omadeulo, handi i komapulapulo nokuyandja ouyelele muhapu kombinga yange nokuulikwa ko-tv. Konguloshi onda li handi ka dana eengalo nokuya koivilo. Opo ndiha kale nda tila ovanhu, onda li handi nu omalodu nolwanima onda ka hovela okulongifa oingangamifi. Onda li ndi na onghalamwenyo inai koshoka nonda li handi ningi keshe osho nda hala.

Vamwe ova li va twila nge ondubo molwaashi onda li handi monika nda fa nda hafa. Ashike onda li ndi udite ndihe na oshilonga, unene tuu ngeenge ndi li aame andike. Onda li handi kala nda polimana nondi na oisho. Ofimbo nda li handi shi endifa nawa, vakwetu vavali ovo nda li handi longo navo ova fya ko-AIDS. Onda li nda kumwa neenghono! Nonande onda li ndi hole omusika, osha li sha etelela oinima ihapu itondifa.

Nonande onda li nda pondola, onda li ndi wete kutya ope na sha puka mounyuni. Omolwashike pe na okuhenouyuki kuhapu? Onda li handi lipula kutya omolwashike Kalunga ita katuka onghatu. Onda li nokuli handi ilikana kuKalunga, handi kongo enyamukulo. Ofimbo nda li mefudo, onda ka hovela vali okulesha Ombiibeli. Nonande kanda li ndi udite ko lela osho nda li handi lesha, onda li nda fika pexulifodiladilo kutya exulilo lounyuni oli li popepi.

Onda lesha mOmbiibeli kutya pomhito imwe Jesus okwa li e lidilika oikulya oule womafiku 40 ofimbo a li mombuwa. (Mateus 4:1, 2) Onda li nda tokola kutya naame ohandi lidilike, pamwe Kalunga te lihololele nge. Ofimbo kwa li ashike oivike ivali opo ndi lidilike, Eendombwedi daJehova mbali oda li da konghola peumbo lange, nonda li nde di shiva di uye mo, nda fa ngeno nda li nde di teelela. Onda tala nawa umwe womEendombwedi odo wedina Jacques momesho ndele handi mu pula nda ti, “Ongahelipi hatu dulu okushiiva kutya otu li momafiku axuuninwa?” Okwa kufa Ombiibeli yaye, ndele ta leshele nge 2 Timoteus 3:​1-5. Onda li nde va pula omapulo mahapu nonda li nda kuminwa omanyamukulo avo oo a li taa ti sha nokwa li a kanghamena alushe kOmishangwa. Konima eshi va kala tava talele nge po, onda ka mona kutya inandi pumbwa okulidilika.

Onda li nda hovela okukonakona Ombiibeli nEendombwedi pandjikilile. Mokweendela ko kwefimbo, onda kulula ko eexwiki dange dile noku hovela okuya komakwoongala aeshe kOlupale lOuhamba. Molwaashi onda li handi tambulwa ko nohamu komakwoongala a tya ngaho, osho osha li sha tomha nge kutya onda mona oshili.

Opo ndi tule moilonga osho nda li handi lihongo pekonakonombiibeli lange, onda li ndi na okuninga omalunduluko manene monghalamwenyo yange. Shotete, onda li ndi na okweefa po okulongifa oingangamifi nosho yo onghalamwenyo inai koshoka. Shikwao vali, onda li ndi na okweefa po okukala ndi lihole mwene nokukala ndi na ko nasha navamwe. Ndi li omudali handi tekula ounona ame andike, onda li ndi na oku va kwafela pamhepo nopamadiladilo. Onda li nda efa po okushika eengalo ndele handi kongo oilonga yomofabrika ihai futu naanaa nawa

Kasha li shipu okuninga omalunduluko aeshe oo. Eshi nda li handi kondjifa okweefa okulongifa oingangamifi, onda li handi lihange omafimbo amwe handi i longifa vali. (Ovaroma 7:19, 21-24) Okweefa po onghalamwenyo yange inai koshoka osha li shidjuu neenghono. Oilonga yange ipe oya li i lolola nonda li handi futwa koxulo yeenyala. Ofuto oyo handi mono meemwedi nhatu onda li handi i mono ashike moule weevili mbali eshi nda li handi shiki eengalo.

Eilikano ola kwafela nge ndi twikile okuninga omalunduluko meenghalo odo didjuu. Onda mona yo kutya okulesha Ombiibeli pandjikilile osha fimana. Ope na omishangwa dokondadalunde odo da twa nge omukumo. Umwe ongaashi 2 Ovakorinto 7:1, ovo tava ladipike Ovakriste ve ‘likoshe kedilo keshe naali lombelela naali lomhepo.’ Omushangwa umwe oo wa kwafela nge opo ndi mone kutya ohandi dulu okweefa po eenghedi odo dii, Ovafilippi 4:13 ovo tava ti: “Aishe ohandi i dulu omolwaKristus, ou ta pameke nge.” Jehova Kalunga okwa nyamukula omailikano ange nokwa kwafela nge ndi ude ko nondi tule moilonga osho nde lihonga mOmbiibeli. Osho oshe linyengifa nge ndi liyapulile Jehova. (1 Petrus 4:1, 2) Onda ninginifwa mo 1997.

Onda tomhwa kutya ngeno onda twikilile nokukalamwenyo kwange konale, ngeno onda fya nale. Paife ohandi hafele onghalamwenyo ya denga mbada kuhe na vali! Omukulukadi wange Elvie okwa kwafela nge neenghono. Ohatu hafele pamwe okuhonga vamwe kombinga yOmbiibeli tu li ovakokolindjila. Osho ohashi etele nge ehafo nonda wanenwa. Onda pandula Jehova eshi a nanena nge kuye. — Johannes 6:44.