Shiiva osho hashi ningwa pokwoongala kwetu. Konga onhele yokwoongala oyo i li popepi naave.

Eendombwedi daJehova ohadi ningi okwoongala kwopalongelokalunga luvali moshivike. (Ovaheberi 10:24, 25) Pokwoongala oko, ohatu konakona Ombibeli nokukundafana kombinga yanghee hatu dulu okutula moilonga osho Ombibeli tai hongo. Ovanhu aveshe ova manguluka okuuya kokwoongala kwetu kwa tya ngaho.

Oitukulwa ihapu yokwoongala ohai kala ya kwatela mo eenghundafana novapwilikini, sha hala kutya, oo ta kwatele komesho oha pula omapulo, vo ovapwilikini tave a nyamukula. Omatyekosha ohaa yandjwa nehalo liwa. Ohatu hovele nokuxulifa okwoongala kwetu neimbilo nosho yo eilikano.

Nonande ku fi Ondombwedi yaJehova, kala wa manguluka okuuya kokwoongala kwetu. Ohatu shivi ovanhu ve uye pamwe nafye kokwoongala kwetu. Ihatu pula ofuto yasha, noihaku umbwa ongalo.