Outumbulilo “Jerusalem Shipe” owa holoka mo luvali mOmbiibeli, nou li oshilando shopafaneko osho tashi ulike kongudu yovashikuli vaJesus ovo tava i meulu opo va ka pangele pamwe naye mOuhamba waKalunga. (Ehololo 3:12; 21:2) Ombiibeli otai ulike kutya ongudu oyo ohai ifanwa omuhombolwa waKristus.

1.   Jerusalem Shipe oshi li meulu. Efimbo keshe Ombiibeli ya tumbula Jerusalem Shipe, oya popya kutya otashi kuluka tashi di meulu, novaengeli ohava kala tava pashukile omivelo doshilando. (Ehololo 3:12; 21:2, 10, 12) Natango, ounene woshilando otau ulike kutya kashi li kombada yedu. Oshilando osho oshi fike “poupale 12 000” ile “oshinano” sheemeta 201.2. a (Ehololo 21:16; King James Version) Oshilando osho oshi na oule hanga weekilometa 560.

2.   Jerusalem Shipe oshi li ongudu yovashikuli vaJesus, omuhombolwa waKristus. Jerusalem Shipe ohashi ifanwa “omuhombolwa, omukainhu wOdjona.” (Ehololo 21:9, 10) Mefaneko eli, Odjona otai ulike kuJesus Kristus. (Johannes 1:29; Ehololo 5:12) “Omukainhu wOdjona,” omuhombolwa waKristus, ota ulike kOvakriste ovo tava ka hangana naJesus meulu. Ombiibeli oya faafanifa ekwatafano olo li li pokati kaJesus nOvakriste ovo nekwatafano olo hali kala pokati kovalihomboli. (2 Ovakorinto 11:2; Ovaefeso 5:23-25) Shikwao vali, Jerusalem Shipe osha tungwa po komakanghameno “omulongo naavali e nomadina omulongo naavali ovayapostoli omulongo navavali vOdjona.” (Ehololo 21:14) Ouyelele ou otau tu kwafele tu didilike mo Jerusalem Shipe, molwaashi Ovakriste ovo tava i meulu ova “tungilwa momukangha wovayapostoli nowovaxunganeki.” — Ovaefeso 2:20.

3.   Jerusalem Shipe oshi li oshitukulwa shepangelo. Pefimbo lonale, Jerusalem osha li oshilandopangelo shaIsrael, omo mwa li hamu kala ohamba David, omonamati waye Salomo nosho yo ovapangeli vakwao ovo ve mu shikula “kolukalwapangelo lOmwene.” (1 Omafimbo 29:23) Jerusalem, osho hashi ifanwa ‘oshilando shiyapuki,’ osha li shi lile po Ouhamba waKalunga oo wa li mepata laDavid. (Nehemia 11:1) Jerusalem Shipe nasho ohashi ifanwa “oshilando shiyapuki” nosha fikama po movanhu ovo tava ka waimina Jesus meulu “nokupangela kombada yedu” ve li eehamba. — Ehololo 5:9, 10; 21:2.

4.   Jerusalem Shipe osha etela ovanhu ovo ve li kombada yedu omanangeko noupuna. Eshi Jerusalem Shipe sha popiwa kutya ‘osha kuluka sha dja meulu kuKalunga,’ otashi ulike kutya Kalunga ote ke shi longifa mokuwapeka oinima. (Ehololo 21:2) Outumbulilo oo owa kwatakanifa Jerusalem Shipe nOuhamba waKalunga, oo Kalunga ta ka longifa mokuwanifa po ehalo laye “kombada yedu ngaashi yo meulu.” (Mateus 6:10) Elalakano laKalunga li na sha nomanangeko noupuna oo taa ka hafelwa kombada yedu ongaashi:

   •   Okukufa po oulunde filufilu. “Omulonga womeva omwenyo” otaa ka kunguluka okudja kuJerusalem Shipe nokuya ‘komuti womwenyo’ osho sha hala okutya “okuvelula oiwana.” (Ehololo 22:1, 2) Evelulo lopalutu nolopamhepo otali ka kufa po oulunde, nokudja opo ovanhu otava ka kala nomwenyo waalushe ngaashi sha li elalakano laKalunga lopehovelo. — Ovaroma 8:21.

   •   Ovanhu otava ka kala ve na ekwatafano liwa naKalunga. Oulunde owa tukula ko ovanhu kuKalunga. (Jesaja 59:2) Ngeenge oulunde owa hanaunwa po filufilu, osho otashi ka kala ewanifo lexunganeko olo tali ti: “Etwali laKalunga oli li povanhu, Oye ta tula puvo, vo otava ningi ovanhu vaye, Kalunga mwene ota kala pamwe navo, Kalunga kavo.” — Ehololo 21:3.

   •   Okumona oixuna nefyo otai ka xula po. Okupitila mOuhamba waye, Kalunga “ota [ka] feta po omahodi momesho avo, nefyo itali kala po vali ile oluhodi ile okulila ile ouyehame itau kala po vali, osheshi eshi shotete osha xula po.” — Ehololo 21:4.