Oshike u na okuninga po opo u kale nomwenyo fiyo alushe?

DANA

Enyamukulo lopaMbiibeli

Ombiibeli oya ti: “Ou ta longo ehalo laKalunga, oye ta kala alushe.” (1 Johannes 2:17) Kalunga okwa hala u ninge shike?

Lihonga kombinga yaKalunga nosho yo omona waye, Jesus. Jesus eshi a li ta ilikana kuKalunga okwe mu lombwela a ti: “Nomwenyo waalushe oo tuu ou, vo ve ku shiive, Oove auke Kalunga kashili, naau we mu tuma, Jesus Kristus.” (Johannes 17:3) Oshike sha kwatelwa ‘mokushiiva’ Kalunga nosho yo Jesus? Ohatu dulu oku va shiiva mokukala hatu konakona Ombiibeli nokutula moilonga osho twe lihonga. a Ombiibeli otai holola omadiladilo Omushiti wetu, Jehova Kalunga, oo e li Omuyandji womwenyo. (Oilonga 17:24, 25) Ombiibeli oye tu lombwela yo kombinga yomona waye, Jesus, oo a popiwa kutya oku “neendjovo domwenyo waalushe.” — Johannes 6:67-69.
Kala u na eitavelo mekuliloyambo laJesus. Jesus okwa li e uya kombada yedu “okuyakula nokuyandja omwenyo waye.” (Mateus 20:28) Ekuliloyambo laJesus ola yeululila ovanhu omhito yokukala nomwenyo fiyo alushe mOparadisa kombada yedu. b (Epsalme 37:29) Jesus okwa ti: “Osheshi osho Kalunga a kala e hole ounyuni, Oye a yandja Omona waye Ewifa, opo keshe ou te mu itavele aha kane, ndelenee a kale e nomwenyo waalushe.” (Johannes 3:16) Omushangwa oo otau ulike kutya otwa pumbwa okuninga shihapu ponhele yokukala ashike twa itavela muJesus. Otwa pumbwa ‘okuulika eitavelo’ letu mokukala metwokumwe nomahongo aye nosho yo nehalo laXe. — Mateus 7:21; Jakob 2:17.
Panga oukaume wopofingo naKalunga. Kalunga okwa hala tu ehene popepi naye notu pange oukaume naye. (Jakob 2:23; 4:8) Kalunga omukwaalushe. Ke na efiku a fye, nokwa hala ookaume kaye va kale nomwenyo fiyo alushe ngaashi ye. Okwa popya okupitila mEendjovo daye osho a halela aveshe ovo tave mu kongo a ti: “Omitima deni nadi kale nomwenyo fiyo alushe.” — Epsalme 22:26.

Omitotolombo di na sha nokukala nomwenyo fiyo alushe

Omutotolombo: Eenghendabala odo hadi ningwa kovanhu otadi ka eta omwenyo waalushe.

Oshili: Nonande eendokotola dimwe oda udaneka kutya otadi ka lelepeka eenghalamwenyo dovanhu, eenghendabala davo itadi ka eta omwenyo waalushe. Kalunga oye ashike te ke tu pa omwenyo waalushe molwaashi oye ‘ofifiya yomwenyo.’ (Epsalme 36:9) Okwa udaneka kutya ota ka “hanauna po efyo fiyo alushe” nokupa ovanhu ovadiinini omwenyo waalushe. — Jesaja 25:8; 1 Johannes 2:25.

Omutotolombo: Omihoko ashike dimwe odo tadi ka mona omwenyo waalushe.

Oshili: Kalunga ke na onhondo. Mepingafano naasho, “keshe ou he mu tila ndele ta diinine ouyuki, ote mu wapalele.” (Oilonga 10:34, 35) Ovanhu vomoiwana aishe, ovo hava dulika kuKalunga, otava ka mona omwenyo waalushe kashi na nee mbudi kutya ova dja momihoko nomomaputuko elipi.

Omutotolombo: Omwenyo waalushe itau ka kala u hafifa.

Oshili: Omwenyo waalushe ohatu ke u pewa kuKalunga, oo e tu hole nokwa hala tu kale twa hafa. (Jakob 1:17; 1 Johannes 4:8) Oku shii kutya opo tu kale twa hafa, otwa pumbwa oilonga ishambula. (Omuudifi 3:12) Kalunga okwa udaneka kutya ovo tava ka kala nomwenyo fiyo alushe kombada yedu otava ka kala va wanenwa, ve na oilonga tai ti sha oyo tai va etele ouwa pauhandimwe nosho yo ovaholike vavo. — Jesaja 65:22, 23.

Shikwao vali, ovo tava ka kala nomwenyo fiyo alushe kombada yetu otava ka twikila okulihonga kombinga yOmushiti wavo nosho yo eshito laye likumwifi. Kalunga okwa shita ovanhu ve na ehalo lokukala fiyo alushe nove lihonge kombinga yaye, noitava “koneke oshilonga osho Kalunga ta ningi kehovelo fiyo okexulilo.” (Omuudifi 3:10, 11) Onghee hano, ovo tava ka kala nomwenyo fiyo alushe otava ka kala ve na ehalo lokulihonga shihapu.

a Eendombwedi daJehova ohadi konakona novanhu Ombiibeli oshali. Tala okavidio Ekonakonombibeli ohali ningwa ngahelipi? opo u mone ouyelele muhapu.

b Tala oshitukulwa “Jesus Saves—How? [Nghee Jesus e tu xupifa]”