Okukala omuyapuki otashi ti okukala wa yela nouhe na oshipo. Oshitya shOshiheberi osho sha tolokwa “omuyapuki” osha dja koshitya tashi ti “yoolola.” Onghee hano, oshinima osho shiyapuki osha yooloka ko ile she likalekelwa, nohashi talika ngaho unene tuu ngeenge osha koshoka ile sha yela.

 Kalunga oye a shiya ko mouyapuki. Ombiibeli oya ti: “Pehe nomuyapuki ngaashi Omwene,” Jehova. a (1 Samuel 2:2) Onghee hano, Kalunga oye ashike ta dulu okutula po omifikamhango di na sha nokukala ovayapuki.

•   Eenhele diyapuki: Kalunga okwa lombwela Moses eshi a li poshixwa sheno sha tema a ti: “Onhele apa u li ofika oyo edu liyapuki.” — Exodus 3:2-5.

•   Oivilo iyapuki: Ovaisrael vopefimbo lonale ova li hava longele Jehova pandjikilile poivilo yopalongelokalunga hai ifanwa ‘oyoongalele iyapuki.’ — Leviticus 23:37.

•   Oinima iyapuki: Oinima oyo ya li hai longifwa nale motembeli yomuJerusalem oya li hai ifanwa ‘oinima iyapuki.’ (1 Eehamba 8:4) Oinima oyo iyapuki oya li i na okuungaungwa nayo nefimaneko, nonande yo vene hayo ya li i na okwiilikanwa. b

 Heeno. Kalunga okwa lombwela Ovakriste a ti:“Kaleni ovayapuki, osheshi Aame omuyapuki.” (1 Petrus 1:16) Oshoshili kutya ovanhu inava wanenena itava dulu okuwanifa po filufilu omifikamhango daKalunga di na sha nouyapuki. Ashike nande ongaho, ovanhu ovo hava dulika keemhango daKalunga douyuki otaku dulu okutiwa ‘ovayapuki, va wapalela Kalunga.’ (Ovaroma 12:1) Omunhu oo ha kendabala okukala omuyapuki ohe shi ulike okupitila meendjovo nomoilonga. Pashihopaenenwa, oha tula moilonga omayele Ombiibeli oo taa ti: “Eliyapulo leni, mu yepe oluhaelo,” nonokutya “nye mu ninge yo ovayapuki mokukala kweni akushe.” — 1 Ovatessaloniki 4:3; 1 Petrus 1:15.

 Heeno. Ngeenge omunhu okwa kala iha dulika vali komifikamhango daKalunga di na sha nelihumbato, osha yela kutya Kalunga ita ka tala ko vali omunhu a tya ngaho omuyapuki. Pashihopaenenwa, embo lOmbiibeli lOvaheberi ola shangelwa “ovamwatate ovayapuki,” ashike otali va londwele yo kutya otava dulu okukala ‘nomutima mwii uhe neitavelo ndele tava efa Kalunga omunamwenyo.’ — Ovaheberi 3:1, 12.

 Omutotolombo: Omunhu ota dulu okukala omuyapuki mokulidilika.

 Oshili: Omukriste ota dulu okuhoolola okukala ina hombolwa ile ina hombola, ndele okulikalela muko vene hako taku ningifa omunhu a kale omuyapuki koshipala shaKalunga. Oshili kutya ovo inava hombolwa ile inava hombola otava dulu okuyandja elitulemo kokulongela Kalunga nopehena omapiyaaneko. (1 Ovakorinto 7:32-34) Kakele kaasho, Ombiibeli oya popya kutya naavo va hombolwa ile va hombola, navo otava dulu okukala ovayapuki. Pashihopaenenwa, omuyapostoli umwe waJesus, Petrus, okwa li a hombola. — Mateus 8:14; 1 Ovakorinto 9:5.