Ounona ovo va kula ove na oshinakuwanifwa sha fimana shokufila oshisho ovadali vavo ovo va kulupa. Ombiibeli yo-New International Version oya ti kutya “ounona ovo va kula ove na okuulika eitavelo lavo mokufila oshisho omaukwaneumbo avo nosho yo okufila oshisho ovadali vavo . . . naasho ohashi hafifa Kalunga.” (1 Timoteus 5:4) Ounona ovo va kula ove na okushilipaleka kutya ovadali vavo ovanamido ova filwa oshisho, nove na yo okudulika koshipango shopaMbiibeli shi na sha nokufimaneka ovadali vavo. — Ovaefeso 6:2, 3.

 Ombiibeli inai yandja omalombwelo okondadalunde e na sha nokufila oshisho ovadali ovo va kulupa. Ashike oi na oihopaenenwa yovalumenhu novakainhu ovaitaveli ovo va li va ninga ngaho. Oi na yo omayele taa longo oo taa dulu okukwafela ovo tave va file oshisho.

•  Ongahelipi oilyo imwe yomoukwaneumbo ya li ya fila oshisho ovadali ovanamido pefimbo Ombiibeli ya li tai shangwa?

•  Omayele opaMbiibeli taa longo elipi taa dulu okukwafela ovo have va file oshisho?

•  Mbela Ombiibeli oya popya kutya ovadali ovanamido ove na okufilwa oshisho komaumbo avo ile okomaumbo ovana vavo?

 Ova li va ninga ngaho meenghedi da yoolokafana, she likolelela keenghalo.

•   Josef okwa kala kokule naxe, yaJakob. Eshi Josef a li a mona omhito, okwa li a unganeka opo xe, Jakob, e uye a kale popepi naye. Josef okwa li a pa xe eumbo, oikulya noku mu amena. — Genesis 45:9-11; 47:11, 12.

•   Rut okwa li a tembukila koshilongo shainamweno, nokwa li ha longo noudiinini opo e mu file oshisho. — Rut 1:16; 2:2, 17, 18, 23.

•   Diva fimbo Jesus ina fya, okwa li a hoolola oo a li ta ka fila oshisho ina, Maria, oo tashi dulika a li omufiyekadi pefimbo opo. — Johannes 19:26, 27. a

 Ombiibeli oi na omafinamhango oo taa dulu okukwafela ovo have va filo oshisho va ungaunge nomaupyakadi opalutu nosho yo opamaliudo, oo hava shakeneke eshi tava file oshisho ovanamido.

•   Fimaneka ovadali voye.

   Osho Ombiibeli tai ti: “Fimaneka xo nanyoko.” — Exodus 20:12.

   Ongahelipi efinamhango olo tali dulu okutulwa moilonga? Ulika kutya oho fimaneke ovadali voye moku va efa va kale ve na emanguluko, va efa va kale tava ningi omatokolo kuvo vene e na sha nefiloshisho lavo. Ulika yo kutya owe va fimaneka moku va yambidida ngaashi tashi shiiva.

•   Kendabala oku va uda ko, noku va dimina po.

   Osho Ombiibeli tai ti: “Eendunge domunhu tadi mu pe outalanheni, nefimano laye olo okudima po etauluko.” — Omayeletumbulo 19:11.

   Ongahelipi efinamhango olo tali dulu okutulwa moilonga? Ngeenge omudali oo a kulupa okwa popi sha osho inashi yuka, ile ta ulike kutya okwa fa ehe na olupandu omolwefiloshisho olo ho mu pe, lipula kutya, ‘Ngeno aame nda li monghalo ya tya ngaho, ngeno ohandi udu ngahelipi?’ Ngeenge owa kendabala oku va uda ko noku va dimina po, otashi ke ku kwafela uha naipike onghalo.

•   Popya navamwe.

   Osho Ombiibeli tai ti: “Apa pehe nomapukululo, eemhangela tadi nyonauka, ndelenee apa pe novapukululi vahapu, do tadi wanifwa.” — Omayeletumbulo 15:22.

   Ongahelipi efinamhango olo tali dulu okutulwa moilonga? Ninga omapekapeko e na sha nanghee to dulu okuungaunga nomaupyakadi okuhenoukolele kwovadali voye. Opo u dule oku va kwafela shiiva opo to dulu okumona ekwafo momudingonoko weni. Popya navamwe ovo vali hava file oshisho ovanamido. Ngeenge ou na ovamwanyoko, kundafaneni shi na sha neemhumbwe dovadali veni, nghee mu na oku va fila oshisho, nanghee mu na okuyambididafana.

•   Kala u na ondjele.

   Osho Ombiibeli tai ti: “Ounongo tau kala pwaava ve lininipika.” — Omayeletumbulo 11:2.

   Ongahelipi efinamhango olo tali dulu okutulwa moilonga? Shiiva omangabeko oye. Pashihopaenenwa, keshe umwe oku na efimbo neenghono da ngabekwa. Omangabeko a tya ngaho, ohaa kumu onghedi omo ho file oshisho ovadali voye. Ngeenge owa mono kutya owa wililwa po eshi to file oshisho ovadali voye ovanamido, kendabala u konge ekwafo koilyo imwe youkwaneumbo, ile kwaavo ve na owino.

•   Kala ho lifile oshisho.

   Osho Ombiibeli tai ti: “Kape na omulumenhu e tonde olutu laye mwene, ndele ohe li palula nohe li file oshisho.” — Ovaefeso 5:29.

   Ongahelipi efinamhango olo tali dulu okutulwa moilonga? Nonande ou na oshinakuwanifwa shokufila oshisho ovadali voye, ou na yo oshinakuwanifwa shokulifila oshisho nosho yo oukwaneumbo woye ngeenge owa hombola. Owa pumbwa okulya nawa, okufuda po nosho yo okukofa sha wana. (Omuudifi 4:6) Owa pumbwa yo okutula mo efudo ngeenge otashi shiiva. Ngeenge owa ningi ngaho, oto ka kala u na oukolele pamaliudo, pamadiladilo nosho yo palutu, nokungaho oto ka dula okukwafela ovadali voye.

 MOmbiibeli kamu na eemhango dokondadalunde odo tadi ulike kutya ounona ovo va kula ova ngabekelwa ashike okufila oshisho ovadali vavo komaumbo avo. Omaukwaneumbo amwe, ohaa hoolola okukala pamwe novadali ovo va kulupa noku va fila oshisho ngaashi tashi shiiva. Ashike peemhito dimwe, otashi dulika va mone kutya oshixwepo oku va twala komaumbo ovakulupe. Oilyo youkwaneumbo otashi dulika i ongale nokutokola osho tashi wapalele keshe umwe. — Ovagalati 6:4, 5.