Heeno! Ombiibeli oya dja ‘kuKalunga ou ha hekeleke ovo va wilililwa po.’ (2 Ovakorinto 7:6) Nonande Ombiibeli kai fi embo louhaku wopamadiladilo, oya kwafela vahapu va finde omadiladilo okulidipaa. Omayele ayo oo taa longo, otaa dulu yo oku ku kwafela.

•  Ombiibeli ohai yandje omayele ta longo elipi?

•  Mbela Ombiibeli oya popya kombinga yaavo va li va hala okufya?

•  Eevelishe dilipi dOmbiibeli tadi ku kwafele u kondjife omadiladilo okulidipaa?

•  Ongahelipi ngeenge kaume ketu okwa ti kutya, “Onda hala okufya”?

•  Ongahelipi ngeenge onda li nda kendabala okulidipaa monakudiwa?

• ● Popya omaliudo oye.

   Osho Ombiibeli tai ti: “Kaume oku na ohole alushe, nomumwaina ta dalwa, a kwafe moluhepo.” — Omayeletumbulo 17:17.

   Sha hala kutya: Otwa pumbwa eyambidido lavamwe, ngeenge otu na omadiladilo e tu wilila po.

   Ngeenge owa kala wa mwenena ashike omadiladilo oo, oto ka kala wa humbata omutengi, oo to ka kala ito dulu vali. Ashike ngeenge owa popi naumwe kombinga yomaliudo oye, oto ka pupaleka oudjuu ao, notashi dulika nokuli u ka kale u na vali etaleko liwa.

   Kendabala okuninga ngaha: Popya naumwe nena, kutya nee oshilyo shoukwaneumbo weni, ile kaume e shii okulineekelwa. a Oto dulu yo okuholola omaliudo oye moku a shanga.

• ● Konga ekwafo kovashiivinawa vouhaku.

   Osho Ombiibeli tai ti: “Ovanhu ovo ve na oukolele inava pumbwa omuhakuli, ndele ovovo ashike tava vele.” — Mateus 9:12.

   Sha hala kutya: Ngeenge ohatu vele, otu na okuya keendokotola.

   Omadiladilo okulidipaa otashi dulika e li edidiliko lomukifi wopamadiladilo, ile wopamaliudo. Ngaashi ashike omikifi dopalutu, eshi kashi fi oshinima ngeno shififa ohoni. Omikifi dopamadiladilo nosho yo dopamaliudo ohadi dulu okupangwa.

   Kendabala okuninga ngaha: Konga ekwafo kovashiivinawa vouhaku diva ngaashi tashi dulika.

• ● Kala u shii kutya Kalunga oku na ko nasha nafye.

   Osho Ombiibeli tai ti: “Mbela oiyandja itano ihai landwa noupeni vavali vongushu inini? Ashike kape na nande oshimwe hashi dimbiwa kuKalunga. . . . Hano inamu tila; nye omwa fimana unene mu dule oiyandja ihapu.” — Lukas 12:6, 7.

   Sha hala kutya: Ou na ondilo momesho aKalunga.

   Otashi dulika u kale u udite u li oove auke, ashike Kalunga oku wete onghalo oyo to piti muyo. Oku na ko nasha naave, nonande ku na vali ehalo lokukala nomwenyo. Epsalme 51:17 ola ti: “Omutima, ou wa teyauka nowa alamekwa, oo nee, Kalunga ito u dini.” Kalunga okwa hala u kale nomwenyo, molwaashi oku ku hole.

   Kendabala okuninga ngaha: Konakona omaumbangi mOmbiibeli oo taa ulike kutya Kalunga oku ku hole. Pashihopaenenwa, tala etukulwa 24 lembo lokukonakona Ombiibeli li na oshipalanyole Ehena popepi naJehova.

• ● Ilikana kuKalunga.

   Osho Ombiibeli tai ti: “Mu shiivifileni oisho yeni aishe, molwaashi oku na ko nasha nanye.” —1 Petrus 5:7.

   Sha hala kutya: Kalunga ote ku shivi u mu lombwele nghee u udite nou popye osho to lipula nasho.

   Kalunga ote ke ku pa ombili yopamadiladilo nosho yo eenghono dokupula komesho. (Ovafilippi 4:6, 7, 13) Kungaho, ota kwafele ovo tave mu ifana nomutima aushe. — Epsalme 55:22.

   Kendabala okuninga ngaha: Ilikana kuKalunga nena. Longifa edina laye, Jehova, ndele to mu lombwele kombinga yomaliudo oye. (Epsalme 83:18, NW) Mu pula e ku kwafele u dule okupula komesho.

• ● Dilonga keteelelo lopaMbiibeli li na sha nonakwiiwa.

   Osho Ombiibeli tai ti: “Otu na eteelelo olo li li ngaashi ekanghamifo leemwenyo detu olo tali tu kwafele tu kale twa pama tuhe na omalimbililo.” — Ovaheberi 6:19.

   Sha hala kutya: Omaliudo oye otashi dulika a kale taa tengauka a fa ombautu i li mefuta mu na oshikungulu, ashike eteelelo olo li li mOmbiibeli otali dulu oku ku kwafela u pule komesho.

   Eteelelo olo kali fi ashike okulitungila ouumbo ngahenya, ndele ola kanghamena keudaneko laKalunga lokukufa po oyeetifi youyahame wetu. — Ehololo 21:4.

   Kendabala okuninga ngaha: Lihonga shihapu shi na sha neteelelo lopaMbiibeli mokulesha oshileshwa 5 shokambo Onghundana iwa ya dja kuKalunga!

• ● Ninga oshinima osho ho hafele.

   Osho Ombiibeli tai ti: “Omutima u na ehafo tau kwafa mokuveluka.” — Omayeletumbulo 17:22.

   Sha hala kutya: Ngeenge hatu ningi oinima oyo tai tu etele ehafo, otashi dulika tu xwepopaleke onghalo yetu yopamadiladilo, ile yopamaliudo.

   Kendabala okuninga ngaha: Ninga osho ho hafele shito. Pashihopaenenwa, pwilikina komaimbilo taa mwenyeke, lesha sha tashi tu omukumo, ile u likongela po sha osho u hole, u kale ho shi ningi. Oto ka weda yo kehafo loye, ngeenge owa ningi sha u kwafele vamwe, nokuli nomoinima inini. — Oilonga 20:35.

• ● Fila oshisho oukolele woye.

   Osho Ombiibeli tai ti: “Edeulo lopalutu oli na ekwafo.” — 1 Timoteus 4:8.

   Sha hala kutya: Ohatu mono ouwa, ngeenge hatu ningi omadeo, hatu kofa sha wana nokulya oikulya oyo i na oitungifi.

   Kendabala okuninga ngaha: Kala ho ka enda, nande ominute 15.

• ● Dimbuluka kutya omaliudo noinima imwe monghalamwenyo ohai lunduluka.

   Osho Ombiibeli tai ti: ‘Ku shii kutya oshike tashi ke ku ningilwa mefiku lomongula.’ — Jakob 4:14.

   Sha hala kutya: Oupyakadi wa kwata moiti, nokuli naao tau monika wa fa we ku nyenga, otashi dulika wopakafimbo.

   Kutya nee onghalo yoye oya fa ya naipala neenghono paife, otai dulu okulunduluka mongula. Onghee konga eenghedi omo to dulu okulididimika. (2 Ovakorinto 4:8) Onghalo yoye oyo i udifa nai otashi dulika i lunduluke mokweendela ko kwefimbo, ashike ngeenge owe lidipaa, opuwo ngaho ito dulu vali okulundulula po sha.

   Kendabala okuninga ngaha: Lesha omahokololo Ombiibeli ovanhu ovo va li va teka omukumo neenghono nova hala okufya, ndele to tale nghee onghalamwenyo yavo ya li ya xwepopala, na luhapu omeenghedi omo va li inave shi teelela. Diladila koihopaenenwa imwe.

 Heeno. Ombiibeli oye tu lombwela kombinga yavamwe ovo va tile: “Onda hala okufya.” Kalunga ka li e va hanyena, ndele okwe va pa ekwafo. Ota dulu oku ku ningilila sha faafana.

Elia

•  ● Okwa li lyelye? Elia okwa li omuprofeti omuladi. Ashike naye okwa li ha teka omukumo. Jakob 5:17 okwa ti: “Elia okwa li omunhu ngaashi fye.”

•  ● Omolwashike a li a hala okufya? Pomhito imwe, Elia okwa li e udite e li oye aeke, a tila noke na oshilonga. Opo nee okwa li a popya a ti: ‘Omwene kufa mo omwenyo wange.’ — 1 Eehamba 19:4.

•  ● Oshike sha li she mu kwafela? Elia okwa li a mbubulila Kalunga omaliudo aye aeshe. Mbela Kalunga okwa li e mu twa omukumo ngahelipi? Kalunga okwa li e mu ulikila kutya oku na ko nasha naye nokwa li a ulika kutya oku na eenghono dinene. Okwa li yo a shilipaleka Elia kutya okwa pumbiwa natango, ndele te mu kwafele noku mu yambidida.

•  ▸ Lesha kombinga yaElia: 1 Eehamba 19:2-18.

Job

•  ● Okwa li lyelye? Job okwa li omulumenhu oshipuna noku na oukwaneumbo, oo wa li hau longele Kalunga kashili noudiinini.

•  ● Omolwashike a li a hala okufya? Job okwa li e na onghalamwenyo oyo ya lundulukila kowii neenghono. Okwa li a kanifa oiniwe yaye aishe. Ovana vaye aveshe ova li va fila moshiponga. Okwa li a kwatwa komukifi u udifa omwenyo munyenye. Lwanima, okwa li ulwa kutya oye mwene e lietela omaupyakadi. Job okwa ti: “Nda kuta, inandi hala okukala nomwenyo fiyo alushe.” — Job 7:16.

•  ● Oshike sha li she mu kwafela? Job okwa li a ilikana kuKalunga nokwa li yo a popya navamwe. (Job 10:1-3) Okwa li a hekelekwa kukaume kaye, Elihu, oo e mu kwafela a kale e na etaleko li li mondjila li na sha nonghalo yaye. Kakele kaasho, Job okwa li a tambula ko omayele nekwafo laKalunga.

•  ▸ Lesha kombinga yaJob: Job 1:1-3, 13- 22; 2:7; 3:1-13; 36:1-7; 38:1-3; 42:1, 2, 10-13.

Moses

•  ● Okwa li lyelye? Moses okwa li omuwiliki wOvaisrael vonale, nomuprofeti omudiinini.

•  ● Omolwashike a li a hala okufya? Moses okwa li e na oshinakuwanifwa sha kwata moiti, a li ha ulwa nai luhapu nokwa li a loloka. Onghee hano, okwa li a lilila Kalunga a ti: ‘Dipae nge.’ — Numeri 11:11, 15.

•  ● Oshike sha li she mu kwafela? Moses okwa li a lombwela Kalunga osho e udite. Kalunga okwa li a kwafela Moses mokupepaleka oinakuwanifwa yaye idjuu, opo a ha kale noshisho.

•  ▸ Lesha kombinga yaMoses: Numeri 11:4-6, 10-17.