Oudjuu munene otau ka kala efimbo lidjuu neenghono olo tali ka hanga ovanhu. She likolelela kwaasho Ombiibeli ya xunganeka, efimbo olo otali ka holoka “momafiku axuuninwa,” ile ‘pefimbo lexulilo.’ (2 Timoteus 3:1; Daniel 12:4, NWT-KY nosho yo KB-13) Otali ka kala efimbo ‘loudjuu oo inau kala ko nale okudja eshi Kalunga a hovela okushita ounyuni, noitau ka kala ko vali.’ — Markus 13:19; Daniel 12:1; Mateus 24:21, 22.

Osho tashi ka ningwa pefimbo loudjuu munene

•   Ehanauno lomalongelokalunga oipupulu. Omalongelokalunga oipupulu otaa ka hanaunwa po mepakumo leisho. (Ehololo 17:1, 5; 18:9, 10, 21) Omapangelo omanaenghono oo e lile po Oiwana ya Hangana otaa ka wanifa po ehalo laKalunga mokukwatela komesho ehanauno olo. — Ehololo 17:3, 15-18. a

•   Okuponokelwa kwelongelokalunga lashili. Oshipandi shoiwana, osho sha popiwa memoniko laHesekiel, oiwana ye limanga oukunikumwe “Gog, medu laMagog,” otai ka kendabala i xulife po ovo ve li melongelokalunga lashili. Ashike Kalunga ota ka amena ovapiya vaye kehanauno olo. — Hesekiel 38:1, 2, 9-12, 18-23.

•   Ovanhu ovo ve li kombada yedu otava ka tokolwa. Jesus ota ka tokola ovanhu aveshe “nota ka tongola ovanhu muvakwao, ngaashi ashike omufita ta tongola eedi moikombo.” (Mateus 25:31-33) Jesus ota ka tokola ovanhu she likolelela konghedi omo va li va yambidida ‘ovamwaxe,’ ovo tava ka pangela pamwe naye meulu. — Mateus 25:34-46.

•   Okwoongelwa kwovapangeli vOuhamba. Ngeenge ovanhu ovadiinini, ovo va hoololwa va ka pangele pamwe naKristus ova fi, ohava nyumunwa va ka kale meulu. — Mateus 24:31; 1 Ovakorinto 15:50-53; 1 Ovatessalonika 4:15-17.

•   Armagedon. Ota ulike koita oyo tai ka luwa “mefiku linene laKalunga Omunaenghono adishe,” oyo hai ifanwa yo “efiku laJehova.” (Ehololo 16:14, 16; Jesaja 13:9; 2 Petrus 3:12) Ovo inava hokiwa kuKristus otava ka hanaunwa po. (Sefania 1:18; 2 Ovatessalonika 1:6-10) Ehanauno olo ola kwatela mo omapangelo opapolotika, oo e lilwe po koshilyani shomitwe heyali osho sha tumbulwa mOmbiibeli. — Ehololo 19:19-21.

Osho tashi ka ningwa konima youdjuu munene

•   Satana neendemoni daye otava ka kwatwa po. Omweengeli munene ota ka umbila Satana neendemoni daye “mombwili,” omo itava ka longa sha vali oku shi popya pafaneko. (Ehololo 20:1-3) Eshi Satana ta ka tulwa mombwili ota ka kala onga a tulwa modolongo, molwaashi ita ka dula vali okupukifa ovanhu. — Ehololo 20:7.

•   Ehovelo lokupangela kwomido eyovi. Ouhamba waKalunga otau ka hovela okupangela oule womido 1 000, osho tashi ka etela ovanhu omanangeko noupuna a denga mbada. (Ehololo 5:9, 10; 20:4, 6) “Ongudu inene” ya nyengana okuvalwa, ‘oyo ya pita moudjuu munene,’ otai ka xupa nokukala po, eshi Omido Eyovi dOkupangela tadi ka hovela. — Ehololo 7:9, 14; Epsalme 37:9-11.