“Fimaneka xo nanyoko, Omwene Kalunga koye ngaashi e ku lombwela, omafiku oye opo a ninge mahapu, ndele ove u kale nelao medu olo Omwene Kalunga koye te ke li ku pa.” — Exodus 20:12, Ombiibeli yOshikwanyama yomo 2013.

Kalunga okwa li a lombwela oshiwana shaIsrael shonale shi fimaneke ovadali vasho. Jehova okwa li yo a yandja etomheno limwe kutya omolwashike sha fimana okudulika koshipango osho. Nonande Ovakriste kave na okudulika kOmhango yaMoses oyo a li a pa Ovaisrael, omifikamhango daye inadi lunduluka. Omafinamhango eemhango daKalunga otaa longo fiyo okunena nokwa fimana kOvakriste. — Ovakolossi 3:20.

Ounona, kutya nee ovanyasha ile ovakulunhu, ove na okufimaneka nokudulika kovadali vavo. (Leviticus 19:3; Omayeletumbulo 1:8) Nonande ova ka kale ve na ounona vavo, ove na okutwikila okukala ve hole ovadali vavo. Pashihopaenenwa, ove na okushilipaleka kutya ovadali vavo ovanamido otava filwa oshisho nawa, noku va pa ekwafo lopashimaliwa a pa sha pumbiwa. — Mateus 15:4-6; 1 Timoteus 5:4, 8.

Ounona aveshe Ovaisrael ova li ve na okufimaneka ovadali vavo aveshe, xe nosho yo ina, naasho ohashi va kwafele va mone onghandangala ya fimana oyo tai danwa kooina moukwaneumbo. (Omayeletumbulo 6:20; 19:26) Nokunena, ounona ove na okuninga sha faafana.

Oshipango shokufimaneka ovadali vaumwe oshi na ongaba. Ounona Ovaisrael ngeenge ihava dulika kovadali vavo ile kovakulunhu ovo inave va dala, kungaho kava li tava dulika kuKalunga. (Deuteronomion 13:6-8) Nokunena, Ovakriste ohava “dulika kuKalunga e li omupangeli ponhele yokudulika kovanhu.” — Oilonga 5:29.

Omhango oyo Kalunga apa Ovaisrael, okwa udaneka kutya ounona ovo hava fimaneke ovadali vavo ‘omafiku avo okukalamwenyo otaa kala mahapu nokukala nelao’ medu olo Kalunga e li e va pa. (Deuteronomion 5:16) Itava ka hangwa koilanduliko oyo hai hange ounona ovo have lipwililikile Omhango yaKalunga nosho yo ovo hava tukululile ovadali vavo oshibofa. (Deuteronomion 21:18-21) Ashike fiyo okunena, omafinamhango oo a kanghamena keemhango odo inaa lunduluka. (Ovaefeso 6:1-3) Ohatu ke lihokolola kOmushiti wetu, kutya nee otu li ovanyasha ile ovakulunhu. Ngaashi Kalunga a udaneka, ounona ovo hava dulika kovadali vavo ohava kala nomwenyo efimbo lile. Ove na eteelelo loku ka kala nomwenyo fiyo alushe. — 1 Timoteus 4:8; 6:18, 19.

Oshipango osho tashi hangwa muExodus 20:12 otashi dana onghandangala ya fimana mOipango Omulongo. (Exodus 20:1-17) Oipango oyo ya tetekela oya yelifa oshinakuwanifwa osho Ovaisrael va pewa kuKalunga, ngaashi oku mu longela oye aeke. Eemhango odo da ka shikula ko odi na sha nanghee ovanhu ve na okulihumbata, mwa kwatela oipango ngaashi okukala ovadiinini kookaume ketu kopahombo nokukala ihatu vake. Oshipango “shokufimaneka xo nanyoko” osha kala sha talika ko sha fa onhopa oyo ya kwatakanifa ovanhu vavali.