OMISHANGWA DA YELIFWA

Genesis 1:1 — “Pehovelo Kalunga okwa shita eulu nedu”

DANA

“Pehovelo Kalunga okwa shita eulu nedu.” — Genesis 1:1, Ombiibeli yOshikwanyama yomo 2013.

Osho omushangwa waGenesis 1:1 wa hala okutya

Omushangwa oo wopehovelo owa popya oinima ivali ya fimana. Shotete, “eulu nedu” oi na etameko. Oshitivali, oya shitwa kuKalunga. — Ehololo 4:11.

Ombiibeli inai popya kutya onaini Kalunga a shita edu, nongahelipi e li shita. Ashike oya popya kutya okwa shita edu ‘neenghono daye dinene nokudula kwaye kuhapu.’ — Jesaja 40:26.

Oshitya “okushita” osha tolokwa okudja koshityalonga shOshiheberi osho tashi ulike koshilonga osho sha longwa kuKalunga aeke. * MOmbiibeli, Jehova * Kalunga oye ashike a popiwa mo e li Omushiti. — Jesaja 42:5; 45:18.

Oshikalimo shomushangwa waGenesis 1:1

Ovelishe yotete membo laGenesis oya popya kombinga yeshito, nouyelele muhapu u na sha naasho otau hangwa metukulwa 1 nosho yo 2. Ombiibeli oya yelifa muGenesis 1:1 fiyo 2:4 nghee Kalunga a shita edu, noinima aishe i na omwenyo, mwa kwatelwa omulumenhu nomukainhu wotete. Okudja peevelishe odo, Ombiibeli oya yandja ouyelele muhapu u na sha neshito lomulumenhu nomukainhu. — Genesis 2:7-25.

Genesis okwa popya kutya Kalunga okwa shita oinima aishe moule “womafiku” ahamano. Omafiku oo itaa ulike keevili 24, ndele otaa ulike koule wefimbo lile. Ndele oshitya “efiku” otashi ulike koule womido, ndele haevili 24. Oshitya osho sha longifwa muGenesis 2:4 “efiku” otashi ulike “kefimbo,” na Kalunga okwa longifa omafiku mahapu e dulife pwaahamano, oo a popiwa e li “efiku” limwe.

Omitotolombo di na sha naGenesis 1:1

Omutotolombo: Opa pita ashike omayovimido manini okudja eshi Kalunga okwa shita edu.

Oshili: Ombiibeli inai popya kutya onaini edu la shitwa. Eendjovo odo di li muGenesis 1:1 itadi kondjifafana naasho ovanongononi va itavela kutya edu ola kala po oule womido omabiliyona. *

Omutotolombo: Genesis 1:1 ota ulike kutya Kalunga omukwatatu molwaashi oshitya osho “Kalunga” mOshiheberi oshi li pauhapu.

Oshili: Edinafimaneko “ Kalunga” olo la tolokwa mOshiheberi Elohim, oli li pauhapu, notashi ulike komunhu a denga mbada ile omufimanekwa, ndele inashi yukifwa kovanhu. O-New Catholic Encyclopedia oya ti kutya oshitya Elohim osho sha longifwa pauhapu muGenesis 1:1 “ohashi longifwa alushe noshityalonga shi li paushimwe, tashi ulike kefimaneko, ngaashi ashike outumbulilo fye hau dulu okulongifwa kohamba, ndele itashi ulike kovanhu vahapu.” — Enyanyangido etivali, embo 6, epandja 272.

Lesha Genesis etukulwa 1 pamwe nomashangelo opedu oo a yelifa nosho yo omaulikokwatakanifo.

^ okat. 7 Shi na sha noshitya osho, Ombiibeli yo-HCSB Study Bible oya ti: “Oshityalonga shOshiheberi bara osho sha hala kutya ‘okushita,’ itashi popi oshinima sha longwa komunhu. Nomolwaasho oshitya osho ohashi longifwa ashike koilonga oyo ya longwa kuKalunga.” — Epandja 7.

^ okat. 7 Jehova olo edina laKalunga. — Epsalme 83:18, NW.

^ okat. 13 O-The Expositor’s Bible Commentary oya popya shi na sha noutumbulilo wOshiheberi oo wa tolokwa “pehovelo,” kutya “itau ulike koule wefimbo olo oshinima sha longwa.” — Oyo ya pepalekwa, embo lotete, epandja 51.