Ounona ofimbo vanini, otashi dulika va didilike kutya ovanhu vamwe ohava ungaunga navakwao she likolelela koluvala loshipa, ile kutya ova dja koshilongo shilipi. Ongahelipi to dulu okukwafela okaana koye ka henuke okunwefwa mo koikala youkwamuhoko yavamwe? Oshike u na okuninga po, ngeenge okaana koye oke li oshihakanwa shoukwamuhoko?

Oshitukulwa eshi osha kundafana kombinga ya:

•  Nghee to dulu okupopya nounona kombinga yomihoko

•  Nghee to dulu okuyelifila ounona kombinga youkwamuhoko

•  Nghee to dulu oku va tulila po oshihopaenenwa

•  Ngeenge okaana koye ta ka ningilwa okuhenouyuki

 Osho to dulu oku va yelifila. Mounyuni omu yadi ovanhu ve na omaukwatya nosho yo omifyuululwakalo da yoolokafana noda denga mbada. Osho osha ningifa ovanhu vamwe va kale hava ungaunga nai navakwao omolwehokepo lavo, ile onghedi omo have lihumbata.

 Mepingafano naasho, Ombiibeli otai hongo kutya ovanhu aveshe ove na Omushiti umwe aeke. Noitya imwe, atushe otwa pambafana.

 Karen okwa ti: “Otwa didilika kutya ngeenge ounona ova kala hava endafana novanhu vomihoko da yoolokafana, ohave shi limonene vovene kutya omunhu keshe okwa pumbwa okuungaungiwa naye pahole nonefimaneko.”

 Mokweendela ko kwefimbo, okaana koye otaka ka uda eenghundana di na sha naavo hava ungaunga nai navamwe, ile oku va ningila ominyonena omolwoukwamuhoko. Ongahelipi to dulu okuyelifa kombinga yaasho? Oto dulu oku shi ninga she likolelela komido dokaana.

•   Ounona ovo vanini. Omundokotola  Allison Briscoe-Smith okwa tofa outumbululilo moshifo Parents a ti: “Ounona vanini ohava kala ve shii osho shi li pauyuki naasho shihe li pauyuki. Naasho oshi li etomheno liwa lokukundafana navo kombinga yokuhe na ouyuki.”

•   Ounona ovo va kula ko kanini. Ounona okudja pomido 6 fiyo 12 ohava kala va halelela okulihonga oinima, nomafimbo amwe ohava pula omapulo madjuu. Onghee owa pumbwa oku va yelifila nawa ngaashi to dulu. Popya novana voye kombinga yoinima oyo hava mono kofikola naayo hava mono ko-TV, ile kointaneta nokulongifa oinima oyo, opo u va yelifile kutya oukwamuhoko oshinima sha puka.

•   Ovanyasha. Ovanyasha ove li pefimbo, opo hava dulu okuuda ko oinima oyo ya kwata moiti monghalamwenyo. Onghee hano, ngeenge okaana koye oke li omunyasha, ou na omhito iwa okukundafana nako kombinga yoiningwanima i na sha noukwamuhoko.

 Tanya okwa ti: “Ohatu popi novana vetu kombinga youkwamuhoko, molwaashi oshinima osho ve na okushakeneka fiku limwe mokukalamwenyo kwavo. Ngeenge ihatu popi navo kombinga yoshinima osho moukwaneumbo, otashi dulika va ka tambule ko etaleko lavamwe. Ounona vetu otava dulu okulombwelwa nokwiitavelifwa ouyelele uhe li paushili.”

 Ounona ohava shikula oshihopaenenwa shetu, onghee u li omudali osha fimana okulungamena eendjovo neenghatu doye. Pashihopaenenwa:

•   Mbela oho ningi omashendjo e na sha novanhu vomihoko dimwe, ile we va yemba? Ehangano lo-American Academy of Child and Adolescent Psychiatry ola ti: “Ounona ohava tale nokupwilikina kwoove nohava kendabala oku ku hopaenena.”

•   Mbela oho hafele ngoo okukala pamwe novanhu va dja moiwana imwe mounyuni? Omundokotola wounona Alanna Nzoma, okwa ti: “Ngeenge owa hala ovana voye va kale ve na ekwatafano liwa novanhu vomomaputuko a yoolokafana, oove wa pumbwa oku va tulila po oshihopaenenwa.”

 Katarina okwa ti: “Omido adishe odo otwa kala hatu tambula ko ovaenda meumbo letu okudja momaputuko a yoolokafana. Otwe lihonga okulya oikulya yavo, okupwilikina komusika yavo nokudjala omidjalo davo dopamufyuululwakalo. Ngeenge hatu popi novana vetu kombinga yovanhu, ihatu tumbula omihoko davo. Nohatu henuka okulitangela omuhoko wetu.”

 Nonande ovanhu ohava popi kombinga youfikepamwe, natango oukwamuhoko onghee ngoo tau ende nokuhapupala mounyuni. Osho osha hala okutya okaana koye otashi dulika ka ungaungiwe nako shihe li pauyuki, unene tuu ngeenge oka talika ko ka dja momuhoko, oo wa dinika. Ngeenge osho osha ningwa . . .

 Ninga omapekapeko. Mbela osha li oshiningilewina, ile pamwe omunhu ka li ta diladila nawa? (Jakob 3:2) Mbela owa pumbwa okupopya naao a ninga owii, ile oto ka efa ashike?

 Otwa pumbwa okukala tu nondjele. Ombiibeli otai yandje omayele aa opandunge: “Ino endelela okulihandukifa.” (Omuudifi 7:9) Oukwamuhoko kau na okutalika ko u li oshinima sha nafangwa, ashike osho inashi hala okutya efimbo keshe umwe te ku ula elaka lii, oku na oukwamuhoko.

 Eenghalo ihadi li fe, onghee shiiva kutya oshike lela sha ningwa po, ofimbo ino ninga etokolo.

 Konima eshi wa ninga omapakapeko, lipula kutya:

•   ‘Mbela otashi ka kwafela ngoo okaana kange, ngeenge oka diladila kutya omunhu keshe oku na oukwamuhoko nosho yo kutya ngeenge ka ulwa omalaka mai omolwomuhoko wako?’

•   ‘Mbela okaana kange otaka ka mona ngoo ouwa mokushikula omayele Ombiibeli, oo taa ti: “Ino dimbulukwa eendjovo adishe we di popiwa kovanhu”?’ — Omuudifi 7:21.

 Ongahelipi ngeenge otashi monika sha fa oshiningilewina? Kwafela okaana koye ka mone kutya onghalo otai dulu okuxwepopala, ile inaipale, she likolelela konghedi omo ta ke linyenge. Omafimbo amwe omunhu oha shindi, ha lundile, ile e ku tuke, opo a tale nghee to linyenge. Meenghalo da tya ngaho, oshixwepo uha tye sha.

 Mepingafano naasho, okaana koye otaka dulu okupopya naao e ka shinda, ngeenge itashi ka tula moshiponga. Otaka dulu okutya (nopehe na okutanguna), “Osho wa popya (wa ninga) kashiwa nande.”

 Ongahelipi ngeenge owa hala okulopota oshiningwanima shonhumba? Ngeenge ou udite kutya okaana koye oke li moshiponga, ile kutya onghalo oya pumbwa okutalwa nawa, owa manguluka okupopya novapashukili vofikola, ile nopolifi, ngeenge sha pumbiwa.