Alexander okwa ti: “Omonakadona wetu okwa li e na omido hamano eshi twa kundafana naye oshikando shotete kombinga yoalkoholi. Otwa li twa kumwa molwaashi okwa li e shii shihapu kombinga yasho shi dulife eshi twa li twa teelela.”

•  Osho u na okushiiva

•  Osho to dulu okuninga

•   Osho Ombiibeli ya popya kombinga yoalkoholi

Osha fimana okupopya nounona kombinga yoalkoholi. Ino teelela okaana koye ka kule opo u dule okukundafana nako. Khamit, wokoRussia, okwa ti: “Otwe livela ombedi eshi inatu kundafana nomonamati wetu shi na sha nokulongifa oalkoholi pandjele. Onde lihonga nghee sha fimana okuninga ngaho. Onda li nda mona kutya omonamati wange okwa li ha nu sha pitilila okudja eshi a li e na omido 13.”

Omolwashike wa pumbwa okukala wa limbililwa?

• Okaana koye ota ka dulu okunwefwa mo kovanafikola vakwao, koipindi nosho yo ko-tv.

• Endiki lokoAmerica lokukandeka omikifi ola ti kutya eepelesenda 11 dovanhu ovo hava nu omalodu moAmerica ounona ovo ve li koshi yeedula.

 Kape na omalimbililo kutya oshikondo shi na sha noukolele osha lombwela ovadali va kundafane novana okudja eshi ve na omido dinini shi na noupyakadi oo hau etifwa kokulongifa nai oalkoholi. Ongahelipi to dulu okuninga ngaho?

Nyamukula omapulo okaana koye. Ounona vanini ohava pula omapulo, unene tuu ounona ovo va kula. Onghee otashi ka kala shiwa ngeenge omwe lilongekida okunyamukula. Pashihopaenenwa:

• Ngeenge okaana koye oha ka kala ka hala okushiiva kutya oalkoholi oshikunwa sha tya ngahelipi, oto dulu oku ka lombwela kutya owaina oya fa oshiimati shilula ofimbo obiila oya lula unene.

• Ngeenge okaana koye oka hala okunwa oalkoholi, oto dulu oku ka lombwela kutya kai wa kounona. Ka lombwela oushili oo kutya: Oalkoholi ohai ningifa omunhu aha longe sha, ashike unene tuu okukala ehe na eenghono, a ninge oinima ii nosho yo a popye oinima oyo te ke lipa oushima lwanima. — Omayeletumbulo 23:29-35.

Lihongo ove mwene. Ombiibeli oya ti: “Omunamayele keshe ta longo neendunge.” (Omayeletumbulo 13:16) Kala u shii kutya oikunwa yoalkoholi ohai kumu ngahelipi ovanhu nosho yo eemhango odo da tulwa po moshilongo sheni di na sha nayo. Osho otashi ke ku kwafela u dule okukwafela okaana koye.

Kundafaneni diva oshikundafanwa osho. Mark, omushamane omudali wokoBritain, okwa ti: “Ngeenge ounona ohava nu oikunwa yoalkoholi ohava ngwangwana. Onda pula okamonamati kange komido 8 ngeenge oshi li mondjila ile osha puka okunwa oikunwa yoalkoholi. Onda li handi popi nako nda ngungumana nonda manguluka, naasho osha li she ka kwafela ka holole etaleko lako ka manguluka.”

Oto ka findila momadiladilo ounona oshikundafanwa shi na sha noikunwa yoalkoholi ngeenge ohamu shi kundafana lwoikando. Kundafana nokaana she likolelela komido dako kombinga yoikunwa yoalkoholi nosho yo yoikundafanwa imwe ya fimanenena monghalamwenyo, ngaashi okutauluka opate nokombinga yomilele.

Kala oshihopaenenwa. Ounona ova fa omundele, meityo olo kutya ohava yandje unene elitulemo kwaasho she va dingilila, nomakonakono otaa ulike kutya ovadali ovo unene hava nwefa mo ounona. Osho osha hala kutya ngeenge oho nu oikunwa yoalkoholi opo u kale wa ngungumana ile u kufe po ostresa, ounona otava ka mona kutya oalkoholi oha i kufa po oisho yomunhu. Onghee hano, va tulila po oshihopaenenwa shiwa. Kala ho longifa oikunwa yoalkoholi pandjele.