Oipwakotola nosho yo oikwameva imwe ohai etifa oupyakadi ngeenge oya kanyatele kombautu. Oinima ya tya ngaho ohai shunifa onhapo yombautu pedu, hai ningifa ombautu i longife omahooli mahapu noi kale tai ka pangelwa lwoikando. Ovanongononi ova tokola okupongolola po oupyakadi oo tava hopaenene eshito.

Diladila kwaashi: Omakonakono okwa ulika kutya oshipa showeila yo-Globicephala melas oshi na oukwatya wokulipaleka sho vene. Oshi na oundjila va fa oingolongonyo ovo have shi ningifa shidjuu koipwakotolwa i dame ko. Moundjila ovo omu na oikwamaadi oyo hai dipaa onguwi neembakiteli. Oshipa showeila ohashi di oikwamaadi ngeenge tai lipuununa.

Ovanongononi otava kendabala okuhopaenena oukwatya woshipa showeila wokuliwaleka eshi tava longo oitako yeembautu. Monakudiwa, ova kala hava longifa opainda yokwaamena oitako yeembautu iha like. Ashike paife oludi leepainda odo hava longifa ola kelelwa molwaashi ola nyika oshiponga koikwameva. Ovanongononi ova diladila koitako yeembautu ku kale haku tulwa oitenda i na oumbululu omo tamu kala tamu pile oikwakemikala oyo inai nyika oshiponga koikwameva. Ngeenge oikwakemikala oyo ya kwatafana nomeve efuta, otai ninga ongha nokuuvika oshitako ashishe shombautu. Mokweendela ko kwefimbo, ongha oyo i na eemillimeta 0.7 mounene ohai natuka ko koshitako pamwe noikwameva aishe oyo ya kanyatela ko. Opo nee oshitako shombautu tashi nduluka vali ongha ipe nokuuvika oshitako ashishe.

Omakonakono oo a ningwa okwa ulika kutya onghedi oyo otai dulu okwaamena eembautu oule wefimbo lile lela opo diha like. Naasho oshi li ekwafo linene keekambani deembautu, molwaashi ohashi xupifa oshimaliwa shihapu.

Ove oto ti ngahelipi? Mbela oukwatya woshipa sheeweila wokuliwapaleka owe uya po ashike ngahenya? Ile mbela oinima oya shitwa?