Omaukwaneumbo aeshe konyala oku na eemhango, ngaashi di na sha nefimbo olo ovanhu ve na okwaalukila meumbo, okulongifa oikwaelektronika nosho yo neenghedi.

Ongahelipi ngeenge owa teya shimwe shomoipango yomoukwaneumbo? Ito dulu okulundulula osho sha ningwa po, ashike oto dulu okukendabala uha naipike onghalo. Oshitukulwa eshi otashi ke ku kwafela nghee u na oku shi ninga.

•  Osho uhe na okuninga

•  Osho shiwa okuninga

•  Osho oomakula voye tava ti

• Ngeenge ovadali voye inava didilika kutya owa tauluka oshipango shimwe, otashi dulika u kale wa hala oku shi holeka.

• Ngeenge ove shii kutya owa tauluka oshipango otashi dulika u ninge omalipopilo ile u pe umwe ombedi.

Ashike kape na nande oshimwe shomwaayo shiwa okuninga. Omolwashike mbela? Omolwaashi ngeenge owa kendabala okuninga omalipopilo, ile okuvela umwe ombedi osha yela kutya kungaho ino kula. Osho otashi ka ulikila ovadali voye kutya natango owa pumbwa okukula.

Diana okwa ti: “Okupopya oipupulu kashi fi ekandulepo loupyakadi. Efiku limwe oshili oi na oku ke uya poluhaela, noutekuduliko otau ka kala wa kwata moiti shi dulife ngeno owa popile oshili pehovelo.”

• Dimina osho wa ninga. Ombiibeli oya ti: “Ou ta holeke omatauluko aye, ita ka mona elao.” (Omayeletumbulo 28:13) Ovadali voye ove shii kutya ino wanenena. Ashike nande ongaho, ova hala u kale ho popi oshili.

  Olivia okwa ti: “Ovadali voye otave ke ku fila onghenda ngeenge owe va lombwele oshili. Ngeenge oho popi oshili, ovadali voye otava ka kala ve ku lineekela.”

• Yandja ombili. Ombiibeli oya ti: “Kaleni ovalininipiki.” (1 Petrus 5:5) Otashi pula elininipiko opo u tye “ombili” nopehe na okulipopila.

  Heather okwa ti: “Ovanhu ovo hava kala ashike tave lipopile ohava nghundipaleke eliudo lavo. Mokweendela ko kwefimbo, ngeenge ova ka ninga sha shii itali ka kala vali tali va vele ombedi.”

•  Tambula ko oilanduliko. Ombiibeli oya ti: “Pwilikineni outekuduliko.” (Omayeletumbulo 8:33) Henuka okungongota nokulongela kumwe neendjidikila odo wa tulilwa po kovadali voye.

  Jason okwa ti: “Shi fike ngoo pokutanguna kwoye, osho ngoo onghalo tai ende nokunaipala. Longela kumwe neendjidikila odo wa tulilwa po noino yandja elitulemo kwaasho wa kanifa.”

• Longa noudiinini opo ovadali voye va kale ve ku lineekela vali. Ombiibeli oya ti: ‘Liduleni omunhu mukulu molwaashi omwa li hamu shikula elihumbato leni lonale inali koshoka.’ (Ovaefeso 4:22) Kala ho ningi omatokolo opandunge opo ovadali voye va kale ve ku lineekela.

  Karen okwa ti: “Ngeenge alushe oho ningi omatokolo opandunge nokuulikila ovadali voye kutya ito ka ninga vali epuko la faafana, mokweendela ko kwefimbo otava ka kala vali ve ku lineekela.”

KEENDABALA OKUNINGA NGAHA: Kendabala okuninga ngaashi to dulu opo u ulikile ovadali voye kutya ou li omulineekelwa. Pashihopaenenwa, efiku limwe eshi wa dja mo meumbo, shiivifila ovadali voye ofimbo u li mondjila wa finda keumbo nonande inaku toka. Osho otashi ke va kwafela va mone kutya owa hala ve ku lineekele vali.