Oto ti ngahelipi?

• Mbela osha nyika oshiponga okutengeneka onakwiiwa, okutala momukonda ile okuya keemhule?

• Mbela oumhulile omahokololo ashike taa faneke ekondjifafano pokati kouwa nowii, ile oinima imwe yonhumba yoshili noya nyika oshiponga?

Moshitukulwa eshi ohatu ka konakona kutya omolwashike oumhulile hau monika wa fa u hokwifa, nomolwashike twa pumbwa okukala twa lungama.

•  Omolwashike oumhulile hau monika wa fa u hokwifa?

•  Omolwashike twa pumbwa okukala twa lungama?

•  Osho wa pumbwa okuninga po

•  Osho oomakula voye tava ti

Ovanhu ovo hava longo meengeshefa di na sha nomalihafifo ohava likola oimaliwa ihapu mokudana eemuvi, eeprograma doko-TV, omaudano eevidio nosho yo omambo oo taa xwaxwameke oumhulile. Oshidjemo, ovanyasha vahapu ova kulika ohokwe moinima ngaashi ovanyanekeli veenyofi, eendemoni, oifalakanena nosho yo moulodi. Omolwashike mbela? Omatomheno amwe ongaashi:

• Okatalekonawa: Ohava kala va hala okutala ngeenge oishitwa yopamhepo oko ngoo i li shili

• Omalipulo: Ohava kala va hala okushiiva osho tashi ka ningwa po monakwiiwa

• Ekwatafano: Ohava kendabala okupopya noonakufya ovo va li ve hole

Omatomheno a tya ngaho inaa puka muo vene. Pashihopaenenwa, oshi li paushitwe okulipula shi na sha nonakwiiwa, ile nanakufya oo twa li tu hole. Ashike ope na oshinima sha nyika oshiponga osho twa pumbwa okulungamena.

Ombiibeli oi na omalondwelo a kwata moiti e na sha noshinima keshe shi na ekwatafano noumhulile. Pashihopaenenwa, oya ti:

“Mokati keni muha kale nande umwe . . . ou ha diinine oundudu ile enyanekelo ile ta xunganeke omadidiliko ile ta pulike ile ta longifa oupule ile ta pula keemhepo dovafi ile komhepo yovashitukifi ile ta kongo omapukululo kovafi. Osheshi keshe ou ta longo oinima oyo, oye oixuna koshipala shOmwene Kalunga koye.” — Deuteronomion 18:10-12.

Omolwashike Ombiibeli ya londwela sha kwata moiti shi na sha noumhulile?

• Ovo hava kufa ombinga moumhulile ohava kwatafana neendemoni. Ombiibeli oya popya kutya ovaengeli vamwe ova tukulila Kalunga oshibofa nove li ninga ovatondi vaye. (Genesis 6:2; Judas 6) Ovaengeli ovo ovakolokoshi ohava ifanwa eendemoni, ohava pukifa ovanhu okupitila meemhepo doonakufya nomokunyanekela. Ngeenge otwa kala hatu kufa ombinga moinima ya tya ngaho ohatu ka ninga ovatondi vaKalunga.

• Ovo hava kufa ombinga moumhulile ohava xumifa komesho ehongo loipupulu olo kutya ovanhu vamwe ohava dulu okuxunganeka onakwiiwa. Ashike, Kalunga oye aeke a ti: “Ame ou nda holola kehovelo inya tai ke uya, oikulu ei yonale fimbo inai ningwa.” — Jesaja 46:10; Jakob 4:13, 14.

• Ovo hava kufa ombinga moumhulile ohava xumifa komesho ehongo loipupulu olo kutya oonakufya otava dulu okupopya novanamwenyo. Ndele Ombiibeli oya ti: ‘Oonakufya inava shiiva nande osha, osheshi moshovafi omu to i, kamu na nande oshilonga, ediladilo neshiivo ile ounongo.’ — Omuudifi 9:5, 10.

Omolwomatomheno oo, Eendombwedi daJehova ohadi henuka oshinima keshe osho shi na ekwatafano noumhulile. Ohadi henuka yo omalihafifo oo a kwatela mo oinima ngaashi oifalakanena, oishitukila nosho yo oinima oyo i na eenghono di dule dopaushitwe. Omukainhu wedina Maria okwa ti: “Ngeenge omalihafifo okwa kwatela mo oumhulile, ihandi a tale.” *

• Kala wa tokola toko okukala ‘u na eliudo la yela’ koshipala shaJehova nokuhenuka oilonga ile omalihafifo keshe oo a kwatela mo oumhulile. — Oilonga 24:16.

• Hanauna po oshinima keshe u na shi na ekwatafano noumhulile. Lesha Oilonga 19:19, 20, nokutala koshihopaenenwa osho sha tulwa po kOvakriste vomefelemudo lotete moshinima osho.

Dimbuluka kutya: Ngeenge owa efa po oilonga ile omalihafifo e na sha noumhulile, kungaho oto yambidida Jehova. Naasho ohashi hafifa omutima waye! — Omayeletumbulo 27:11.