1 Ovakorinto 14:1-40
14 Twikileni okuulika ohole nokulalakanena* eeshali da dja kuKalunga, unene tuu oshali yokuxunganeka.
2 Ou ta popi omalaka e lili noku lili, ita popi novanhu, ndele ota popi naKalunga, osheshi kape na ou te mu udu molwaashi ota popi oiholekwa iyapuki oyo a hololelwa komhepo iyapuki.
3 Onghee hano, ou ta xunganeke ota pameke vamwe, te va ladipike noku va hekeleka neendjovo daye.
4 Ou ta popi omalaka ote lipameke ye mwene, ndele ou ta xunganeke ota pameke eongalo.
5 Onda hala amushe mu popye omalaka, ashike onda hala unene mu xunganeke. Osheshi ou ha xunganeke oku dule ou ha popi omalaka, kakele ngeenge te a toloka,* opo eongalo li tungwe.
6 Ovamwatate, mbela otashi mu etele ouwa washike ngeenge onde uya kunye handi popi omalaka? Ngeenge onda hala oku mu kwafela, ondi na okuuya kunye handi popi osho nda hololelwa kuKalunga ile handi popi neshiivo ile handi xunganeke ile handi mu hongo.
7 Osho osha faafana noinima ihe na omwenyo, ngaashi oilongifo oyo hai danifwa omusika, kutya nee okaxumbafeta ile onyalilo. Ngeenge omunhu ota shiki okaxumbafeta ile onyalilo nomutono umwe auke, ongahelipi ovanhu tava ka didilika mo omusika oyo ta shiki?
8 Ngeenge omunhu ta shiki enghuma loita, ndele inali yela, olyelye te ke lilongekidila okuya kolwoodi?
9 Sha faafana, ngeenge oto popi omalaka, ndele ito popi monghedi ipu okuudiwa ko, ongahelipi ovanhu tava ka shiiva osho to popi? Kungaho oto ka kala wa fa to popi momhepo.
10 Mounyuni omu na omalaka mahapu, ndele aeshe otaa dulu okuudiwa ko.
11 Ngeenge umwe ta popi, ndele kandi udite ko eendjovo daye, ota kala a fa omunailongo kwaame, naame ohandi kala nda fa omunailongo kuye.
12 Sha faafana, molwaashi nanye omwa hala eeshali dopamhepo, kongeni eeshali dihapu odo tadi pameke eongalo.
13 Onghee hano, keshe ou ta popi omalaka, na ilikane opo a dule oku a toloka.*
14 Ngeenge handi ilikana melaka limwe, haame handi popi, ndele oshali oyo nda pewa okupitila momhepo iyapuki. Onghee ihandi kala ndi udite ko osho handi popi.
15 Mbela oshike shi na okuningwa po? Ondi na okwiilikana noshali yopamhepo, ndele ondi na okupopya oinima i uditiwe ko. Ondi na yo okwiimba noshali yopamhepo, ndele ondi na okupopya oinima i uditiwe ko.
16 Ngeenge to pandula Kalunga to longifa oshali oyo yopamhepo, ongahelipi omunhu wongaho oo e li mokati keni ta ka dula okutya, “Amen” ngeenge ina uda ko osho wa popya?
17 Kungaho oto yandje olupandu monghedi ya yuka, ashike omunhu oo e li mokati keni ita pamekwa.
18 Ohandi pandula Kalunga molwaashi ohandi popi omalaka mahapu ndi mu dule amushe.
19 Ashike nande ongaho, oshixwepo ndi popye oitya itano oyo i uditike meongalo opo ndi honge vamwe, ponhele yokupopya oitya omayovi omulongo yomalaka e lili.
20 Ovamwatate, inamu kala hamu diladila ngaashi ounona, ndele kaleni hamu diladila ngaashi ovakulunhu, ashike kaleni ngaashi ounona mokulonga owii.
21 MOmhango omwa shangwa taku ti: “Jehova okwa ti, ‘Ovanhu ava ohandi ka popya navo momalaka oshinailongo nohandi ka longifa ovanhu ovo vehe shii, ndele nande ongaho itava ka pwilikina nge.’”
22 Okupopya omalaka hako onghedi yokuhonga ovaitaveli, ndele ovovo inava itavela, ofimbo okuxunganeka kaku fi kwaavo inava itavela, ndele okwaavo va itavela.
23 Ngeenge omwa ongala pamwe amushe, ndele amushe otamu popi omalaka, ndele tape uya ovanhu vongaho ile ovo vehe fi ovaitaveli, mbela itava ka diladila kutya omwa pilalala?
24 Ashike ngeenge amushe otamu xunganeke, ndele mokati keni tamu uya omunhu wongaho ile oo ehe fi omwiitaveli, eendjovo deni amushe otadi ke mu linyengifa a pukuluke noku likonakone nawa.
25 Opo nee oikala yomutima waye otai ka hololwa, note ke linyongamena nokuhambelela Kalunga, ta ti: “Kalunga oku li shili mokati keni.”
26 Ovamwatate, oshike shi na okuningwa po? Ngeenge tamu ongala pamwe, umwe na imbile Kalunga, umwe na honge, umwe na popye oinima oyo a hololelwa kuKalunga, umwe na popye omalaka naumwe ne a toloke. Oinima aishe nai ningwe nelalakano lokutungafana.
27 Ngeenge ope na ovo tava popi omalaka, nava kale ashike vavali ile vatatu, ashike napa kale ou te a toloka.*
28 Ndele ngeenge kape na ou ta toloka,* nava kale va mwena, ndele tave lipopile momitima davo nokupopya naKalunga.
29 Ovaprofeti vavali ile vatatu nava popye, ndele vakwao nava konakone eityo.
30 Ndele ngeenge umwe okwa hololelwa sha kuKalunga, oo a hangwa ta popi na mwene.
31 Osheshi omunhu ashike umwe ta dulu okuxunganeka poshikando opo aveshe ve lihonge nova tuwe omukumo.
32 Ovaprofeti aveshe ovo va pewa oshali yokuxunganeka okupitila momhepo iyapuki ove na okukala ve na elipangelo.
33 Osheshi Kalunga ke fi Kalunga kedundakano, ndele oKalunga kombili.
Ngaashi hashi ningwa momaongalo aeshe ovayapuki,
34 ovakainhu nava kale va mwena momaongalo, osheshi inava pitikwa va popye. Ponhele yaasho, nava kale hava dulika ngaashi sha popiwa mOmhango.
35 Ngeenge ove na osho vehe udite ko nawa, nava ka pule ovashamane vavo komaumbo, molwaashi oshi fifa ohoni komukainhu okupopya moipafi yeongalo.
36 Mbela eendjovo daKalunga oda dja kunye, ile onye amuke mwe di pewa?
37 Ngeenge ope na ou ta diladila kutya ye omuprofeti ile okwa pewa oshali yopamhepo, na dimine kutya oinima ei handi mu shangele oipango yOmwene.
38 Ndele ou te lidimbike oinima ei, Kalunga naye ote ke mu lidimbika.
39 Onghee hano, ovamwatate, kaleni nokukonga mwa mana mo oshali yokuxunganeka, ndele inamu kelela ou ta popi omalaka.
40 Ndele oinima aishe nai ningwe monghedi iwa nopalandulafano.
Eshangelo lopedu
^ Ile “nokukonga mwa mana mo.”
^ Ile “te a fatulula.”
^ Ile “oku a fatulula.”
^ Ile “te a fatulula.”
^ Ile “ta fatulula.”
