1 Ovakorinto 3:1-23
3 Ovamwatate, inandi dula okupopya nanye ngaashi handi popi novanhu ovo hava wilikwa komhepo iyapuki, ndele ongaashi novanhu vopambelela, ouhanana muKristus.
2 Onda li nde mu pa omashini, ndele haendja da pama molwaashi kamwa li mwa pama natango. Ndele fiyo opaife inamu pama
3 molwaashi natango ohamu diladila pambelela. Eshi mokati keni mu na ondubo nomashilafano, mbela osho itashi ulike kutya omu li pambelela nohamu ende ngaashi ovanhu vomounyuni?
4 Ngeenge umwe ota ti: “Ame ondaPaulus,” ofimbo umwe ta ti: “Ame ondaApollos,” mbela itamu ende ngaashi ovanhu vomounyuni?
5 Hano Apollos olyelye, na Paulus oye lyelye? Ovo ovapiya ovo ve mu kwafela mu ninge ovaitaveli kekwafo lOmwene.
6 Ame onda twika, Apollos okwa tekela, ndele Kalunga oye ta kulike.
7 Kalunga ou ta kulike oye e na okufimanekwa, ndele hamunhu oo a twika ile a tekela.
8 Ou a twika naau a tekela vamwe aveke,* ndele keshe umwe ota ka pewa ondjabi yaye she likolelela koilonga yaye.
9 Fye ovalongi pamwe naKalunga. Ndele nye epya olo tali longwa kuKalunga, etungo laKalunga.
10 Omolwefilonghenda laKalunga, onda dika ekanghameno ngaashi omutungi onghulungu,* ndele umwe ota tungile ko kulo. Keshe umwe na tale nghee ta tungile ko.
11 Kape na ou ta dulu okudika po ekanghameno limwe li lili lihe fi olo la dikwa po nale, sha hala okutya Jesus Kristus.
12 Ngeenge umwe okwa tungile kekanghameno olo noshingoli, noshisilveri, nomamanya ondilo, noiti, noihati ile nomwiidi,
13 efiku otali uya eshi oilonga yakeshe umwe tai ka hololwa okupitila momundilo, shaashi omundilo otau ka ulika kutya oilonga yakeshe umwe oya tya ngahelipi.
14 Ngeenge osho omunhu a tunga inashi hanaunwa po komundilo, ota ka mona ondjabi,
15 ndele ngeenge osha hanaunwa po komundilo, ota kanifa shihapu, ashike ye mwene ota ka xupifwa a fa a xupa momundilo.
16 Mbela kamu shi shii kutya nye otembeli yaKalunga nosho yo kutya omhepo yaKalunga oi li munye?
17 Ngeenge ope na ou ta hanauna po otembeli yaKalunga, Kalunga ote ke mu hanauna po, osheshi otembeli yaKalunga oiyapuki, notembeli oyo onye.
18 Inamu lifufya: Ngeenge ope na ou ta diladila kutya omunaendunge mounyuni ou,* na kale ngaashi elai opo a ninge omunaendunge.
19 Ounongo wounyuni ou oo oulai koshipala shaKalunga, molwaashi omishangwa oda ti: “Kalunga okwa efa ovanaendunge ve liyule nomakoto avo vene.”
20 Natango omishangwa oda ti: “Jehova oku shi shii kutya omadiladilo ovanaendunge oongaho.”
21 Onghee inapa kala ou te litangele ovanhu, osheshi oinima aishe oyeni
22 kutya nee oPaulus, ile oApollos ile oKefas* ile ounyuni ile omwenyo ile efyo ile oinima oyo i li ko paife ile oyoyo tai ke uya, aishe oyeni,
23 ndele nye omwaKristus, na Kristus owaKalunga.
Eshangelo lopedu
^ Ile “ove na elalakano limwe.”
^ Ile “omuunganeki woilonga omunaendunge.”
^ Ile “monghalelo ei yoinima.” Tala omafatululo oitya.
^ Oo ha ifanwa yo Petrus.
