1 Ovakorinto 9:1-27
9 Mbela inandi manguluka okuninga osho nda hala? Hano kandi fi omuyapostoli? Mbela inandi mona Omwene wetu Jesus? Mbela nye kamu fi oidjemo yoilonga yange mOmwene?
2 Nonande kandi fi omuyapostoli wavamwe, ondi li omuyapostoli weni. Osheshi nye omu li oumbangi oo tau ulike kutya ame omuyapostoli wOmwene.
3 Ohandi ti ngaha kwaava tava kembaula nge:
4 Mbela katu na emanguluko* lokulya nokunwa?
5 Mbela katu na emanguluko lokukala tu na ovakulukadi Ovakriste ngaashi ovayapostoli vakwetu novamwaxe vOmwene nosho yo Kefas?*
6 Ile mbela ofye atuke naBarnabas tuhe na okweefa po okulonga oilonga yokomake?
7 Mbela ope na omukwaita oo he lifutile eshi e li moukwaita? Olyelye ta twike oshikokola shomandjebele, ndele ita li oiimati yasho? Ile olyelye ha lifa oimuna, ndele ita li omashini ayo?
8 Mbela oinima ei handi popi oi li ashike omadiladilo opanhu? Ile mbela Omhango nayo oya popya kombinga yayo?
9 Omhango yaMoses oya ti: “Ino manga ongobe komulungu ngeenge tai xu oilya.” Mbela Kalunga okwa li ta yavelele eengobe?
10 Ile okwa popya ngaho omolwouwa wetu? Okwa popya ngaho omolwouwa wetu, molwaashi omunhu oo ta pulula naau ta xu otave shi ningi opo va mone oilya.
11 Ngeenge otwa kuna oinima ya dja kuKalunga mokati keni, mbela osha puka okupula mu tu pe oipumbiwa yopalutu?
12 Ngeenge vamwe ove na oufemba woku mu pula oipumbiwa yopalutu, mbela fye katu u na tu va dule? Nonande otu na oufemba, inatu mu pula sha, ndele otwe lididimikila oinima aishe opo onghundana iwa kombinga yaKristus iha iwe moshipala.
13 Mbela kamu shi shii kutya ovo hava longo oilonga iyapuki ohava li oikulya yomotembeli, naavo hava yakula koaltari ohava li oinima oyo hai yambwa koaltari?
14 Sha faafana, Omwene okwa ti kutya ovo tava udifa onghundana iwa ove na okupalulwa okupitila monghundana iwa.
15 Ndele nande ongaho, inandi mu pula sha noinandi shanga kombinga yaasho opo ngeno ndi ningilwe oinima oyo, osheshi oshixwepo kwaame okufya shi dulife okukufwa oufemba wange wokulitanga.
16 Kandi na etomheno lokulitanga eshi handi udifa onghundana iwa molwaashi oi li oshilonga nde shi lineekelelwa. Ndele woo kwaame ngeenge itandi udifa onghundana iwa!
17 Ngeenge ohandi shi ningi nehalo liwa, ohandi ka mona ondjabi, ndele nonande itandi shi ningi nehalo liwa, ondi na oku shi ninga molwaashi onde shi lineekelelwa kuKalunga.
18 Ohandi ka mona ondjabi yashike? Ondjabi yange oyo okuudifa onghundana iwa oshali. Nokungaho, itandi ka pula oinima oyo ndi na oufemba wokupula opo ndi udife onghundana iwa.
19 Nonande kandi fi omupiya wovanhu aveshe, onde lininga omupiya waaveshe opo ndi kwafele ovanhu vahapu ngaashi tashi dulika.
20 KOvajuda, onda kala nda fa Omujuda opo ndi kwafele Ovajuda; kwaavo ve li koshi yomhango, onda kala nda fa ndi li koshi yomhango nonande nghi li koshi yomhango opo ndi kwafele ovo ve li koshi yomhango.
21 Ndele opo ndi kwafele ovo vehe li koshi yomhango, onda kala nda fa ndihe li koshi yomhango nonande ondi li koshi yomhango yaKalunga nohandi dulika komhango yaKristus.
22 Kwaavo va nghundipala, onda kala nda fa nda nghundipala opo ndi va kwafele. Ohandi ningi keshe shimwe opo ndi kwafele ovanhu vomaludi aeshe.
23 Ohandi ningi keshe shimwe omolwonghundana iwa opo ndi i udifile ovanhu vakwetu.
24 Mbela kamu shi shii kutya ovatondoki aveshe mefiyafanepo ohava tondoka, ndele umwe aeke ha pewa ondjabi? Tondokeni mwa mana mo opo mu ka mone ondjabi.
25 Keshe oo ta kufa ombinga mefiyafanepo* oha kala e na elipangelo moinima aishe. Ohava ningi ngaho opo va ka mone oshishani shopakafimbo, ndele fye ohatu ka mona osho tashi kalelele.
26 Onghee hano, itandi tondoka nda fa ndihe shii oku nda finda; itandi kondjo nda fa handi denge momhepo,
27 ndele ohandi denge* olutu lange li dulike ngaashi omupika, opo ndiha udifile ovanhu vakwetu ofimbo ame handi kala inandi hokiwa kuKalunga.
Eshangelo lopedu
^ Eln., “oufemba.”
^ Oo ha ifanwa yo Petrus.
^ Ile “omutondoki keshe.”
^ Ile “ohandi handukile; ohandi pe outekuduliko.”
