2 Johannes 1:1-13
1 Ame omunamido,* ohandi shangele omukainhu omuhoololwa nosho yo ovana vaye ovo ndi hole unene, haame andike, ndele naaveshe ovo ve hole oshili,
2 omolwoshili oyo i li momitima detu notai kala mo fiyo alushe.
3 Kalunga oo e li Tate womeulu nOmona waye Jesus Kristus otave ke tu honga omahongo ashili noku tu ulikila ohole. Otave ke tu fila onghenda noku tu pa ombili.
4 Onda hafa neenghono eshi nda mona vamwe vomovamwoye va diinina oshili, naasho oshi li metwokumwe noshipango shaTate.
5 Onghee hano, omukainhu omuhoololwa, oshipango eshi handi ku shangele u diinine kashi fi shipe, ndele osheshi twa pewa okudja pehovelo shi na sha nokukala tu holafane.
6 Ohole oya kwatela mo okukala hatu diinine oipango yaye. Oshipango osho ngaashi mwe shi uda pehovelo osheshi kutya, kaleni mu holafane.
7 Lungameni molwaashi mounyuni omwe uya ovapukifi vahapu ovo inava dimina kutya Jesus Kristus okwe uyile e li omunhu wopambelela. Ovo ovo ovapukifi nooantikristus.*
8 Lipashukileni nye vene, muha kanife ouwa oo wa dja moilonga yetu youdiinini, opo mu ka mone ondjabi pauyadi.
9 Keshe oo ita shikula omahongo aKristus nota hongo omahongo amwe e lili, ina hokiwa kuKalunga. Ndele keshe oo ha shikula omahongo aKristus ota kala a hokiwa kuTate nOmona.
10 Ngeenge umwe okwe uya kunye, ndele ite mu hongo omahongo oo e li metwokumwe naasho Kristus a honga, inamu mu tambula momaumbo eni noinamu mu popifa.
11 Osheshi keshe oo ta popifa omunhu a tya ngaho ota yambidida oilonga yaye ii.
12 Nonande ondi na oinima ihapu oyo ndi na oku mu lombwela, inandi hala oku i shanga, ndele onda diladila okuuya kunye tu popyeni okanya nokanya, opo ehafo leni li hapupale.
13 Ovana vamumwanyoko omukainhu, omuhoololwa mukweni, otave ku kundile po.
