2 Ovakorinto 12:1-21
12 Ondi na okupopya nelitango kombinga yomamoniko oo nda ulikilwa kOmwene nosho yo omatumwalaka oo a pa nge, nonande osho itashi etele nge ouwa.
2 Ondi shii omulumenhu umwe oo e li omuhongwa waKristus, oo a li a twalwa meulu etitatu omido 14 da pita, kutya nee okwa twalwa mo palutu ile omonghedi imwe i lili, nghi shi shii; Kalunga oye e shi shii.
3 Omulumenhu oo ondi mu shii. Okwa li a twalwa moparadisa, kutya nee opalutu ile omonghedi imwe i lili, nghi shi shii; Kalunga oye e shi shii.
4 Ndele fimbo a li moparadisa, okwa uda eendjovo dihe fi okutumbulwa noinadi pitikwa pamhango okupopiwa kovanhu.
5 Ohandi litange omolwomulumenhu oo, ashike itandi litange molwange mwene, ndele omolwoungone wange.
6 Osheshi nonande ngeno onda hala okulitanga, ondi li omunaendunge molwaashi ohandi popi oshili. Ndele itandi litange opo paha kale nande oumwe ta pandula nge unene shi na sha naasho a uda kwaame ile a mona mwaame,
7 eshi nda pewa omatumwalaka makumwifi.
Ndele opo ndihe linenepeke unene, onda pewa ekiya mombelela, omweengeli waSatana a kale ta denge nge opo ndihe linenepeke unene.
8 Onda indila Omwene lwoikando itatu opo a kufe nge ekiya olo.
9 Opo nee okwa tya kwaame: “Efilonghenda lange nali ku wanene, osheshi eenghono dange otadi dulu oku ku pameka ngeenge wa nghundipala.” Onghee ohandi litangele oungone wange opo eenghono daKristus di uvike nge ngaashi etwali.
10 Ohandi kala nda hafa ngeenge ndi na oungone, handi tukwa, handi hepekwa, ndi li moluhepo nosho yo momaudjuu omolwaKristus. Osheshi ngeenge ndi li oshingone, ohandi kala omunaenghono.
11 Ohandi popi ngaashi omunhu ehe na eendunge omolweni. Osheshi ngeno omwa popilile nge mouwa, ngeno inandi popya ngaho. Nonande ame omunhu wongaho, ondi dule mukeshe shimwe ovayapostoli veni ovo have limonikifa va fa hava longo ouwa.
12 Onda longa mokati keni nelididimiko linene oilonga oyo tai ulike kutya ame omuyapostoli, ngaashi omadidiliko, oikumwifilonga nosho yo oilonganghono.
13 Molwaashi inandi mu twika nande omutengi washa, osho osho she mu ningifa mu kale mwa yooloka ko komaongalo makwao. Ndele mbela ngaho onda ninga epuko? Ngeenge osho, diminei nge po.
14 Taleni, paife onde lilongekida okuuya kunye oshikando oshititatu, ashike itandi ke mu twika nande omutengi. Osheshi ame inandi hala oiniwe yeni, ndele onye nda hala okumona. Ounona havo ve na okukongela ovadali vavo oinima, ndele ovadali ovo ve na oku va kongela.
15 Ohandi ka kala nda hafa okulongifa keshe osho ndi na nokuli nokuyandja omwenyo wange omolweni.* Ngeenge ondi mu hole neenghono, mbela nanye kamu na okukala mu hole nge shi dulife opo?
16 Nonande inandi mu twika nande omutengi washa, otamu ti onde mu kengelela nonde mu tela omwiyo.
17 Mbela onde mu kengelela okupitila mwaavo nda li nde mu tumina?
18 Onda li nda ladipika Titus nomumwatate umwe ve uye kunye. Mbela omwa li mwa kengelelwa kuTitus? Mbela katwa li twa longela kumwe navo nokukatuka monghedi ya faafana?
19 Mbela omwa kala tamu diladila kutya otwa kala hatu lipopile? Tu li ovashikuli vaKristus, ohatu popi oshili koshipala shaKalunga. Ovamwatate ovaholike, keshe osho hatu ningi, ohatu shi ningi opo tu mu pameke.
20 Eshi handi ke uya kunye, ondi wete kutya elihumbato leni itali ka kala ngaashi nda teelela, neenghatu dange itadi ka kala ngaashi mwa teelela. Mokati keni otashi dulika mu na eenhamanana, ondubo, ehandu la pitilila, omatukauko, omalundilo, olwaambo, ounhwa nosho yo edundakano.
21 Ngeenge nde uya vali kunye, otashi dulika ndi ka kale nda fya ohoni koshipala shaKalunga eshi ndi li mokati keni nohandi ka nyika oluhodi omolwavahapu ovo va li va nyona, ndele inave lidilulula nokweefa po okuhenoukoshoki, oluhaelo* nosho yo okunyona vehe nouxwenge.*
Eshangelo lopedu
^ Ile “omolweemwenyo deni.”
^ MOshigreka, porneia. Tala omafatululo oitya.
^ Ile “okunyona nopehe na okufya ohoni.” MOshigreka, aselgeia. Tala omafatululo oitya.
