2 Ovatessalonika 1:1-12
1 Ame Paulus, pamwe naSilvanus* naTimoteus, ohatu shangele eongalo laKalunga Tate nolOmwene Jesus Kristus lokuTessalonika:
2 Efilonghenda nombili yaKalunga Tate noyOmwene Jesus Kristus nai kale pamwe nanye.
3 Ohatu pandula alushe Kalunga omolweni ovamwatate. Osho osha yeleka molwaashi eitavelo leni otali ende tali pame, nohole yeni yokuholafana otai ende tai kulu.
4 Osho oshe tu ningifa tu mu tange momaongalo aKalunga omolweitavelo leni naashi tamu lididimikile omahepeko nomaudjuu* aeshe oo tamu shakeneke.*
5 Osho otashi ulike kutya Kalunga oha tokola pauyuki, noku wete kutya omwa wana okuya mOuhamba waye, oo tamu hepekelwa.
6 Molwaashi Kalunga omuyuki, ota ka handukila ovahepeki veni.
7 Ndele nye ovo tamu hepekwa otamu ka mangululwa pamwe nafye eshi Omwene Jesus ta ka holoka okudja meulu pamwe novaengeli vaye ovanaenghono,
8 e na omundilo wa xwama, nota ka handukila ovo inava shiiva Kalunga nosho yo ovo ihava dulika konghundana iwa i na sha nOmwene wetu Jesus.
9 Omwene ote ke va tokola noku va hanauna po fiyo alushe, opo ehe va mone vali novaha mone vali eenghono daye dinene.
10 Eshi Omwene ta ka tumbalekwa pamwe novayapuki vaye, aveshe ovo ve mu itavela otave ke mu fimaneka. Ndele molwaashi omwa itavela oinima oyo twe mu lombwela, nanye otamu ka kala mokati kavo.
11 Onghee ohatu mu ilikanene alushe nokwiindila Kalunga e mu tale ko mwa wana okumona omwenyo oo e mu ifanena, a wanife po filufilu neenghono daye ouwa aushe oo a hala oku mu ningila noku manife oilonga oyo tamu longo omolweitavelo.
12 Kungaho edina lOmwene wetu Jesus otali ka tumbalekwa omolweni, nanye otamu ka tumbalekwa yo eshi mu na ekwatafano naye omolwefilonghenda laKalunga ketu nolOmwene Jesus Kristus.
