2 Timoteus 2:1-26
2 Omumwange, lipameka mefilonghenda olo wa ulikilwa kuKristus Jesus,
2 noinima oyo wa uda kwaame noya kolekwa keembangi dihapu i lineekelela ovalumenhu ovadiinini ovo va wana filufilu okuhonga vakwao.
3 U li omukwaita muwa waKristus Jesus, lididimikila omaudjuu.
4 Omukwaita ita dulu okulonga vali oilonga imwe i lili* opo a mone ouxupilo, molwaashi okwa hala okuhafifa ou e mu pa oilonga youkwaita.
5 Sha faafana, hakeshe ou ha kufa ombinga momaudano ha pewa oshishani, kakele ngeenge a dulika keemhango domaudano.
6 Omunamapya oo ha longo noudiinini oye e na okulya tete oilikolomwa yomepya laye.
7 Kala ho diladila moule kombinga yaashi handi ku lombwele; Omwene ote ke ku kwafela u ude ko oinima aishe.
8 Dimbuluka kutya Jesus Kristus okwa nyumunwa koufi nokwa dja moludalo laDavid,* naasho oshi li metwokumwe nonghundana iwa oyo handi udifa,
9 oyo handi hepekelwa noya tulifa nge modolongo onga omukolokoshi. Ashike nande ongaho, kape na ou ta dulu okuya moshipala eendjovo daKalunga.
10 Onghee ohandi lididimikile oinima aishe omolwovahoololwa, opo navo va ka xupifwe okupitila muKristus Jesus, nova ka mone efimano laalushe.
11 Eendjovo edi odi shii okulineekelwa edi tadi ti: Ngeenge otwa fya pamwe naye, ohatu ka kala yo nomwenyo pamwe naye;
12 ngeenge otwa twikile okulididimika, ohatu ka pangela pamwe naye tu li eehamba; ngeenge otwe mu lidimbike, naye ote ke tu lidimbika;
13 ngeenge otwa kala tuhe fi ovadiinini, ye ota kala omudiinini, osheshi iha longo osho shi li omhinge nomaukwatya aye nonelalakano laye.
14 Twikila oku va dimbulukifa kombinga yoinima oyo, noku va lombwela* koshipala shaKalunga vaha twe eemhata di na sha noitya, odo dihe na ekwafo lasha nohadi nyono po eitavelo laavo tave di pwilikine.
15 Longa noudiinini opo u kale wa hokiwa kuKalunga, u kale omunailonga ita fi ohoni oshilonga shaye, u shii okuyelifa nawa eendjovo doshili.
16 Kala yo kokule naavo hava popi eendjovo dongaho odo itadi fimanekifa Kalunga, osheshi otadi ku ehenifa kokule naye,
17 molwaashi eendjovo davo ohadi tandavele ngaashi oshipute tashi hoko. Vamwe vomuvo ongaashi Himeneus naFiletus.
18 Ovalumenhu ovo ova efa po oshili, tava ti kutya enyumuko ola ningwa nale, notava nyono po eitavelo lavamwe.
19 Kalunga okwa dika po ekanghameno la kola notali kala la pama, li na eshangelo tali ti: “Jehova ovo vaye oku va shii,” nosho yo “Keshe ou ta ifana edina Jehova na efe po okulonga owii.”
20 Meumbo la kula ihamu kala ashike oikwatelwa yoingoli noyoisilveri, ndele ohamu kala yo yoiti noyedu; imwe ohai kwatelwa oinima oyo ya fimana ofimbo imwe oyoyo inai fimana.
21 Keshe ou te likaleke kokule noikwatelwa yoinima oyo inai fimana ota kala ngaashi oikwatelwa yoinima ya fimana, ta yapulwa nota kala oshikwatelwa shiwa komwene waye nokukala a wana okulonga oshilonga keshe shiwa.
22 Onghee hano, inda onhapo okahalu kounyasha, ndele to lalakanene ouyuki, eitavelo, ohole nombili, pamwe naavo hava ifana edina lOmwene nomutima wa yela.
23 Shimwe vali, henuka eemhata dongaho noda nyika oulai, molwaashi ou shi shii kutya ohadi eta omalwoodi.
24 Osheshi omupiya wOmwene ke na okulwa, ndele okwa pumbwa okukala e na onghenda* novanhu aveshe, a wana okuhonga, iha shunifile vamwe owii
25 noha popi nomwenyo muwa naavo vehe hole okutambula ko omapukululo. Kalunga otashi dulika e ke va pe omhito ve lidilulule* nova shiive nawa oshili,
26 ndele tava ka mona kutya ova li va kwatwa ko nomwenyo kOndiaboli va longe ehalo layo, opo nee otava ka manguluka mo momwiyo wayo.
Eshangelo lopedu
^ Ile tashi dulika, “oilonga yakeshe efiku.”
^ Eln., “mombuto yaDavid.”
^ Eln., “nokuyandja oundombwedi nawanawa.”
^ Ile “elungi.”
^ Ile “va lundulule omadiladilo avo.”
