Ehololo 2:1-29
2 “Shangela omweengeli weongalo lokuEfeso to ti: Ou e na eenyofi heyali meke laye lokolulyo nota ende mokati koikwatelwalamba iheyali yoshingoli ota ti ngaha:
2 ‘Ondi shii oilonga nelididimiko loye nonokutya iho pitike ovakolokoshi va kale mokati keni, noho konakona ovo tave liti kutya ovayapostoli, ndele kave fi shili ovayapostoli, otava popi ashike oipupulu.
3 Oto twikile okulididimika omolwedina lange noino teka omukumo.
4 Ndele ito shi endifa nawa moshinima shimwe; owa kanifa ohole yoye yotete.
5 “‘Didilika kutya ku li ngaashi wa li nale, onghee lidilulula opo u longe oilonga oyo wa li ho longo nale. Ngeenge hasho, ohandi uya kwoove nohandi ka kufa po oshikwatelwalamba shoye ponhele yasho.
6 Ndele oto shi endifa nawa moshinima vali shimwe: ou tonde oilonga yoshimhanga shOvanikolaiti, oyo naame yo ndi tonde.
7 Ou e na omatwi na ude osho omhepo iyapuki tai lombwele omaongalo tai ti: Omufindani ohandi ke mu pitika a lye komuti womwenyo oo u li moparadisa yaKalunga.’
8 “Shangela omweengeli weongalo lokuSmirna to ti: ‘Ou wotete nowaxuuninwa,’ ou a file nokwa nyumuka ota ti ngaha:
9 ‘Ondi shii omaudjuu noluhepo loye, ndele nande ongaho ove oshipuna. Ondi shii yo kutya oho shekwa kovanhu ovo hava ti kutya Ovajuda, ndele kave fi Ovajuda shili. Ovanhu ovo ovo ongudu* yaSatana.
10 Ino tila omahepeko oo e li poku ku hanga. Tala, Ondiaboli otai ka tulifa vamwe vomunye modolongo, opo mu yelekwe filufilu, notamu ka hepekwa oule womafiku omulongo. Onghee kala omudiinini fiyo omefyo, opo nee ohandi ke ku pa ondjabi* yomwenyo.
11 Ou e na omatwi na ude osho omhepo iyapuki tai lombwele omaongalo tai ti: Omufindani ita ka lola efyo etivali.’
12 “Shangela omweengeli weongalo lokuPergamo to ti: Ou e na eongamukonda lile leememo keembinga mbali ota ti ngaha:
13 ‘Ondi shii apa ho kala, sha hala okutya polukalwapangelo laSatana, ndele natango ou li omudiinini kwaame* noino efa po eitavelo loye nokuli nopefimbo opo ondombwedi yange idiinini Antipas ya dipaelwa moipafi yoye ponhele opo hapa kala Satana.
14 “‘Ndele ito shi endifa nawa moinima imwe molwaashi owa pitika mokati keni mu kale vamwe ovo va kanyatela kehongo laBileam, oo a honga Balak a yule Ovaisrael va lye oinima ya yambelwa oikalunga nova ye moluhaelo.*
15 Shimwe vali, mokati keni omu na yo ovo va kanyatela kehongo loshimhanga shOvanikolaiti.
16 Onghee hano, lidilulula, ngeenge hasho, ohandi uya kwoove mepakumo leisho, nohandi ke va lwifa neongamukonda lile tali di mokanya kange.
17 “‘Ou e na omatwi na ude osho omhepo iyapuki tai lombwele omaongalo tai ti: Omufindani ohandi ke mu pa omanna a holekwa nohandi ke mu pa emanya litoka kwa shangwa edina lipe olo li shiivike ashike kwaao te li pewa.’
18 “Shangela omweengeli weongalo lokuTiatira to ti: Omona waKalunga oo e na omesho a fa omalaka omundilo neemhadi da fa ongopolo ya tulwa momundilo ota ti ngaha:
19 ‘Ondi shii oilonga yoye, ohole, eitavelo, oilongayakulo nosho yo elididimiko loye, noilonga yoye yaxuuninwa oi dule ei yotete.
20 “‘Ndele ohandi ku pe oushima moshinima shimwe; owe lipwililikila omukainhu Isabel oo te liti kutya omuprofeti nota hongo nokuhongaula ovapiya vange va ye moluhaelo* nova lye oinima ya yambelwa oikalunga.
21 Onde mu pa omhito e lidilulule, ndele ina hala okweefa po oluhaelo.*
22 Tala, ohandi ke mu etela mafiku omukifi wa kwata moiti, naavo tava haele naye ohandi ke va etela oudjuu munene ngeenge inava efa po okulonga oilonga ya fa yaye.
23 Ovana vaye ohandi ke va dipaa nomukifi wa kwata moiti, opo omaongalo aeshe a shiive kutya aame handi konakona omitima nosho yo omadiladilo omoule,* nohandi ka pa keshe umwe ondjabi she likolelela koilonga yaye.
24 “‘Ndele ohandi mu lombwele amushe ovo mu li muTiatira, amushe ovo inamu tambula ko ehongo laIsabel, ovo muhe shii oinima oyo haku tiwa kutya “oinima yomoule yaSatana” kutya: Itandi mu twike vali omutengi umwe.
25 Ngaashi nde mu lombwela nale, twikileni okulonga oilonga iwa fiyo ohandi uya.
26 Omufindani ou ta diinine fiyo okexulilo osho nde mu lombwela ohandi ke mu pa eenghonopangelo a pangele oiwana,
27 ngaashi Tate e di pa nge. Nomufindani oo ota ka denga* oiwana nodibo yoshivela, opo e i nyanyaule ngaashi oitoo yedu.
28 Ohandi ke mu pa onyofi yokeengula.
29 Ou e na omatwi na ude osho omhepo iyapuki tai lombwele omaongalo.’
Eshangelo lopedu
^ Eln., “oshinagoga.”
^ Eln., “oshishani.”
^ Eln., “owa kala wa diinina edina lange.”
^ Tala omafatululo oitya.
^ Tala omafatululo oitya.
^ MOshigreka, porneia. Tala omafatululo oitya.
^ Ile “omaliudo omoule.” Eln., “eefiyo.”
^ Ile “pangela.”
