Ehololo 4:1-11
4 Tala, konima yaasho, onda mona omuvelo wa yeuluka meulu nonda uda ondaka yotete ya ingida ya fa enghuma tai ti kwaame: “Ila oku ndi ku ulikile oinima oyo tai ka ningwa.”
2 Diva konima yaasho, onda nwefwa mo keenghono domhepo yaKalunga, ndele tala, onda mona olukalwapangelo meulu nosho yo umwe e li ko omutumba.
3 Oo e li omutumba kolukalwapangelo okwa li ta monika a fa emanya londilo lishunga* nosho yo emanya londilo litilyana,* nolukalwapangelo ola dingililwa kouta wodula wa fa emanya londilo litwima omafo.*
4 Olukalwapangelo ola li la dingililwa komalukalwapangelo 24, nokomalukalwapangelo oo onda mona ko ovakulunhu 24 ve li omutumba va djala oikutu itoka noishani yoingoli komitwe davo.
5 Onda mona oluvadi nonda uda eendaka nomingungumo tadi di kolukalwapangelo, nokomesho yolukalwapangelo okwa li ku na eelamba heyali da tema omundilo, odo tadi faneke eemhepo heyali daKalunga.
6 Komesho yolukalwapangelo oku na oshinima sha fa efuta, shi liwetikile sha fa ekende nosha fa okawe.*
Mokati nomomudingonoko wolukalwapangelo omu na oinamwenyo ine i na omesho mahapu komesho nokonima.
7 Oshinamwenyo shotete otashi monika sha fa onghoshi, oshitivali osha fa ongobe yomhedi, oshititatu oshi na oshipala sha fa shomunhu noshitine osha fa onhwa.
8 Keshe shimwe shomoinamwenyo oyo ine oshi na omavava ahamano, nomavava oo oku na omesho meni nokombada. Ohai kala tai popi oufiku nomutenya tai ti: “Jehova Kalunga omuyapuki, omuyapuki, omuyapuki nOmunaenghono adishe, oo a li ko, a kala ko note uya.”
9 Efimbo keshe oinamwenyo oyo tai fimaneke notai tumbaleke nokupandula oo e li omutumba kolukalwapangelo, oo ta kala ko fiyo alushe,
10 ovakulunhu 24 ohava tu eengolo komesho yaau e li kolukalwapangelo, oo ta kala ko fiyo alushe, noku mu fimaneka, nohava dula ko oishani yavo komesho yolukalwapangelo, tava ti:
11 “Jehova Kalunga ketu, oove wa wana okupewa efimano, etumbalo neenghono molwaashi oove wa shita oinima aishe, nomolwehalo loye, oya shitwa noi li po.”
Eshangelo lopedu
^ Ile “emanya loyaspis.”
^ Ile “emanya losardis.”
^ Ile “emanya losmaragidi.”
^ Ile “emanya lokristali.”
