Johannes 18:1-40
-
Judas ta kengelele Jesus (1-9)
-
Petrus ta longifa eongamukonda (10, 11)
-
Jesus ta twalwa kuHannas (12-14)
-
Petrus te lidimbike Jesus oshikando shotete (15-18)
-
Jesus e li koshipala shaHannas (19-24)
-
Petrus te lidimbike Jesus oshikando oshitivali noshititatu (25-27)
-
Jesus e li koshipala shaPilatus (28-40)
-
“Ouhamba wange kau fi womounyuni ou” (36)
-
18 Konima eshi Jesus a popya oinima oyo, okwa ya koshikunino pamwe novahongwa vaye va tauluka olufilu laKidron.*
2 Ashike Judas, omukengeleli waye, naye okwa li e shii onhele oyo molwaashi Jesus oko a li ha kala luhapu novahongwa vaye.
3 Ndele Judas okwe uya pamwe nongudu yovakwaita nosho yo ovakeleli votembeli va tumwa kovapristeri ovakulunhu nokOvafarisai, nove uya ve na eenyika, eelamba noilwifo.
4 Molwaashi Jesus okwa li e shii ashishe osho sha li poku ke mu ningilwa, okwa ehena komesho, ndele ta ti kuvo: “Olyelye tamu kongo?”
5 Ova ti: “OJesus Omunasaret.” Okwa tya kuvo: “Aame ou.” Ndele Judas omukengeleli waye naye okwa li pamwe nongudu oyo.
6 Eshi Jesus a popya kutya, “Aame ou,” ova shuna konima ndele tave lidenge pedu.
7 Opo nee okwe va pula vali ta ti: “Olyelye tamu kongo?” Ova ti: “OJesus Omunasaret.”
8 Jesus okwa ti: “Onde mu lombwela kutya aame ou. Ngeenge aame tamu kongo, efeni ovalumenhu ava va ye.”
9 Osho osha wanifa po osho a popile ta ti: “Ovo wa pa nge inandi kanifa po nande oumwe.”
10 Ndele Simon Petrus, oo a li e na eongamukonda, okwe li pweya mo nokuteta ko okutwi kwokolulyo kwomupiya womupristeri munene. Edina lomupiya oo oMalkus.
11 Opo nee Jesus okwa tya kuPetrus: “Shunifa eongamukonda moshilaleko. Mbela nghi na okunwa eholo olo Tate a pa nge?”
12 Ndele ovakwaita, omukulunhu wetangakwaita nosho yo ovakeleli votembeli vOvajuda ova kwata po Jesus noku mu manga.
13 Opo nee ove mu twala kuHannas, xemweno yaKajafas, oo a li omupristeri munene omudo oo.
14 Kajafas oye a lombwelele Ovajuda kutya oshiwa kuvo omunhu umwe a fye ponhele yovanhu aveshe.
15 Simon Petrus nomuhongwa mukwao umwe ova li va landula Jesus. Omuhongwa oo okwa li e shiivike komupristeri munene nokwa li a ya pamwe naJesus momukala womupristeri munene,
16 ndele Petrus okwa li a fyaala pondje pomuvelo. Opo nee omuhongwa mukwao oo a li e shiivike komupristeri munene okwa ka popya nomupiya okakadona oo ha kelele pomuvelo opo Petrus e uye meni.
17 Omupiya okakadona oo okwa tya kuPetrus: “Hano naave ku fi omuhongwa womulumenhu ou?” Petrus okwa ti: “Ahowe.”
18 Ndele ovapiya nosho yo ovakeleli votembeli ova li va fikama pomundilo oo va tema tava xuxumukwa molwaashi okwa li ku na outalala. Petrus naye okwa li ofika ta xuxumukwa pamwe navo.
19 Opo nee omupristeri omukulunhu okwa pula Jesus kombinga yovahongwa vaye nosho yo ehongo laye.
20 Jesus okwa tya kuye: “Onda kala handi popi moipafi yovanhu. Onda kala handi hongo alushe moshinagoga nomotembeli, omo Ovajuda aveshe hava ongala, noinandi popya sha meholeko.
21 Omolwashike to pulile nge? Pula ovo va uda osho nde va lombwela. Ovo ve shii osho nda popya.”
22 Eshi Jesus a popya ngaho, umwe womovakeleli votembeli ovo va li ofika popepi okwe mu denga enghava moshipala, ndele ta ti: “Osho ngoo u na okunyamukula omupristeri omukulunhu ngaho?”
23 Jesus okwa tya kuye: “Ngeenge onda popya sha sha puka, shi lombwele nge, ndele ngeenge osho nda popya oshi li mondjila, oto dengele nge shike?”
24 Opo nee Hannas okwa mangifa Jesus, ndele te mu tumu komupristeri munene Kajafas.
25 Ndele Simon Petrus okwa li ofika ta xuxumukwa. Opo nee ovanhu ove mu pula tava ti: “Hano naave ku fi umwe vomovahongwa vaye?” Petrus okwe likala ta ti: “Ahowe.”
26 Umwe womovapiya vomupristeri munene, omupambele womulumenhu oo a li a tetwa okutwi kuPetrus, okwa ti: “Hano inandi ku mona u li naye moshikunino?”
27 Petrus okwe likala vali, ndele diva ekondobolo ola kwena.
28 Ndele ongula inene ova kufa Jesus meumbo laKajafas nove mu twala keumbo langoloneya Pilatus. Ashike vo inava ya mo meumbo langoloneya opo vehe linyateke va dule oku ka lya Opaasa.
29 Pilatus okwe uya kuvo pondje, ndele ta ti: “Omulumenhu ou okwa longa owii washike?”
30 Ove mu nyamukula tava ti: “Ngeno omulumenhu ou ka li a longa owii washa,* ngeno inatu mu eta kwoove.”
31 Opo nee Pilatus okwa tya kuvo: “Mu kufei po mu mu tokole pamhango yeni.” Ovajuda ova tya kuye: “Pamhango inatu pitikwa tu dipae omunhu.”
32 Osho osha li tashi wanifa po eendjovo odo da popiwa kuJesus opo a ulike kutya ota ka fya efyo la tya ngahelipi.
33 Pilatus okwa shuna vali meumbo, ndele ta pula Jesus ta ti: “Oove Ohamba yOvajuda?”
34 Jesus okwe mu nyamukula ta ti: “Oto pula nge ngoo shili wa hala okushiiva ile osheshi wa uda nge kuvamwe?”
35 Pilatus okwa ti: “Ame nghi fi Omujuda. Oshiwana sheni novapristeri ovakulunhu ovo ve ku yandja momake ange. Owa ninga shike?”
36 Jesus okwa nyamukula ta ti: “Ouhamba wange kau fi oshitukulwa shounyuni ou. Ngeno owa li oshitukulwa shounyuni ou, ovashikuli vange ngeno ova lwa opo ndiha yandjwe momake Ovajuda. Ashike Ouhamba wange kau fi womounyuni ou.”
37 Pilatus okwa tya kuye: “Tashi ti ove ohamba?” Jesus okwe mu nyamukula ta ti: “Osho naanaa ngaashi wa popya kutya ame ohamba. Onda dalwa nonde uya mounyuni opo ndi hepaulule oshili. Ndele keshe ou ta kala metwokumwe noshili ota dulika kondaka yange.”
38 Opo nee Pilatus okwa tya kuye: “Oshili oshike?”
Konima eshi a popya ngaho, okwa ya vali pondje kOvajuda ndele ta ti kuvo: “Inandi mu mona ondjo yasha.
39 Ndele oshi li onghedindjikilile oku mu mangululila omulumenhu umwe pOpaasa. Inamu hala ndi mu mangululile Ohamba yOvajuda?”
40 Ova ingida vali tava ti: “Tu mangululila Barabas, ponhele yomulumenhu ou!” Ndele Barabas okwa li omukolokoshi.
