Judas 1:1-25
1 Ame Judas, omupiya waJesus Kristus, nomumwaina waJakob, ohandi shangele ovaifanwa ovo ve holike kuKalunga Tate nova amenwa omolwaJesus Kristus:
2 Kalunga ne mu hapupalifile efilonghenda, ombili nohole yaye.
3 Ovamwatate ovaholike, nonande onda li nda halelela oku mu shangela shi na sha nexupifo letweni, ondi wete sha wapala oku mu ladipika mu kondjele eitavelo olo la pewa ovayapuki lumwe nofiyo alushe.
4 Onda hala oku mu shangela molwaashi ope na ovalumenhu vamwe ve livakela mokati keni ovo va li va xunganekwa nale mOmishangwa. Ovahenakalunga ovo ohava longifa efilonghenda laKalunga ketu li li elipopilo lokunyona vehe na ouxwenge* nokave fi ovadiinini kOmwene wetu Jesus Kristus.
5 Nonande oinima aishe ei omu i shii nale, onda hala oku mu dimbulukifa kutya konima eshi Jehova a li a xupifa ovanhu muEgipiti, lwanima okwa ka hanauna po ovo va li vehe na eitavelo.
6 Novaengeli ava va li inava diinina omalukalwa avo nova fiya po eenhele davo, okwe va pandeka fiyo alushe nomalyenge momilaulu va teelele etokolo mefiku linene.
7 Sha faafana, Sodom naGomorra noilando oyo ya li ye i dingilila oya li ya duka moluhaelo,* ya hongaulwa noye liyandja kouhalu wombelela, noya li ya handukilwa nomundilo waalushe,* nokungaho oi li oshihopaenenwa tashi tu londwele.
8 Kakele kaasho, ovalumenhu ovo ve livakela mokati keni ohava diladila oinima ii, ve na elihumbato inali koshoka, va dina ovo ve na eenghonopangelo nohava popile mowii ovo va wana okufimanekwa.
9 Eshi Mikael, omweengeli omukulunhu, va twa eemhata nOndiaboli shi na sha noshimhu shaMoses, Mikael ka li a hala oku i tokola noku i ula eendjovo dii, ndele okwa ti: “Jehova ne ku handukile.”
10 Ashike ovalumenhu ovo ohava popile mowii oinima aishe oyo vehe shii. Ndele oinima oyo ve shii nohava ningi, ohave i ningi nopehe na okudiladila va fa oinamwenyo, notai va nyono po.
11 Oshinyikifa oluhodi neenghono eshi va shikula oshihopaenenwa shaKain. Ova li va nyona opo va pewe ondjabi ngaashi Bileam nova ngongota ngaashi Kora, naasho oshe va twala mehanauno.
12 Eshi mu li navo poivilo yeni yokuhafela pamwe, ova fa ovafita ovo ihava yavala, ndele ohave lipalula ashike vo vene, ove li ngaashi omamanya ehe wetike e li koshi yomeva, nongaashi oilemo tai twalwaatwalwa komhepo. Ova fa omiti dihe na oiimati pokufu, da fya filufilu* noda dudwa mo.
13 Ova fa omakufikufi efuta oo haa umbile oimbodi komunghulo, osho ngeno sha wana oku va fifa ohoni, nova fa eenyofi di li mehalakano, notava ka kala momilaulu fokofoko fiyo alushe.
14 Henok, oo a li omutiheyali okudja kuAdam, naye okwa xunganeka shi na sha navo ta ti: “Tala, Jehova ote uya novayapuki vaye omayovi omilongo,
15 opo va tokole nokuhandukila ovahenakalunga aveshe omolwoilonga yavo aishe youhenakalunga oyo hava longo nomolwoku mu popila mowii neendjovo dikukutu.”
16 Ovalumenhu ovo ohava ngongota noinava wanenwa kwaasho ve na. Ohava hongaulwa nokuliyandja komahalo avo mai, have litade nohava mbweenga ovanhu* omolwouwa wavo vene.
17 Ndele nye, ovamwatate ovaholike, dimbulukeni eendjovo odo da li da popiwa* kovayapostoli vOmwene wetu Jesus Kristus,
18 eshi va tile: “Momafiku axuuninwa otapa ka kala ovasheki tava hongaulwa nokuliyandja komahalo avo oulunde.”
19 Ovanhu va tya ngaho ovo tava eta etukauko meongalo, have lihumbata va fa oinamwenyo* nokave na omhepo yaKalunga.
20 Ndele nye ovamwatate ovaholike, pamekeni eitavelo leni liyapuki nokwiilikana metwokumwe nomhepo iyapuki,
21 opo mu twikile okulonga ashishe osho tashi ningifa Kalunga a kale e mu hole, ofimbo mwa teelela efilonghenda lOmwene wetu Jesus Kristus mu na eteelelo lomwenyo waalushe.
22 Twikileni okufila onghenda ovo ve na omalimbililo,
23 va xupifeni moku va vakula momundilo. Twikileni yo okufila onghenda ovo va nyona, tamu shi ningi nelungi opo muha wile momanyono a faafana.*
24 Ndele ou ta dulu oku mu amena muha punduke noku mu kaleka ofika mu na ehafo nomwa koshoka komesho yolukalwapangelo laye liyapuki,
25 Kalunga aeke Omuxupifi wetu, ou te tu xupifa okupitila muJesus Kristus Omwene wetu, efimano olaye, nounene, neenghono neenghonopangelo okudja nale, paife nofiyo alushe. Amen.
Eshangelo lopedu
^ Ile “nopehe na okufya ohoni.” MOshigreka aselgeia. Tala omafatululo oitya.
^ Tala omafatululo oitya.
^ Luhapu Ombiibeli ohai longifa omundilo okuulika kehanauno laalushe. Tala omafatululo oitya “Gehenna.”
^ Eln., “da fya luvali.”
^ Ile “nohava tumbaleke vamwe.”
^ Ile “oinima oyo ya xunganekwa.”
^ Ile “hava diladila pambelela.”
^ Eln., “nonande omu tonde oshikutu sha nyatekwa kombelela.”
