Oilonga 21:1-40
21 Konima eshi twa tukauka navo twa nyika oluhodi, otwa londa oshikepa ndele hatu i twa yukilila kuKos, nomefiku la shikula ko otwa ya kuRodos, nokudja opo otwa ya kuPatara.
2 Eshi twa fika muPatara, otwa londa moshikepa oyo twa hanga ya finda kuFoinikia.
3 Eshi twa mona onhunhu yaKipro, otwe i enda kolumosho* twa finda kuSiria ndele hatu ka tula muTirus, omo oshikepa ya ka yelula eendongelwa.
4 Opo nee otwa konga ovahongwa notwe va mona ndele hatu kala puvo omafiku aheyali. Ovahongwa ova kala tava lombwele Paulus aha ye kuJerusalem ngaashi va shiivifilwa okupitila momhepo iyapuki.
5 Eshi efimbo letu lokuya la fika, otwa ya, ndele aveshe, mwa kwatelwa ovakainhu nounona, ove tu findikila fiyo okondje yoshilando. Opo nee otwa twa eengolo pomunghulofuta, notwa ilikana,
6 ndele hatu lekelafana. Okudja opo otwa londa oshikepa, ofimbo vo va shuna komaumbo avo.
7 Otwa dja noshikepa muTirus ndele hatu i kuPtolemais; otwa talela po ovamwatate notwa kala navo oule wefiku limwe.
8 Mefiku la shikula ko, otwa ya kuKesarea ndele hatu kala meumbo laFilippus omuudifi wonghundana iwa, oo a li umwe womovalumenhu vaheyali ovo va li va hoololwa kovayapostoli muJerusalem.
9 Filippus okwa li e na ovanakadona vane inava hombolwa* ovo va li hava xunganeke.
10 Ndele eshi twa kala muKesarea omafiku mahapu, omwe uya omuprofeti Agabus a dja kuJudea.
11 Okwe uya kufye nokwa kufa omwiya waPaulus nokwe u limanga keemhadi nokomaoko ndele ta ti: “Kalunga okwa popya okupitila momhepo iyapuki ta ti, ‘Mwene womwiya ou osho ta ka mangwa ngaha kOvajuda muJerusalem, notave ke mu yandja momake ovanhu vomoiwana imwe.’”
12 Eshi fye nosho yo ovo va li po twe shi uda, otwe mu kunghilila aha ye kuJerusalem.
13 Paulus okwa ti: “Omolwashike tamu lili notamu teya nge omukumo?* Kaleni mu shi shii kutya inandi lilongekidila ashike oku ka mangwa po, ndele onde lilongekidila yo oku ka dipaelwa kuJerusalem omolwedina lOmwene Jesus.”
14 Ndele molwaashi inatu dula oku mu kelela, otwe mu efa,* ndele hatu ti: “Ehalo laJehova nali wanifwe.”
15 Okudja opo, otwe lilongekida ndele hatu i kuJerusalem.
16 Ovahongwa vamwe vokuKesarea ova li yo va ya pamwe nafye, nove tu findikila keumbo laMnason Omukipro, umwe womovahongwa votete, oko twa ka kala hatu di.
17 Eshi twa fika muJerusalem, ovamwatate ova li ve tu tambula ko nehafo.
18 Ndele mefiku la shikula ko, Paulus okwa ya pamwe nafye kuJakob, oko twa hanga ovakulunhu aveshe voshiwana.
19 Opo nee Paulus okwe va popifa nokwe va lombwela kombinga yoinima aishe oyo Kalunga a longa mokati koiwana okupitila moilonga yokuudifa yaPaulus.
20 Eshi va uda ngaho, ova hovela okutanga Kalunga, ndele tava ti kuPaulus: “Omumwatate, ope na Ovajuda omayovi mahapu ovo va ninga ovaitaveli, naaveshe ohava diinine Omhango.
21 Ndele ova uda omutotolombo kutya oto hongo Ovajuda aveshe ovo ve lihanena moiwana vaha diinine Omhango yaMoses, eshi to va lombwele vaha pitife ovana vavo etanda ile vaha shikule eenghedindjikilile davo.
22 Ndele molwaashi otava ka uda kutya owa fika muJerusalem, oshike tu na okuninga po?
23 Ninga ngaashi hatu ku lombwele: Otu na ovalumenhu vane va ninga eano.
24 Inda navo mu ka yelifwe metwokumwe nomhango noku va futila va kululife omitwe davo. Opo nee keshe umwe ota ka mona kutya ou na elihumbato liwa noho diinine Omhango, nonokutya oinima oyo to popilwa kai fi yoshili.
25 Ashike ovaitaveli ovo va dja moiwana imwe otwe va tumina onhumwafo omo twa shanga etokolo olo twa ninga kutya nava henuke oluhaelo,* nokulikaleka kokule nohonde, oinamwenyo ya pondwa* nosho yo oinima oyo ya yambelwa oikalunga.”
26 Ndele mefiku la shikula ko, Paulus okwa ya pamwe novalumenhu ovo nove liyelifa metwokumwe nomhango. Opo nee ova ya motembeli nova shiivifa kutya omafiku okuliyelifa otaa xulu naini opo ku dule okuyambwa omayambo ponhele yavo aveshe mefiku olo.
27 Eshi omafiku aheyali okuliyelifa a li pokupwa ko, Ovajuda ovo va dja kuAsia eshi va mona Paulus e li motembeli, ova xwaxwameka ongudu yovanhu, ndele tave mu kwata po.
28 Opo nee ova ingida tava ti: “Ovaisrael nye, tu kwafeleni! Omulumenhu ou oye ta hongo ovanhu keshe pamwe va kale ve li omhinge noshiwana shetu, nOmhango yetu nosho yo nonhele ei. Kakele kaasho, okwa eta yo Ovagreka motembeli nokwa nyateka onhele ei iyapuki.”
29 Ova popya ngaho molwaashi ova li va mona Trofimus Omuefeso ta ende pamwe naPaulus moshilando, nova li tava diladila kutya Paulus okwe mu eta motembeli.
30 Ndele moshilando ashishe omwa tukuluka omapiyaano, novanhu ove uya tava tondoka, ndele tava kwata po Paulus nove mu kokololela pondje yotembeli, opo nee ova idila diva omivelo.
31 Fimbo va li va hala okudipaa Paulus, omukulunhu wetangakwaita okwa shiivifilwa kutya muJerusalem ashishe omu na omapiyaano.
32 Opo nee okwa ya diva pamwe novakwaita nosho yo novanambelewa vavo, ndele tava tondokele kuvo. Eshi ovanhu va mona omukulunhu wetangakwaita novakwaita, ova efa okudenga Paulus.
33 Ndele omukulunhu wetangakwaita okwa kwatifa po Paulus nokwa yandja elombwelo a mangwe nomalyenge avali, opo nee okwe mu pula kutya oye lyelye nokwa ninga shike.
34 Vamwe vomongudu oyo ova li va hovela okwiingida tava popi oinima i lili noku lili. Ndele molwaashi ova li tava weelele unene, omukulunhu wetangakwaita ka li a dula okumona kutya oshike sha ningwa po, onghee okwa yandja elombwelo Paulus a twalwe kokamba yovakwaita.
35 Eshi a fika peetalapa, okwa tumbwa po kovakwaita molwaashi ovanhu ova li va hala oku mu denga,
36 nova kala ve va landula tava ingida tava ti: “Mu dipaeni!”
37 Fimbo Paulus a li pokutwalwa mokamba yovakwaita, okwa pula omukulunhu wetangakwaita ta ti: “Ohandi dulu okupopya naave?” Omukulunhu wetangakwaita okwa ti: “Oho popi Oshigreka?
38 Hano haave Omuegipiti oo a li a xwaxwameka mombuwa ovalumenhu 4 000, va homata va twe ondubo nepangelo?”
39 Paulus okwa ti: “Ame Omujuda wokuTarsus muKilikia, odalele yomoshilando sha shiivika nawa. Onghee ohandi ku indile u pitike nge ndi popye novanhu.”
40 Eshi Paulus a pewa epitikilo, okwa kala ofika peetalapa ndele ta udikile ovanhu neke va mwene. Eshi va mwena, okwa popya navo mOshiheberi ta ti:
Eshangelo lopedu
^ Ile “kombinga yetuliloshikepa.”
^ Eln., “oukadona elela.”
^ Ile “notamu shololifa nge.”
^ Eln., “otwa mwena.”
^ MOshigreka, porneia. Tala omafatululo oitya.
^ Ile “ya dipawa inai dja ohonde.”
