Oilonga 22:1-30
22 “Ovalumenhu nye, ovamwatate nootate, pwilikineni ndi mu lombwele osho sha ningwa po.”
2 Eshi va uda Paulus ta popi navo mOshiheberi, ova mwena filufilu, opo nee okwa ti:
3 “Ame Omujuda, nda dalelwa muTarsus muKilikia. Onda fikola muJerusalem nonda hongwa kuGamaliel, nda hongwa okudiinina Omhango yootatekulululwa nokulongela Kalunga nouladi ngaashi nye amushe hamu shi ningi kunena.
4 Onda li handi mangifa po ovalumenhu novakainhu ovo hava shikula Ondjila yOmwene nohandi va tulifa meedolongo, handi va hepeke noku va dipaifa.
5 Omupristeri munene nongudu aishe yovakulunhu voshiwana otai dulu okukoleka oshinima osho. Ova li va pa nge eenhumwafo ndi ye nado kOvajuda vakwetu kuDamaskus ndi ka kwate po ovaitaveli ovo va li ko, ndi va ete kuJerusalem va mangwa opo ve uye va handukilwe.
6 “Ndele fimbo nda li popepi naDamaskus, efimbo lomutenya, ohaluka onda minikilwa kouyelele wa twa wa dja meulu,
7 opo nee onde lidenga po nonda uda ondaka tai ti: ‘Saul, Saul, omolwashike to hepeke nge?’
8 Onda ti: ‘Omufimanekwa, oove lyelye?’ Opo nee okwa ti: ‘Aame Jesus Omunasaret ou to hepeke.’
9 Ovalumenhu ovo va li pamwe naame ova mona ouyelele, ashike inava uda ondaka oyo ya li tai popi naame.
10 Onde mu pula nda ti: ‘Omufimanekwa, oshike ndi na okuninga?’ Okwa lombwela nge ta ti: ‘Fikama u ye muDamaskus, opo nee oto ka lombwelwa ashishe osho u na okuninga.’
11 Ndele muDamaskus onda ya mo ndi kwetiwe kovalumenhu ovo va li pamwe naame molwaashi kanda li ndi wete ko omolwouyelele oo wa li wa twikifa nge.
12 “Opo nee omulumenhu wedina Ananias, omutilikalunga, ha diinine Omhango noku na epopilo liwa mokati kOvajuda aveshe ovo va li muDamaskus,
13 okwa li e uya kwaame. Okwa fikama pwaame, ndele ta ti: ‘Omumwatate Saul, twikuluka!’ Pefimbo opo tuu opo, onda twikuluka nonde mu mona.
14 Okwa ti: ‘Kalunga kootatekulululwa okwe ku hoolola u shiive ehalo laye nou mone omuyuki nokuuda ondaka yaye,
15 osheshi oto ka hepaululila ovanhu aveshe oinima oyo wa mona nowa uda kuye.
16 Omolwashike to ongaonga? Inda u ka ninginifwe; nongeenge oto ifana edina laye, omatimba oye otaa dimwa po.’
17 “Ndele eshi nda shuna kuJerusalem, nonda li handi ilikana motembeli, onda mona memoniko
18 Omwene ta ti: ‘Dja mo diva muJerusalem molwaashi ovanhu itava ka pwilikina kwaasho to va hepaululile kombinga yange.’
19 Opo nee onda tya kuye: ‘Omwene, ove shi shii nawa kutya onda kala handi tulifa ovanhu aveshe modolongo ovo ve ku itavela noku va dengifa moinagoga.
20 Eshi ondombwedi yoye Stefanus ya li tai dipawa, naame onda li nde shi panda nonda li handi pashukile oikutu yokombada yaavo va li tave mu dipaa.’
21 Okwa tya vali kwaame: ‘Inda, osheshi ohandi ke ku tuma koiwana yokokule.’”
22 Ova kala tava pwilikine kuPaulus fiyo osheshi a mana okupopya eendjovo odo. Opo nee ova ingida tava ti: “Omulumenhu oo ina wana vali okukala nomwenyo, mu dipaeni!”
23 Molwaashi ova li tava ingida, tava kupulashi oikutu yavo yokombada nokufunda omadu,
24 omukulunhu wetangakwaita okwa yandja elombwelo Paulus a etwe mokamba yovakwaita a pulwapulwe noku dengwe, opo omukulunhu wetangakwaita a mone kutya omolwashike naanaa ovanhu va li tava ingida Paulus a dipawe.
25 Ndele eshi ve mu manga opo ngeno ve mu denge, Paulus okwa tya komunambelewa wetangakwaita oo a li a fikama puye: “Oshi li tuu pamhango okudenga Omuroma* ofimbo ina tokolwa?”
26 Eshi omunambelewa oo e shi uda, okwa ya komukulunhu wetangakwaita, ndele te mu pula ta ti: “Oshike wa hala okuningila omulumenhu ou Omuroma?”
27 Opo nee omukulunhu wetangakwaita okwa ehena kuPaulus, ndele ta ti kuye: “Lombwele nge, tashi ti ove Omuroma?” Paulus okwa ti: “Heeno.”
28 Omukulunhu wetangakwaita okwa ti: “Ame oukwashiwana waRoma onde u landa oimaliwa ihapu.” Paulus okwa ti: “Ashike ame odalele yaRoma.”
29 Opo nee ovalumenhu ovo va li poku mu pulapula ove mu efa diva, nomukulunhu wetangakwaita okwa li a tila eshi a uda kutya Paulus Omuroma nokwa hangwa e mu mangifa nomalyenge.
30 Ndele molwaashi okwa li a hala okushiiva kutya omolwashike Paulus a li ta patanekwa kOvajuda, okwe mu mangulula mo mefiku la landula ko, nokwa yandja elombwelo opo ovapristeri ovakulunhu noilyo aishe yOmhangu yoPombada yOvajuda i ongale. Opo nee okwa eta Paulus nokwe mu fikamifa komesho yavo.
Eshangelo lopedu
^ Ile “omukwashiwana waRoma.”
