Oilonga 23:1-35
23 Eshi Paulus a tala oilyo yOmhangu yoPombada yOvajuda, okwa ti: “Ovalumenhu nye ovamwatate, ondi na eliudo la yela filufilu koshipala shaKalunga fiyo okunena.”
2 Opo nee omupristeri munene Ananias okwa lombwela ovo va li va fikama puPaulus ve mu denge komulungu.
3 Paulus okwa tya kuye: “Kalunga ote ku handukile, omunaihelele ove.* Oto tokola nge metwokumwe nOmhango, ndele pefimbo opo tuu opo oto nyono Omhango eshi to ti nandi dengwe.”
4 Ovo va li po ofika ova ti: “Oto tuku omupristeri munene waKalunga?”
5 Paulus okwa ti: “Ovamwatate, ngha li ndi shii ngeenge oye omupristeri munene. Omishangwa oda ti: ‘Ino sheka omupangeli woshiwana sheni.’”
6 Molwaashi Paulus okwa li e shii kutya mongudu omo omwa li Ovasadukai nOvafarisai, okwa popya mokule mOmhangu yoPombada yOvajuda ta ti: “Ovalumenhu nye ovamwatate, ame Omufarisai, omona wOvafarisai. Ohandi pangulwa molwaashi nda itavela menyumuko.”
7 Eshi a popya ngaho, pokati kOvafarisai nOvasadukai opa holoka eenhamanana, ndele oshoongalele tashi tukauka.
8 Ovasadukai ova li va itavela kutya kaku na enyumuko, ovaengeli ile oishitwa yopamhepo, ashike Ovafarisai ova li va itavela* kutya oinima aishe oyo oko i li.
9 Opo nee opa holoka omapiyaano, ndele vamwe vomovanongo vomishangwa vOvafarisai ova fikama va handuka neenghono, tava ti: “Omulumenhu ou inatu mu mona epuko lasha. Pamwe okwa popya nomweengeli ile noshishitwa shopamhepo?”
10 Eshi omapiyaano a hapupala, omukulunhu wetangakwaita okwa lombwela ovakwaita va ka kufe mo Paulus mokati kovanhu ve mu twale kokamba yovakwaita molwaashi okwa li a tila kutya pamwe otave mu dipaa.
11 Opo nee oufiku wa landula ko, Omwene okwa fikama puPaulus, ndele ta ti: “Kala u na omukumo! Ngaashi wa hepaulula nge nawanawa muJerusalem, ou na yo okuhepaulula nge nomuRoma.”
12 Eshi kwa sha, Ovajuda ova pangela omhangela nokwaana kutya, tashi ya nashi uye, itava li sha ile va nwe sha fimbo inava dipaa Paulus.
13 Eano olo ola li la ningwa kovalumenhu ve dule 40.
14 Ovalumenhu ovo ova ya kovapristeri ovakulunhu nokovakulunhu voshiwana, ndele tava ti: “Otwa ana kutya, tashi ya nashi uye, itatu li sha fimbo inatu dipaa Paulus.
15 Ndele paife nye nosho yo oilyo yOmhangu yoPombada yOvajuda lombweleni omukulunhu wetangakwaita a ete Paulus kunye mwa fa ngeno mwa hala oku mu pulapula vali. Opo nee fimbo e li mondjila, fye ohatu mu dipaa.”
16 Eshi omutekulu waPaulus a uda omhangela yavo, okwa ya a ka lombwele Paulus kokamba yovakwaita.
17 Opo nee Paulus okwa ifana umwe womovanambelewa vetangakwaita, ndele ta ti kuye: “Twala omunyasha ou komukulunhu wetangakwaita, osheshi okwa hala oku mu lombwela sha.”
18 Omunambelewa oo okwa twala omunyasha oo komukulunhu wetangakwaita, ndele ta ti: “Omunadolongo Paulus okwa pula nge ndi ku etele omunyasha ou opo e ku lombwele sha.”
19 Omukulunhu wetangakwaita okwe mu kwata mokwooko nokwe mu kufa po, ndele te mu pula ta ti: “Owa hala okulombwela nge shike?”
20 Okwa ti: “Ovajuda ova hala oku ku indila u twale Paulus kOmhangu yoPombada yOvajuda mongula, va fa ngeno va hala oku mu pulapula vali.
21 Ndele ino shi pitika nande, osheshi ope na ovalumenhu ve dulife po 40 ve mu nangela, nova ana kutya, tashi ya nashi uye, itava li sha ile va nwe sha fimbo inave mu dipaa. Paife ova teelela ashike u va pe epitikilo.”
22 Omukulunhu wetangakwaita okwa kunghilila omunyasha oo, nokwe mu lekela ta ti: “Ino lombwela nande omunhu kutya owa shiivifila nge kombinga yoshinima eshi.”
23 Opo nee omukulunhu wetangakwaita okwa ifana ovanambelewa vavali ndele ta ti: “Longekideni ovakwaita 200, ovalondinghambe 70 novalumenhu 200 va homata omaongamukonda va ye kuKesarea pomuwoi woufiku.*
24 Kakele kaasho, longekidileni Paulus onghambe, opo a dule okuya kungoloneya Feliks e li meameno.”
25 Opo nee omukulunhu wetangakwaita okwa shanga onhumwafo tai ti:
26 “Aame Klaudius Lisias, handi ku shangele onhumwafo ei omufimanekwa ngoloneya Feliks.
27 Omulumenhu oo okwa li a kwatwa po kOvajuda nova li poku mu dipaa, ndele onda endelela novakwaita vange ndi mu xupife molwaashi onda uda kutya Omuroma.
28 Onda li nda hala okuuda kutya omolwashike tave mu pataneke, nomolwaasho nda li nde mu twala kOmhangu yoPombada yOvajuda.
29 Onda mona kutya ota patanekwa omolwoinima i na sha nOmhango yOvajuda, ndele kape na sha sha wana oku mu dipaifa ile oku mu tulifa modolongo.
30 Molwaashi onda uda omhangela oyo va pangela shi na sha naye, onde mu tuma kwoove diva nonda lombwela ovapataneki vaye ve uye ve ku lombwele oupyakadi wavo.”
31 Opo nee ovakwaita ova ya naPaulus ngaashi va lombwelwa, noku mu twala oufiku kuAntipatria.
32 Mefiku la landula ko, Paulus okwa li a ya pamwe novalondinghambe, ashike ovakwaita vamwe ova li va shuna kokamba yavo.
33 Ovalondinghambe ova ya kuKesarea, ndele tava twala onhumwafo naPaulus kungoloneya.
34 Eshi ngoloneya e i lesha, okwa pula Paulus kutya okwa dja koshitukulwalongo shilipi, ndele Paulus ta ti kutya okwa dja kuKilikia.
35 Ngoloneya okwa ti: “Ohandi ka pwilikina kwoove ngeenge ovapataneki voye va fiki.” Opo nee okwa yandja elombwelo opo Paulus a nangelwe mombala yaHerodes.
Eshangelo lopedu
^ Ile “owa fa ekuma la kaka la paindwa nopainda itoka.”
^ Ile “hava hepaulula moipafi.”
^ Eln., “potundi onhinhatu lwaapo.”
