Oilonga 6:1-15
6 Ndele pefimbo linya eshi omuvalu wovahongwa tau hapupala, Ovajuda ovo hava popi Oshigreka ova li tava ngongotele Ovajuda ovo hava popi Oshiheberi, molwaashi ovafiyekadi vavo ova li hava lumbulwa oikulya.
2 Opo nee ovayapostoli 12 ova ifana ovahongwa aveshe, ndele tava ti: “Inashi yuka* kufye tu efe po okulipyakidila neendjovo daKalunga tu ka tukule oikulya.
3 Onghee ovamwatate, hoololeni ovalumenhu vaheyali mokati keni ve shii okulineekelwa,* ve yadi omhepo iyapuki nounongo opo tu va nangeke po va wanife po oshinakuwanifwa osho;
4 ofimbo fye hatu twikile okwiilikana nokulipyakidila neendjovo daKalunga.”
5 Ovahongwa aveshe ova li va hafela etokolo olo, ndele tava hoolola Stefanus omulumenhu oo e na eitavelo la kola nomhepo iyapuki, Filippus, Prokorus, Nikanor, Timon, Parmena naNikolaus wokuAntiokia oo a ninga weitavelo lOshijuda.
6 Opo nee ovahongwa ove va eta kovayapostoli, nokonima eshi ovayapostoli va ilikana, ove va tenheka omake.
7 Ndele eendjovo daKalunga oda twikila okutandavela, nomuvalu wovahongwa owa kala nokuhapupala neenghono muJerusalem; nongudu inene yovapristeri oya li ya ninga ovaitaveli.
8 Stefanus okwa li e na onghenda nokwa pewa eenghono kuKalunga, ndele ta longo oikumwifilonga nomadidiliko mokati kovanhu.
9 Ovalumenhu vamwe vongudu hai ifanwa Ovamangululwa ove uya navamwe vomOvakireni, Ovaaleksandria nosho yo vamwe va dja kuKilikia nokuAsia, nova li tava pataneke Stefanus.
10 Ndele kava li va dula oku mu tomha, molwaashi okwa li ta popi nounongo nokekwafo lomhepo iyapuki.
11 Opo nee ova heka ovalumenhu vamwe meholeko va tye: “Otwe mu uda ta sheke Moses naKalunga.”
12 Ovapataneki ovo ova xwaxwameka ovanhu, ovakulunhu voshiwana novanongo vomishangwa, ndele tave uya diva kuStefanus, tave mu kwata po nove mu twala kOmhangu yoPombada yOvajuda.
13 Onghee ove uya neembangi doipupulu, tadi ti: “Omulumenhu ou ota twikile okupopila mowii Omhango nosho yo onhele ei iyapuki.
14 Pashihopaenenwa, otwa uda ta popi kutya Jesus Omunasaret ota ka ngumauna po onhele ei nokulundulula eenghedimhango odo twa pewa kuMoses.”
15 Eshi aveshe ovo va li omutumba mOmhangu yoPombada yOvajuda ve mu tala, oshipala shaye osha li tashi monika sha fa shomweengeli.
