Oilonga 7:1-60
7 Omupristeri munene okwa ti: “Oinima oyo tai popiwa oyoshili tuu?”
2 Stefanus okwa ti: “Ovamwatate nootate, pwilikineni. Kalunga koshinge okwe lihololela tatekulululwa Abraham eshi a li muMesopotamia fimbo ina ya a ka kale kuHaran,
3 ndele ta ti kuye: ‘Dja mo medu leni nokufiya po ovapambele voye u ye koshilongo osho handi ke ku ulikila.’
4 Opo nee okwa dja mo medu lOvakaldi nokwa ya a ka kale kuHaran. Konima eshi xe a fya, Kalunga okwe mu lombwela a tembukile moshilongo omo mu li paife.
5 Ndele Kalunga ine mu pa nande okatukulwa kanini kedu, ashike okwe mu udanekela kutya otali ningi laye, nokonima ololudalo laye,* nonande pomhito opo ka li e na oludalo.
6 Kakele kaasho, Kalunga okwe mu lombwela kutya oludalo laye* otali ka ninga ovanailongo novanhu otave ke va ninga ovapika noku va hepeka oule womido 400.
7 Kalunga okwa ti: ‘Ohandi ka tokola oshiwana osho tashi ke va ninga ovapika. Opo nee otava ka dja mo notava ka longela nge oilonga iyapuki monhele ei.’
8 “Kalunga okwa ninga eudafano naAbraham kutya ye novanamati aveshe otava ka pita etanda. Onghee Abraham okwa pitifa Isak etanda konima yomafiku 8 okudja eshi a dalwa. Ndele Isak okwa dala Jakob, na Jakob okwa dala ootatekulululwa 12.
9 Ootatekulululwa ovo ova li va twila omumwaxe Josef ondubo, ndele tave mu landifa po kuEgipiti. Ashike Kalunga okwa kala pamwe naye,
10 ndele okwe mu xupifa momaudjuu aye aeshe nokwe mu pa ounongo opo a kale a hokiwa kuFarao ohamba yaEgipiti. Opo nee Farao okwe mu nangeka po a pashukile Egipiti neumbo laye alishe.
11 Ndele muEgipiti nomuKanaan ashishe omwa li mwa holoka ondjala inene, nootatekulululwa kava li ve na eshi tava li.
12 Eshi Jakob a uda kutya kuEgipiti oku na oikulya,* okwa tuma ko ootatekulululwa oshikando shotete.
13 Oshikando oshitivali, Josef okwe lihololela ovamwaxe, opo nee Farao okwa shiiva ovapambele vaJosef.
14 Josef okwa tumina xe Jakob etumwalaka opo e uye kuEgipiti novapambele vaye aveshe; kumwe aveshe ova li 75.*
15 Opo nee Jakob okwa ya kuEgipiti ndele oko a fila, nootatekulululwa oko yo va fila.
16 Ndele ove va twala kuSikem noku va paka mombila oyo Abraham a li a landa kovanamati vaHamor muSikem.
17 “Eshi efimbo laKalunga lokuwanifa po eudaneko olo a li a udanekela Abraham la li pokufika, Ovaisrael ovo va li muEgipiti ova li va hapupala neenghono
18 fiyo osheshi muEgipiti mwe uya ohamba imwe oyo inai shiiva Josef.
19 Ohamba oyo oya li ya kengelela ootatekulululwa noye va lombwela va ekeleshi ounona vavo opo va fye.
20 Pefimbo opo opo pa dalwa Moses nokwa li muwa koshipala shaKalunga. Okwa kala* meumbo laxe oule weemwedi nhatu.
21 Eshi ovadali vaye va li va fininikwa ve mu ekeleshi, omonakadona waFarao okwe mu kufa po ndele te mu tekula e li onga omonamati waye.
22 Onghee Moses okwa li a hongwa ounongo aushe wOvaegipiti. Okwa li ha popi nouladi nokwa longa oilonga inene.
23 “Moses eshi a wanifa omido 40, okwa li a tokola a ka talele po ovamwaxe Ovaisrael.*
24 Eshi a mona Omuegipiti umwe ta ungaunga naumwe womovamwaxe shihe li pauyuki, okwa popila omumwaxe mokudipaa Omuegipiti.
25 Moses okwa li ta diladila kutya ovamwaxe otave shi didilike mo kutya oye ta longifwa kuKalunga opo va xupifwe, ashike kava li ve shi didilika mo.
26 Efiku la landula ko, okwe uya kovamwaxe nokwa hanga vavali vomuvo tava lwifafana, opo nee okwe va anuna va pange ombili, ta ti: ‘Ovalumenhu nye, nye ovamwainafana. Omolwashike tamu ningafana nai?’
27 Ndele ou a li ta ningi nai mukwao okwa undula Moses, ta ti: ‘Olyelye e ku tula po u ninge omupangeli nomutokoli wetu?
28 Hano owa hala okudipaa nge ngaashi wa dipaele Omuegipiti onghela?’
29 Eshi Moses a uda ngaho, okwa faduka po ndele ta i a ka kale omunailongo kuMidian, oko a dalela ovanamati vavali.
30 “Eshi pa pita omido 40, Moses okwa li a holokelwa komweengeli moshixwa sheno sha tema mombuwa i li popepi nomhunda yaSinai.
31 Moses eshi e shi mona, okwa li e shi kuminwa. Ndele fimbo a li ta ehene popepi nasho e shi tale nawa, okwa uda ondaka yaJehova tai ti:
32 ‘Aame Kalunga kooxokulululwa, Kalunga kaAbraham, Kalunga kaIsak naKalunga kaJakob.’ Moses okwa li a hovela okukakama noka li vali a hala oku shi tala nawa.
33 Jehova okwa tya kuye: ‘Dula ko eenghaku doye osheshi onhele apa u li oiyapuki.
34 Ondi wete omahepeko oshiwana shange osho shi li muEgipiti, nondi udite omakemo asho, onghee onde uya oku shi xupifa. Paife ohandi ku tumu kuEgipiti.’
35 Moses oo va li va dina, tava ti: ‘Olyelye e ku tula po u ninge omupangeli nomutokoli?’ oye a li omupangeli nomumangululi wavo a tumwa kuKalunga okupitila momweengeli oo a li e mu holokela poshixwa sheno.
36 Omulumenhu oo okwe va pitifa mo, nokwa longa oikumwifilonga muEgipiti, pEfuta Litilyana nosho yo mombuwa oule womido 40.
37 “Moses ou oye a lombwelele Ovaisrael ta ti: ‘Kalunga ota ka nangeka po omumwaxo umwe mokati keni a ninge omuprofeti ngaashi ame.’
38 Oye tuu ou a li pamwe noshiwana shaIsrael mombuwa, a li nomweengeli komhunda yaSinai nosho yo nootatekulululwa. Okwa li a pewa etumwalaka kuKalunga e li tu shiivifile.
39 Ootatekulululwa kava li va dulika kuye, kava li ve mu tambula ko nova li va diladila okushuna kuEgipiti,
40 eshi va ti kuAron: ‘Tu ningila ookalunga ve tu kwatele komesho. Osheshi katu shi shii kutya oshike sha ningilwa Moses oo e tu kufa muEgipiti.’
41 Opo nee pefimbo olo ova li va ninga oshikalunga sha fa onhana, ndele tave shi yambele omayambo nova li va hovela okuhafela oilonga yomake avo.
42 Onghee Kalunga okwe va pilamena nokwe va efa va longele oinima yokeulu, ngaashi sha shangwa kovaprofeti, va ti: ‘Eumbo nye laIsrael, haame mwa kala hamu yambele omayambo mombuwa oule womido 40.
43 Ndele ohamu longele oihongwafano oyo mwe lihongela ngaashi etwali loshikalunga Molok noshikalunga shonyofi Refan oyo hamu humbata. Onghee ohandi ke mu twala kokule nokuli naBabilon.’
44 “Eshi ootatekulululwa va li mombuwa, ova li ve na etwali olo tali ulike kutya Kalunga oku li pamwe navo, na Moses okwa li e li tunga ngaashi naanaa Kalunga a li e mu lombwela nokwe mu ulikila.
45 Opo nee ootatekulululwa ove li pewa li li efyuululo nove li twala pamwe naJosua kedu omo mwa li oiwana oyo Kalunga a ta mo moipafi yootatekulululwa. Ndele ova kala nalo fiyo opefimbo laDavid.
46 David okwa li a hokiwa kuKalunga nokwa li a pula a pewe oufembanghenda wokutungila Kalunga kaJakob onhele.
47 Ndele Salomo oye a li a tungila Kalunga onhele.
48 Ashike Omukombadambada iha kala meenhele da tungwa nomake, ngaashi ashike omuprofeti umwe a ti:
49 ‘Eulu olo olukalwa lange, nedu olo oshilyatelo sheemhadi dange. Jehova okwa ti: Otamu ka tungila nge onhele ya tya ngahelipi? Ile onhele yange yokukala oi li peni?
50 Mbela haame nda shita oinima aishe oyo?’
51 “Oohamitwe dikukutu nye, ovo mwa fitika omatwi eni noinamu pita etanda momitima deni, alushe otamu kondjifa omhepo iyapuki, ngaashi ooxokulululwa va li hava ningi.
52 Omuprofeti elipi po ina hepekwa kooxokulululwa? Ova dipaa ovaprofeti ovo va shiivifa komesho yefimbo okuuya kwomuyuki oo mwa kengelela nomwa dipaa.
53 Omwa pewa Omhango okupitila movaengeli, ndele inamu i diinina.”
54 Eshi va uda eendjovo odo, ova li va handuka unene* nova li va hovela okulikwesha komayoo.
55 Ndele Stefanus, oo a li e yadi omhepo iyapuki, okwa tala keulu nokwa mona oshinge shaKalunga naJesus e li ofika kolulyo laKalunga,
56 ndele ta ti: “Taleni, ondi wete eulu la yeuluka nOmona womunhu e li ofika kolulyo laKalunga.”
57 Opo nee ova ingida pombada nove likwata komatwi ndele tave mu totele aveshe.
58 Ove mu umbila kondje yoshilando nova hovela oku mu denga nomamanya. Eembangi odo da li tadi mu pataneke oda li da tula oikutu yado yokombada peemhadi domulumenhu omunyasha wedina Saul.
59 Fimbo va li tava denge Stefanus nomamanya, okwa indila ta ti: “Omwene Jesus, tambula omwenyo wange.”*
60 Opo nee okwa twa eengolo, ndele ta ingida pombada ta ti: “Jehova, ino va valulila etimba olo.” Konima eshi a popya ngaho, okwa fya.
Eshangelo lopedu
^ Eln., “olombuto yaye.”
^ Eln., “ombuto yaye.”
^ Ile “oilya.”
^ Ile “eemwenyo 75.”
^ Ile “kulila.”
^ Ile “a ka konakone onghalo.”
^ Ile “oda li de va twa komitima.”
^ Ile “omhepo yange.”
