Ovaefeso 1:1-23
1 Ame Paulus, omuyapostoli waKristus Jesus oo nda nangekwa po kuKalunga, ohandi shangele ovayapuki vomuEfeso ovo ve li ovadiinini nove li ovahongwa vaKristus Jesus:
2 Efilonghenda nombili yaKalunga Tate yetu noyOmwene Jesus Kristus nai kale pamwe nanye.
3 Kalunga oo e li Xe yOmwene wetu Jesus Kristus na hambelelwe eshi e tu nangeka noupuna okupitila momhepo iyapuki nokwe tu pa eenhele meulu tu li ovahongwa vaKristus.
4 Okwe tu hoolola tu ninge ovahongwa vaKristus fimbo ounyuni inau shitwa, opo tu ulike ohole, tu kale ovayapuki notuhe na oshipo koshipala shaYe.
5 Okwe tu hoolola komesho yefimbo tu ninge ovana vaye okupitila muJesus Kristus, metwokumwe nehalo laye.
6 Osho Kalunga okwe shi ninga opo ovanhu ve mu tange eshi e tu ulikila efilonghenda laye linene okupitila mOmona waye omuholike.
7 Kalunga okwa yandja ekulilo okupitila mohonde yOmona waye omolwefilonghenda laye linene opo tu dule okudiminwa po omatimba etu.
8 Omolwefilonghenda linene, Kalunga okwe tu pa ounongo neshiivo* alishe,
9 opo tu shiive oshiholekwa shiyapuki shi na sha nehalo laye. Oshiholekwa osho oshi na sha naasho a li a lalakanena okuninga
10 omolwelongekido* olo a li ta ka wanifa po peufwafimbo, opo a ongele oinima aishe yomeulu nosho yo yokombada yedu okupitila muKristus. Oinima aishe otai ka ongelwa okupitila muKristus
11 oo hatu ka fyuulula pamwe naye osho twa udanekelwa nale kuKalunga oo ha wanifa po oinima aishe oyo a udaneka metwokumwe nehalo laye,
12 opo a hambelelwe nokufimanekwa okupitila mufye ovo twa itavela tete muKristus.
13 Eshi mwa uda oshili, onghundana iwa i na sha nexupifo leni, nanye omwe mu itavela. Konima eshi mwe mu itavela, omwa didilikwa nomhepo iyapuki oyo mwa li mwa udanekelwa.
14 Omhepo iyapuki oi li eshilipaleko kutya Kalunga ota ka wanifa po ashishe osho e tu udanekela, nota ka mangulula oshiwana shaye okupitila mekuliloyambo opo a fimanekwe.
15 Eshi nda uda eitavelo leni mOmwene Jesus nohole oyo mwa ulikila ovayapuki aveshe,
16 ohandi pandula alushe Kalunga omolweni. Ohandi twikile yo oku mu tumbula momailikano ange
17 opo Kalunga kOmwene wetu Jesus Kristus, Xe yefimano, e mu pe ounongo mu dule okuuda ko oinima oyo ta holola opo mu mu shiive nawa.
18 Kalunga okwa patulula omitima deni opo mu mone nomu shiive eteelelo olo e mu pa nosho yo oinima iwa kuhe na vali oyo a udanekela ovayapuki.
19 Tu li ovaitaveli, okwe tu hololela eenghono daye dinenenene okupitila moilonga yaye oyo a longa
20 eshi a nyumuna Kristus koufi nokwe mu kaleka kolulyo laye meulu,
21 nokwe mu pa ondodo ya tumbala i dule yovapangeli aveshe, yaavo ve na eenghonopangelo, yaavo ve na eenghono noyovanamadina aveshe, havomounyuni ashike ou,* ndele novomwaau tau uya.
22 Kalunga okwa tula oinima aishe koshi yeemhadi daKristus nokwe mu ninga omutwe woinima aishe meongalo
23 olo li li olutu laye noli na omaukwatya aye aeshe.
Eshangelo lopedu
^ Ile “neendunge.”
^ Ile “omolwelongekido loinima.”
^ Ile “havomonghalelo ei yoinima.” Tala omafatululo oitya.
