Ovaefeso 4:1-32
4 Ame Paulus, oo ndi li modolongo omolwOmwene wetu, ohandi mu indile mu kale metwokumwe naasho mwa ifanenwa.
2 Kaleni alushe ovalininipiki, mu na omwenyo muwa, mu na onheni nohamu lididimikilafana pahole.
3 Kaleni mu na ombili nokukaleka po oukumwe oo mu na omolwomhepo iyapuki.
4 Ndele ngaashi pe na eteelelo limwe olo mwa ifanenwa, ope na yo olutu limwe, omhepo imwe,
5 Omwene umwe, eitavelo limwe, eninginifo limwe
6 naKalunga Xe yaaveshe umwe, oo e li omupangeli waaishe, ha longifa oinima aishe noha kala mwaaishe.
7 Keshe umwe womufye okwa pewa efilonghenda laKalunga, na Kristus oye a pa keshe umwe womufye oshali oyo.
8 Omishangwa oda ti: “Eshi a londa meulu okwa ya pamwe neenghwate, nokwa yandja ovalumenhu ve li eeshali.”
9 Eshi taku ti “okwa londa” osha hala okutya ngahelipi? Osha hala okutya okwa li yo a londoloka e uya kombada yedu.
10 Ou a londoloka e uya kedu, oye ngoo a londa a ya meulu, opo oinima aishe i wanifwe.
11 Ovalumenhu ovo a yandja, vamwe ovayapostoli, vamwe ovaprofeti, vamwe ovaudifi,* vamwe ovafita navamwe ovahongi.
12 Okwe va yandja opo va kwafele* ovayapuki va ende mondjila ya yuka, va yakule vamwe nova tunge olutu laKristus,*
13 opo tu hangane* atushe meitavelo limwe nokumona eshiivo lashili li na sha nOmona waKalunga, tu ninge ovakulunhu* pamhepo fiyo twa kulika filufilu omaukwatya a fa aKristus.
14 Onghee hano, inatu kaleni vali ngaashi ounona nongaashi omakufikufi oo haa telaanifwa komhepo, opo tuha twalwaatwalwe nokushikula omahongo opanhu oipupulu oo a nuninwa oku tu pukifa noku tu yula.
15 Natu kaleni hatu popi oshili nokuulika ohole opo tu dule okukala ovakulunhu pamhepo moinima aishe oyo i li metwokumwe naKristus oo e li omutwe wetu.
16 Okupitila muye, oilyo aishe yolutu oya tulwa kumwe, ya kwatakanifwa komatwikililo, nohai longele kumwe, opo oshilyo keshe shi wanife po oshilonga shasho. Ngeenge oilyo aishe otai longo nawa, olutu otali ka kula nawa notali ke litunga pahole.
17 Onghee hano, ohandi mu lombwele noku mu kumaida koshipala shOmwene kutya inamu enda vali ngaashi ovanhu vomoiwana ovo hava diladila oinima yongaho.
18 Ove li momilaulu pamadiladilo noitava ka mona omwenyo oo Kalunga te tu pe molwaashi kave na ko nasha nova kukutika omitima davo.
19 Ova dina omifikamhango dopaenghedi, hava nyono nopehe na ouxwenge* nova duka mokulonga owii keshe.
20 Ndele omu shi shii kutya Kristus hasho e li ngaho
21 ngeenge omwa uda nomwa hongwa oshili oyo a honga.
22 Omwa hongwa mu lidule omunhu mukulu molwaashi omwa li hamu shikula elihumbato leni lonale inali koshoka eshi mwa li mwa efa mu pukifwe komahalo eni.
23 Twikileni okulundulula onghedi yeni yokudiladila*
24 nokudjala omunhu mupe oo a shitwa metwokumwe nehalo laKalunga, mouyuki nomoudiinini washili.
25 Onghee hano, molwaashi amushe omu li oilyo yolutu limwe, efei po okupopya oipupulu, ndele kaleni hamu lombwelafana oshili.
26 Handukeni, ndele inamu nyona; inamu efa etango li ningine mwa handuka.
27 Inamu pa Ondiaboli omhito.
28 Ou ha vake ina vaka vali, ndele na longe noudiinini oilonga iwa nomake aye opo a dule okutukulilafana naao e na omhumbwe.
29 Momakanya eni inamu pita nandenande eendjovo dii, ndele popyeni eendjovo diwa opo di pameke ovo tava pwilikine kudo.
30 Inamu nyikifa oluhodi omhepo iyapuki yaKalunga, osheshi oyo mwa didilikifwa opo mu xupifwe okupitila mekuliloyambo.
31 Henukeni oinima ei, onya, ehandu, efulakato, ehanyauko, okupopya inaku koshoka nosho yo owii aushe.
32 Ndele kaleni hamu kenukilafana, hamu filafana onghenda nokudiminafana po nehalo liwa ngaashi Kalunga he mu dimine po nehalo liwa okupitila muKristus.
Eshangelo lopedu
^ Ile “ovaudifi vonghundana iwa.”
^ Ile “va deule.”
^ Sha hala okutya, “eongalo.”
^ Ile “tu kale moukumwe.”
^ Ile “tu kale twa pyokoka.”
^ Ile “hava nyono nopehe na okufya ohoni.” MOshigreka, aselgeia. Tala omafatululo oitya.
^ Eln., “omhepo yomadiladilo eni.”
