Ovaefeso 6:1-24
6 Ounona, dulikeni kovakulunhu veni metwokumwe nehalo laKalunga, osheshi osho sha yuka.
2 “Fimaneka xo nanyoko;” eshi osho oshipango shotete shi na eudaneko:
3 “Opo u kale nonghalamwenyo iwa* nou kale nomwenyo mule kombada yedu.”
4 Ootate, inamu nyemateka ovana veni, ndele va tekuleni noku va deula metwokumwe newiliko* laJehova.
5 Ovapiya, dulikeni koovene veni vopanhu,* tamu shi ningi netilo nokukakama nokudulika nomutima aushe, ngaashi kuKristus,
6 hangeenge ashike mu wetike kovanhu opo mu va hafife, ndele ongaashi ovapiya vaKristus ovo hava longo ehalo laKalunga nomutima aushe.
7 Longeleni oovene veni nehalo liwa, ngaashi tamu longele Jehova, ndele havanhu.
8 Osheshi omu shi shii kutya keshe umwe, kutya nee omupika ile omudalwa, ota ka pewa ondjabi kuJehova omolwoilonga yaye iwa.
9 Oovene nye, inamu ungaunga nai novapiya veni, noinamu va ningila omatilifo, osheshi omu shi shii kutya Omwene wavo noweni oku li meulu noke na okatongo.
10 Xuuninwa, Omwene ne mu pe eenghono omolweenghono daye dinene.
11 Djaleni oilwifo aishe oyo mwa pewa kuKalunga opo mu dule okukondja mwa pama muha yulwe* kOndiaboli,
12 molwaashi otu li molwoodi,* ndele itatu lwifa ovanhu, ashike ohatu lwifa omapangelo, ovawiliki novapangeli vounyuni ou womilaulu, sha hala okutya eemhepo dowii odo di li mevalelwa.
13 Onghee hano, djaleni oilwifo aishe oyo mwa pewa kuKalunga opo mu dule okuliamena momafimbo mai, nokonima eshi mwa mana okulilongekidila aishe, kaleni mwa pama.
14 Kaleni mwa pama, nomwe limanga ekwamo loshili moiya yeni, djaleni oshipapa shouyuki peenhulo deni,
15 djaleni yo eenghaku keemhadi deni, mwe lilongekida okuudifa onghundana iwa yombili.
16 Kakele kaasho, kufeni oshikelelifo sha kula sheitavelo, opo mu dule okudima po nasho oikuti* aishe yomunawii ya xwama omundilo.
17 Djaleni yo embale lexupifo nokuhomata eongamukonda lomhepo, sha hala okutya eendjovo daKalunga.
18 Kaleni hamu ilikana omailikano e lili noku lili nokwiindila efimbo keshe momhepo. Kakele kaasho, kaleni oupafi nokwiindilila ovayapuki aveshe.
19 Ilikanenei nge yo ndi pewe eendjovo diwa, opo ndi dule okupopya nouladi eshi handi udifa kombinga yoshiholekwa shiyapuki shi na sha nonghundana iwa.
20 Osheshi onda tumwa kuKalunga ndi udife onghundana iwa, nomolwaasho nda mangwa nomalyenge. Onghee ilikanenei nge opo ndi udife nouladi.
21 Omumwatate omuholike nomupiya wOmwene omudiinini, Tikikus, ote ke mu shiivifila shi na sha noilonga yange nonghee handi shi endifa.
22 Ohandi mu tumu e uye kunye opo e mu shiivifile kutya ohatu shi endifa ngahelipi noku mu hekeleke.
23 Ovamwatate nava kale nombili, neitavelo nohole yaKalunga Tate noyOmwene Jesus Kristus.
24 Efilonghenda laKalunga nali kale pamwe naaveshe ovo ve hole Omwene wetu Jesus Kristus nohole yaalushe.
Eshangelo lopedu
^ Ile “u pondole.”
^ Ile “nomalombwelo.”
^ Eln., “vopambelela.”
^ Ile “muha kotokelwe.”
^ Eln., “monghondja.”
^ Ile “eeholo.”
